រាជធានីភ្នំពេញ ៖
នៅអំឡុងពាក់កណ្តាលខែកញ្ញាខាងមុខនេះ
សហព័ន្ធកីឡាកាយវប្បកម្មកម្ពុជានឹងបញ្ជូនកីឡាករកីឡាការិនី
ចំនួន៣រូបទៅប្រកួតកីឡាកាយវប្បកម្មជ្រើសរើសជើងឯក
អាស៊ី នៅទីក្រុងគ័ងចូវ ប្រទេសចិន ។
នេះជាការអះអាងពីមន្ត្រីថ្នាក់កំពូលប្រចាំសហព័ន្ធកីឡាកាយ
វប្បកម្មកម្ពុជាកាលពីរសៀលថ្ងៃទី១៣ សីហា
ក្នុងជំនួបជាមួយភ្នាក់ងារសារព័ត៌មានកោះសន្តិភាព ។
លោកសុខ មង្គលរស្មី
ប្រធានសហព័ន្ធកីឡាកាយវប្បកម្មកម្ពុជាបានបញ្ជាក់នៅចំពោះ
មុខអ្នកយកព័ត៌មានកោះសន្តិភាពថា ចាប់ពីថ្ងៃទី១៩ ខែកញ្ញា
ដល់ថ្ងៃទី២៥ ខែកញ្ញា ឆ្នាំ២០១២ ខាងមុខនេះ
តំណាងសហព័ន្ធកីឡាកាយវប្បកម្មកម្ពុជានឹងធ្វើការបញ្ជូន
កីឡាករ កីឡាការិនីឆ្នើម៣រូបទៅកាន់ទីក្រុងគ័ងចូវ
ប្រទេសចិន ដើម្បីប្រកួតកីឡាAsia Champion
ដោយមាន៣៥ប្រទេសចូលរួមប្រកួតប្រជែង ។ លោកបន្តថា
គម្រោងនេះលោកបានទទួលពីថ្នាក់ដឹកនាំរៀបចំការប្រកួតនៅ
ប្រទេសចិន ដែលបានដាក់ថ្ងៃប្រកួតខាងលើមកឱ្យ
តែត្រង់ថាមានការប្រែប្រួលយ៉ាងម៉េចទៀតនោះគេនឹងផ្តល់
ដំណឹងតាមក្រោយបន្តទៀត ។
អ្វីដែលជាចម្បងគឺខាងសហព័ន្ធបានបញ្ជូនព័ត៌មានមួយនេះទៅ
ឱ្យកីឡាករ-កីឡាការិនីឆ្នើមទាំងនោះខិតខំប្រឹងប្រែង
ហ្វឹកហ្វាត់បំប៉នសមត្ថភាពបណ្តើរៗ ដើម្បីកុំឱ្យខូចការណ៍ ។
លោកសុខ មង្គលរស្មី បានបញ្ជាក់ថា
«កីឡាករ-កីឡាការិនីឆ្នើមទាំង៣រូបនោះរួមមានកញ្ញាអង់
សុខគន្ធា លោកសំបូរ ណាង និងលោកសំបូរ នួន ។
ទោះបីពេលវេលាប្រកួតហាក់នៅសល់ច្រើន
ថ្ងៃទៀតមែន
ប៉ុន្តែសម្រាប់ខ្ញុំដែលមានភារៈកាន់កាប់ភារកិច្ចនេះមាន
ការបារម្ភណាស់
ហើយតែងតែដាស់តឿនដល់កីឡាករ-កីឡាការិនីទាំង៣រូបនោះ
ឱ្យព្យាយាមហ្វឹកហាត់ឱ្យបានទៀងទាត់
ព្រោះពេលវេលាដើរទៅលឿនណាស់មិនអាចប្រហែសបានទេ
ម៉្យាងវាជាមុខមាត់ប្រទេសយើងផងដែរ» ។
ទោះជាយ៉ាងណា
ប្រធានសហព័ន្ធរូបនេះបានបង្ហាញនូវភាពជឿជាក់នេះថា
លោកពិតជាមានជំនឿលើកីឡាករ-កីឡាការិនីទាំង៣រូបនេះ
ប្រាកដណាស់ ។ ករណីដូចជាកីឡាករសំបូរ ណាង និងសំបូរ នួន
ពួកគេសុទ្ធតែជាជើងខ្លាំងធ្លាប់ទទួលបានជើងឯកចំណាត់ថ្នាក់
លេខ១ជាហូរហែពីរបៀបបញ្ចេញសាច់ដុំដ៏មាំមួនប្រកបដោយ
រាងសង្ហារបស់ពួកគេ និងធ្លាប់ឈ្នះដាច់គេគ្មានគូប្រៀប
កាលពីប្រកួតនៅប្រទេសថៃកន្លងមក ។
អីុចឹងហើយទើបនៅស្រុកថៃអ្នកស្នេហាកីឡាកាយវប្បកម្ម
គ្មានអ្នកណាមិនស្គាល់រូបលោកសំបូរ ណាង និងសំបូរ នួន
នោះទេ
រហូតខាងសហព័ន្ធកីឡាកាយវប្បកម្មប្រចាំនៅទីក្រុងបាងកក
ចង់ទិញពួកគេទាំង២នាក់ធ្វើជាសមាជិកនៅទីនោះទៀតផង
ដែលទាំងអស់នេះហើយជាធនធានមួយសម្រាប់ខាងសហព័ន្ធកាយវប្ប
កម្មដែលមានជំនឿចិត្តថា នឹងឈ្នះមុនបែបនេះ ។
ចំណែកឯកីឡាការិនី អង់សុខគន្ធា
វិញនាងទើបតែចូលជាកីឡាការិនីជម្រើសជាតិក្នុងអំឡុងឆ្នាំ
២០១១កន្លងទៅថ្មីនេះប៉ុណ្ណោះ
ប៉ុន្តែនាងមានដងខ្លួនខ្ពស់ល្អ ដៃជើងស្រឡូន
តែរឹងមាំដែលខុសពីកីឡាការិនីសាសន៍គេដែលលោកធ្លាប់
សង្កេតនោះ គឺគ្មានចំណុចត្រង់ណាល្អជាងសុខគន្ធា ឡើយ ។
ម្យ៉ាងវិញទៀត
ពេលលោកនាំនាងទៅមើលការប្រកួតនៅស្រុកគេម្តងៗ
ច្រើនតែខាងអ្នកជំនាញផ្នែកនេះគេសរសើរនាងជាហូរហែ
ទើបគិតថាយកមកហ្វឹកហាត់ម្តងទៅ
ដោយមានគ្រូបង្ហាត់ជាជនជាតិស្វ៊ីសជាជំនួយសម្រាប់ផ្តល់
ទុនដល់នាង ។ យោងតាមលក្ខខណ្ឌដែលអាចឈ្នះការប្រកួត
លោកសុខ មង្គលរស្មី ពន្យល់ថា តាមបទពិសោធន៍កន្លងមក
ការបង្ហាញកីឡាកាយវប្បកម្ម
ឬអាចហៅថាការបង្ហាញរាងមានសាច់ដុំមាំមួនគេច្រើនឱ្យ
ពិន្ទុទៅលើស្បែក ឬសាច់ខ្លួនស្ងួតល្អ
ដោយឱ្យគណៈកម្មការបច្ចេកទេសមើលចំពីចំហៀងខាងឆ្វេងខាង
ស្តាំមុខក្រោយ
បើកីឡាករណាមានគុណសម្បត្តិល្អនោះប្រាកដជាឈ្នះគេមិន
ខាន ។
គួរបញ្ជាក់ថា
សហព័ន្ធកីឡាកាយវប្បកម្មកម្ពុជាបានបង្កើតឡើងជាយូរមកហើយ
ប៉ុន្តែកីឡាប្រភេទនេះទើបតែមានសន្ទុះឡើងវិញ
កាលពីឆ្នាំ២០១០
ដែលមានការបង្កើតជាកម្មវិធីប្រកួតថ្នាក់ជាតិលើកដំបូង ។
ដោយឡែកឆ្លងកាត់ការប្រកួតនៅក្រៅស្រុកវិញ
ខាងសហព័ន្ធកីឡាកាយវប្បកម្មកម្ពុជាហាក់មានសកម្មភាពជាហូរ
ហែ និងមានភាពលេចធ្លោគួរសមដូចជាឆ្នាំ២០១១កន្លងទៅ
សហព័ន្ធកីឡាកាយវប្បកម្មកម្ពុជាបាននាំកីឡាករទៅប្រកួតនៅ
ប្រទេសថៃ និងម៉ាឡេស៊ី ។ ចំណែកនៅក្នុងឆ្នាំ២០១២នេះ
ក្រៅពីមានផែនការបញ្ជូនកីឡាករ-កីឡាការិនីទៅប្រកួតនៅ
ប្រទេសចិន
ខាងសហព័ន្ធមានគម្រោងបញ្ជូនកីឡាករឆ្នើមជាច្រើនរូបចេញទៅ
ប្រកួតតាមបណ្តាប្រទេសជាសមាជិកអាស៊ានជាថ្មីម្តងទៀត ។
យ៉ាងណាក៏ដោយប្រិយមិត្តអ្នកស្នេហាវិស័យកីឡានៅតែផ្តល់
កម្លាំងចិត្តដល់កីឡាករ-កីឡាការិនីទាំង៣រូបដែលត្រូវ
ចេញទៅប្រកួតនៅប្រទេសចិន
ដោយសង្ឃឹមថានឹងទទួលបានជ័យជម្នះយកមេដាយមកជូនជាតិមិន
ខាន ៕
