រាជធានីភ្នំពេញ ៖ ម៉ូតូឌ្រីមសេ១២៥ ពណ៌ខ្មៅ
ស៊េរី២០០៧ មួយគ្រឿង
ជិះដោយបុរស២នាក់បានបើកបញ្ច្រាសផ្លូវយ៉ាងលឿនក៏ជ្រុល
ចង្កូតទៅបុកម៉ូតូឌ្រីមសេ១២៥ ពណ៌ខ្មៅ ស៊េរី២០០៨ មួយគ្រឿងទៀត
ជិះដោយបុរស២នាក់
ចំពីមុខពេញទំហឹងបណ្តាលឱ្យខាងឌ្រីម២០០៨
ស្លាប់ទាំងពីរនាក់ ពេលបញ្ជូនទៅដល់មន្ទីរពេទ្យព្រះកុសុមៈ
។ ឯបុរស២នាក់ទៀតខាងម៉ូតូឌ្រីម២០០៧
រងរបួសធ្ងន់ត្រូវរថយន្តសាមុយដឹកយកទៅសង្គ្រោះនៅ
គ្លីនិកឯកជនមួយ ។
ហេតុការណ៍នេះ
កើតឡើងកាលពីវេលាម៉ោង១២យប់ថ្ងៃទី២ សីហា
តាមបណ្តោយមហាវិថីសហព័ន្ធរុស្ស៊ី សង្កាត់ទឹកថ្លា
ខណ្ឌសែនសុខ ចំណុចមុខក្រុមហ៊ុនតូយ៉ូតា ។
ជនរងគ្រោះជាអ្នកបើកម៉ូតូឈ្មោះ ជឿន សារិត អាយុ២៣ឆ្នាំ
ជានិស្សិត ស្នាក់នៅភូមិត្រពាំងឈូក សង្កាត់ទឹកថ្លា
ខណ្ឌសែនសុខ (ស្លាប់) និងម្នាក់ទៀតជិះពីក្រោយឈ្មោះ ជួន គួន
អាយុ២២ឆ្នាំ ស្នាក់នៅសង្កាត់ទឹកថ្លា ខណ្ឌសែនសុខ
(ស្លាប់) ។ ចំណែកអ្នករងរបួសឈ្មោះ រ៉េន បញ្ញា
អាយុ២២ឆ្នាំ ជាសិស្ស ស្នាក់នៅសង្កាត់ទឹកថ្លា ខណ្ឌសែនសុខ
និងអ្នកជិះពីក្រោយឈ្មោះ ស៊ុន ផាវិត អាយុ២៤ឆ្នាំ
ស្នាក់នៅសង្កាត់ទឹកថ្លា ខណ្ឌសែនសុខ ។
លោក ហឿង វឿន
នាយរងផ្នែកសណ្តាប់ធ្នាប់ចរាចរណ៍ជើងគោក ខណ្ឌសែនសុខ
បានឱ្យដឹងថា មុនពេលកើតហេតុ ម៉ូតូឌ្រីមស៊េរី២០០៧
ជិះដោយបុរស២នាក់ បានបើកយ៉ាងលឿន
ក្នុងចំណែកផ្លូវបញ្ច្រាស ពីកើតទៅលិច
តាមបណ្តោយមហាវិថីសហព័ន្ធរុស្ស៊ី
ក៏បានបើកបោះពួយទៅបុកម៉ូតូឌ្រីមស៊េរី២០០៨ មួយគ្រឿងទៀត
ជិះដោយបុរស២នាក់
ចំពីមុខពេញទំហឹងបណ្តាលឱ្យបុរស២នាក់ខាងម៉ូតូឌ្រីមស៊េរី
២០០៨ ផ្លោងទៅបោកក្បាលនឹងថ្នល់ហូរឈាមកក្លាក់
ត្រូវរថយន្តសាមុយដឹកយកទៅសង្គ្រោះ
តែបានស្លាប់ទាំងពីរនាក់ពេលបញ្ជូនទៅដល់មន្ទីរពេទ្យ
ព្រះកុសុមៈ ឯភាគីខាងម៉ូតូឌ្រីមសេ១២៥ ស៊េរី២០០៧
ទាំងពីរនាក់
ត្រូវរថយន្តសាមុយដឹកយកទៅសង្គ្រោះនៅគ្លីនិកឯកជនមួយ ។
ក្រោយពេលកើតហេតុ
ប៉ូលិសចរាចរបានចុះវាស់វែងនិងយកម៉ូតូទាំងពីរគ្រឿងទៅ
រក្សាទុកនៅអធិការដ្ឋានខណ្ឌសែនសុខ រង់ចាំដោះស្រាយ
តាមផ្លូវច្បាប់ ៕
