(កណ្តាល) បុរសស៊ុយអែត Gottfrid ដែលត្រូវបានបញ្ជូនចេញពីកម្ពុជា យប់មិញ។ រូបថត Reuters
ភ្នំពេញៈ សហស្ថាបនិកគេហទំព័រ Pirate Bay លោក Gottfrid Svartholm Warg ត្រូវបាននិរទេសកាលពីយប់មិញ ទៅប្រទេសថៃ ជាកន្លែងដែលអាជ្ញាធរស៊ុយអែត នឹងបង្ខំឲ្យគាត់ឡើងយន្តហោះទៅប្រទេសស៊ុយអែត។ នេះបើយោងតាមនគរបាលដែលបានថ្លែងកាលពីម្សិលមិញ។
លោក គៀត ច័ន្ទថារិទ្ធ អ្នកនាំពាក្យអគ្គស្នងការនគរបាលជាតិ បានថ្លែងថា លោក Svartholm Warg បានចាកចេញពីព្រលានយន្តហោះអន្តរជាតិភ្នំពេញ តាមជើងហោះហើរ Thai Airways ទៅទីក្រុងបាងកកនៅវេលាម៉ោង ៨:៣០ យប់ថ្ងៃចន្ទ។
លោក ច័ន្ទថារិទ្ធ ថ្លែងថា៖«គាត់ឥឡូវនេះ បានចាកចេញពីប្រទេសរបស់យើងហើយ។ ទិសដៅបន្តទៀតរបស់គាត់ គឺជាការទទួលខុសត្រូវ របស់អាជ្ញាធរស៊ុយអែត»។
ប្រធានផ្នែក អន្តរជាតិ របស់នគរបាលជាតិស៊ុយអែត លោក Bertil Olofsson បានថ្លែងថា មន្រ្តីម្នាក់ពីពន្ធនាគារស៊ុយអែត និងមន្រ្តីនគរបាលស៊ុយអែតម្នាក់ នឹងអមដំណើរលោក Svartholm Warg ដើម្បីធានាថា គាត់នឹងត្រឡប់ទៅស៊ុយអែតវិញ។
ដើម្បីឲ្យ ការផ្ទេររបស់លោក Svartholm Warg ស្របច្បាប់ ថៃ និងស៊ុយអែត នឹងត្រូវតែមានការចរចាពិសេស ដែលបានធ្វើរួចហើយសម្រាប់ការផ្ទេរគាត់នៅពេលដែលគាត់ឡើងយន្តហោះទៅ Stockholm។
មន្រ្តីប្រឹក្សាយោបល់ផ្នែកយុត្តិធម៌ Rodolphe Prom បានថ្លែងថា បើទោះបីជាមានការទស្សន៍ទាយតាមអ៊ីនធឺណិតថា កិច្ចព្រមព្រៀងទ្វេភាគីរវាងថៃ និងស៊ុយអែតបានធានារួចហើយចំពោះការផ្ទេរ លោក Svartholm Warg ទៅស្រុកវិញ «ក៏កិច្ចព្រមព្រៀង នឹងធ្វើឡើងបានចំពោះតែជនជាតិស៊ុយអែត ដែលត្រូវបានកាត់ទោសនៅក្នុងប្រទេសថៃ ហើយថៃឲ្យផ្ទេរទៅប្រទេសស៊ុយអែតប៉ុណ្ណោះ មិនមែនអ្នកដែលត្រូវបានកាត់ទោសនៅប្រទេសភាគីទីបី ហើយបន្ទាប់មកនិរទេសទៅប្រទេសថៃនោះទេ»។
លោក សុក សំអឿន នាយកប្រតិបត្តិនៃក្រុមអ្នកច្បាប់ការពារសិទ្ធិកម្ពុជា បានថ្លែងមុនពេលការនិរទេស លោក Svartholm Warg កាលពីម្សិលមិញថា៖ «ឥឡូវនេះ វាយឺតហើយក្នុងការធ្វើអន្តរាគមន៍»។ លោក ក៏បានជាប់ពាក់ព័ន្ធនឹងបញ្ហានោះផងដែរ នៅពេលដែលមិត្តភក្តិរបស់ លោក Svartholm Warg បានមកសុំឲ្យលោកជួយស្វែងរកកន្លែងដែលជនជាតិស៊ុយអែតនោះ ត្រូវបានឃាត់ខ្លួនហើយសុំឲ្យលោកសិក្សាព័ត៌មានបន្ថែម បន្ទាប់ពីការចាប់ខ្លួនជនជាតិស៊ុយអែតនោះកាលពីសប្តាហ៍មុន។ លោក សុក សំអឿន និង លោក Niklas Femerstrand មិត្តភក្តិរបស់ លោក Svartholm Warg បានថ្លែងថា ពួកគាត់បានទៅស្ថានទូតស៊ុយអែត ក្នុងរាជធានីភ្នំពេញជាមួយគ្នា ដើម្បីសួរអំពីកន្លែង លោក Svartholm Warg កំពុងស្នាក់នៅ កាលពីសប្តាហ៍មុន ប៉ុន្តែមិនបានទទួលការឆ្លើយតបពីឯកអគ្គរដ្ឋទូតស៊ុយអែតទេ។ លោក សុក សំអឿន បានលើកឡើងថា អាជ្ញាធរកម្ពុជា និងស៊ុយអែត បានធ្វើឲ្យមានលក្ខណៈមិនច្បាស់រវាងពាក្យថាបត្យាប័ន និងនិរទេស ចំពោះ លោក Svartholm Warg។ លោក សុក សំអឿន បានឮថា លោក Svartholm Warg គឺនឹងត្រូវបញ្ជូនទៅស៊ុយអែត ប៉ុន្តែលោក បានចង្អុលបង្ហាញថា«ប្រសិនវាជាការនិរទេស គាត់គួរតែអាចទៅកន្លែងណាក៏បាន។ គាត់មិនចង់ទៅស៊ុយអែតទេ»។ លោក សុក សំអឿន និង លោក Femerstrand បានថ្លែងថា ដោយសារប្រើលេសថា ទិដ្ឋាការផុតការកំណត់ ដើម្បីនិរទេសគាត់ អាជ្ញាធរ បានធ្វើឲ្យគាត់មិនអាចទទួលបានការជំទាស់ទៅនឹងសេចក្តី សម្រេចរបស់តុលាការ ហើយនៅពេលជាមួយគ្នានោះ ពួកគេមិនបានផ្តល់ឲ្យគាត់ នៅមេធាវីត្រឹមត្រូវ ឬជម្រាបគាត់ថា ក្រោមការនិរទេស ដែលខុសពីបត្យាប័ន ហើយដែលសេចក្តីសម្រេចអំពីកន្លែងត្រូវទៅពីប្រទេសកម្ពុជាគឺ អាស្រ័យលើរូបគាត់។
លោក Femerstrand បានបន្ថែមថា វាមិនទាន់ច្បាស់នៅឡើយទេថា តើមិត្តភក្តិរបស់គាត់នៅទីបំផុតនឹងត្រូវទៅស៊ុយអែតឬអត់នោះ ទេ។ Femerstrand បានថ្លែងទៀតថា៖ «វាមិនមែនជាការភ្ញាក់ផ្អើលនោះទេ ប្រសិនបើមិត្តរបស់ខ្ញុំចាប់ផ្តើមតវ៉ានៅបាងកក ហើយបដិសេធមិនឡើងយន្តហោះទៅ»។ «នេះមិនមែនជាលើកទីមួយនោះទេ ដែលគាត់ ប្រឈមមុខទៅនឹងការដោះស្រាយបញ្ហាផ្លូវច្បាប់។ ពួកគេមិនអាចយកគាត់ទៅដោយស្រួលៗនោះទេ»។ PS
