.jpg)
ខេត្តបន្ទាយមានជ័យ ៖ យុវជន២នាក់បានស្លាប់ភ្លាមៗក្នុងថ្លុកឈាមនៅនឹងកន្លែងកើតហេតុ និងម្នាក់ទៀតបានរងរបួសយ៉ាងធ្ងន់ធ្ងរ ត្រូវបានរថយន្តសង្គ្រោះ របស់ស្នងការដ្ឋាននគរបាលខេត្តដឹកយកទៅសង្គ្រោះ ជាបន្ទាន់បន្ទាប់ពីជួបគ្រោះថ្នាក់ចរាចរណ៍ បើកម៉ូតូបុករថយន្តដឹកស្រូវឈប់ចតស្ងៀម។ហេតុការណ៍ដ៏គួរឲ្យរន្ធត់នេះ បានកើតឡើងនៅវេលាម៉ោង១១និង៣០នាទីយប់ថ្ងៃទី២៩ ខែសីហា ឆ្នាំ២០១២ លើកំណាត់ផ្លូវជាតិលេខ៥ ចន្លោះបង្គោលខ្សែភ្លើង៤៦៤-៤៦៥ ស្ថិតក្នុងភូមិថ្មី ឃុំសំរោង ស្រុកអូរជ្រៅ ខេត្តបន្ទាយមានជ័យ ។
តាមការឲ្យដឹងពីសាច់ញាតិជនរងគ្រោះ បានប្រាប់សមត្ថកិច្ចថាយុវជន២នាក់ដែលស្លាប់ មានឈ្មោះ១-សៅ សឹង ភេទប្រុសអាយុ២១ឆ្នាំ នៅភូមិថ្មី ឃុំសំរោង ស្រុកអូរជ្រៅ ខេត្តបន្ទាយ មានជ័យ(អ្នកបើកបរ) ២-យ៉ង ម៉ាប់ ភេទប្រុស អាយុ៣១ឆ្នាំ នៅភូមិជាមួយ ទាំង២នាក់ បានស្លាប់នៅនឹងកន្លែងកើតហេតុ ឯម្នាក់ទៀតឈ្មោះ ថន ថ្លៃ ភេទប្រុស អាយុ២០ឆ្នាំ នៅភូមិជាមួយ របួសយ៉ាងធ្ងន់ធ្ងរ ត្រូវបានរថយន្តសង្គ្រោះរបស់ស្នងការដ្ឋាននគរបាល ដឹកទៅមន្ទីរពេទ្យសង្គ្រោះជាបន្ទាន់ផងដែរ ។ ម៉ូតូម៉ាកហុងដា C១២៥ ពណ៌ខ្មៅ ពាក់ស្លាកលេខ ប.មានជ័យ 1A-0952។
លោកវរសេនីយ៍ទោ ឈឿម សុផុន នាយការិយាល័យនគរបាលចរាចរណ៍ជើងគោកខេត្ត បានឲ្យដឹងថា៖មូលហេតុដែលបណ្តាលឲ្យកើតមានគ្រោះថ្នាក់ចរាចរណ៍នេះ គឺដំបូងម៉ូតូបានបើកបរ ពីទិសខាងកើតទៅលិច ពេលដល់កន្លែងកើតហេតុ អ្នកបើកម៉ូតូចាំងភ្នែកនិងភ្លើងរថយន្ត ដែលបើកផ្ទុយទិសគ្នា ពេលនោះអ្នកបើកម៉ូតូមើលឧបសគ្គខាងឃើញមិនច្បាស់ក៏ជ្រុលទៅបុកទ្រុងរថយន្ត ម៉ាកFUSU ពណ៌ស-ខៀវ ពាក់ស្លាក លេខបាត់ដំបង 3A-1301ពីក្រោយចំហៀងខាងឆ្វេងពេញទំហឹង បណ្តាលឲ្យអ្នកបើកបរនិងអ្នករួមដំណើរបានស្លាប់ភ្លាមៗនៅនឹងកន្លែងកើតហេតុយ៉ាងអាណោច អាធម្ម និង អ្នករួមដំណើរម្នាក់ទៀតរងបួសធ្ងន់ធ្ងរ ។ ចំណែកអ្នកបើករថយន្តបន្ទាប់ពីកើតមានគ្រោះថ្នាក់នេះ បានរត់គេចខ្លួនបាត់ស្រមោល ចំពោះវត្ថុតាងគ្រោះថ្នាក់ចរាចរណ៍ សមត្ថកិច្ចបានយកមករក្សាទុកនៅស្នងការដ្ឋាន នគរបាលខេត្តបន្ទាយមានជ័យ ដើម្បីស្រាវជ្រាវរកម្ចាស់រថយន្តមក ដោះស្រាយតាមផ្លូវច្បាប់ ៕
