ដំណើរទស្សនកិច្ចសិក្សា របស់និស្សិត IIC ទៅកាន់ខេត្តព្រះសីហនុ

 

ភ្នំពេញៈ នៅថ្ងៃទី២៥ ខែសីហា ឆ្នាំ២០១២ នេះនិស្សិតសាកលវិទ្យាល័យ IIC ប្រមាណជាង ៦០០នាក់ បានធ្វើដំណើរ ទស្សនកិច្ចសិក្សាមួយ ទៅកាន់ខេត្តព្រះសីហនុ (កំពង់សោម)។ តាំងពីព្រលឹមស្រាងៗម៉ោង ៥:០០នាទី និស្សិតបានរួសរាន់ មកជួបជុំគ្នាយ៉ាងកុះករ នៅសាកលវិទ្យាល័យ IIC ដើម្បីឡើងជិះរថយន្តរៀងៗខ្លួន ទៅតាមការរៀបចំរបស់សាកលវិទ្យាល័យ។

ខ្សែរថយន្តចាប់ផ្តើមចេញដំណើរនូវម៉ោង ៦:០០នាទីគត់ ហើយនឹងឆ្លងកាត់តំបន់គោលដៅ ជាបន្តបន្ទាប់ដូចដែលបានគ្រោងទុក មុននឹងទៅដល់គោលដៅចុងក្រោយ គឺឆ្នេរអូរឈើទាល។ ខណៈកំពុងធ្វើដំណើរនោះ និស្សិតទាំងអស់សុទ្ធតែមាន ទឹកមុខរីករាយនាំគ្នាជជែកលេង ក្អាកក្អាយពីនេះពីនោះ។
ពួកគេសុទ្ធតែគិតថាដំណើរទស្សនកិច្ចសិក្សានេះ ពិតជាមានសារៈសំខាន់ ក្រៅពីសប្បាយរីករាយដោយឃើញមានទិដ្ឋភាព ប្លែកៗនៅតាមដងផ្លូវ គេបានពង្រឹងចំណងមិត្តភាព លើសពីនេះទៀតពួកគេ នឹងទទួលបានចំណេះដឹងជាក់ស្តែង ដើម្បីផ្សារភ្ជាប់ទៅនឹង ទ្រឹស្តីដែលបានសិក្សា៕