 |
| កិច្ចប្រជុំរដ្ឋមន្ត្រីថាមពលអាស៊ាន លើកទី៣០ ក្រោមប្រធានបទ “ការតភ្ជាប់អាស៊ានបៃតង” ដែលព្រះរាជាណាចក្រកម្ពុជា ធ្វើជាម្ចាស់ផ្ទះ ត្រូវបានបើកជាផ្លូវការនៅព្រឹកថ្ងៃទី១២ ខែកញ្ញា ឆ្នាំ២០១២ នៅវិមានសន្ដិភាព ក្រោមអធិបតីភាពសម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា |
កិច្ចប្រជុំរដ្ឋមន្ត្រីថាមពលអាស៊ាន លើកទី៣០ ក្រោមប្រធានបទ “ការតភ្ជាប់អាស៊ានបៃតង” ដែលព្រះរាជាណាចក្រកម្ពុជា ធ្វើជាម្ចាស់ផ្ទះ ត្រូវបានបើកជាផ្លូវការនៅព្រឹកថ្ងៃទី១២ ខែកញ្ញា ឆ្នាំ២០១២ នៅវិមានសន្ដិភាព ក្រោមអធិបតីភាពសម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា
ភ្នំពេញ: កិច្ចប្រជុំរដ្ឋមន្ត្រីថាមពលអាស៊ាន លើកទី៣០ ក្រោមប្រធានបទ “ការតភ្ជាប់អាស៊ានបៃតង” ដែលព្រះរាជាណាចក្រកម្ពុជា ធ្វើជាម្ចាស់ផ្ទះ ត្រូវបានបើកជាផ្លូវការនៅព្រឹកថ្ងៃទី១២ ខែកញ្ញា ឆ្នាំ២០១២ នៅវិមានសន្ដិភាព ក្រោមអធិបតីភាពសម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។
សម្ដេចតេជោ ហ៊ុន សែន បានមានប្រសាសន៍ស្វាគមន៍ចំពោះរដ្ឋមន្ត្រី នៃបណ្ដាប្រទេសជាសមាជិកអាស៊ាន ដែលបានចូលរួមកិច្ចប្រជុំរដ្ឋមន្ត្រីថាមពលអាស៊ាន លើកទី៣០ ក្រោមប្រធានបទ “ការតភ្ជាប់អាស៊ានបៃតង” កិច្ចប្រជុំពាក់ព័ន្ធ និងវេទិការធុរកិច្ចថាមពលអាស៊ាន ឆ្នាំ២០១២ ដែលរៀបចំឡើងនៅរាជធានីភ្នំពេញ នាពេលនេះ។
សម្ដេច ហ៊ុន សែន បានលើកឡើងថា កិច្ចប្រជុំរដ្ឋមន្ត្រីថាមពលអាស៊ាននាពេលនេះ ឆ្លុះបញ្ចាំងអំពីកិច្ចខិតខំប្រឹងប្រែងរបស់យើងទាំងអស់គ្នា ក្នុងនាមជាសមាជិកអាស៊ាន ដើម្បីចូលរួមកាន់តែសកម្មទ្វេឡើង ក្នុងការបន្តពន្លឿនសមាហរណកម្មអាស៊ានមួយពេញលេញ ការពង្រឹងសន្តិសុខ និងស្ថិរភាពតំបន់ ការពង្រឹងកិច្ចទំនាក់ទំនងខាងក្រៅ ក៏ដូចជាការធានាបានមជ្ឈភាពរបស់អាស៊ាន ក្នុងនិម្មាបនកម្មតំបន់ដែលវិវឌ្ឍន៍ឥតឈប់ឈរ។
ជាមួយគ្នានេះ សម្ដេច ហ៊ុន សែន បានលើកឡើងបន្តថា យើងបានបង្កើតស្មារតីរួម គឺ ’អាស៊ាន សហគមន៍តែមួយ វាសនាតែមួយ” ដែលជាការគូសបញ្ជាក់ជាថ្មីមួយទៀត អំពីការប្ដេជ្ញាយកចិត្តទុកដាក់ដ៏មុតមាំ និងប្ដេជ្ញាចិត្តខាងនយោបាយ ក្នុងការបំពេញការងារទាំងក្នុងនាមជាសហគន៍រួមគ្នា ទាំងក្នុងនាមជាប្រទេសនីមួយៗរៀងៗខ្លួន ដើម្បីឆ្ពោះទៅសម្រេចជោគជ័យយ៉ាងពិតប្រាកដ ក្នុងការបង្កើតសហគមន៍អាស៊ាន និងប្រែក្លាយអាស៊ានឲ្យក្លាយទៅជាមហាគ្រួសារដ៏ជិតស្និទ្ធមួយ ដែលមានភាពសុខដុមទាំងផ្នែកនយោបាយ សន្ដិសុខ និងភាពសុខដុមសេដ្ឋកិច្ច និងសង្គមវប្បធម៌។
សម្ដេច ហ៊ុន សែន ក៏បានលើកឡើងផងដែរថា ក្នុងកិច្ចប្រជុំកំពូលអាស៊ាន ដែលបានប្រារព្ធធ្វើឡើងនៅព្រះរាជាណាចក្រកម្ពុជា នៅខែមេសា ឆ្នាំ២០១២ កន្លងទៅនោះ ប្រទេសសមាជិកអាស៊ានទាំងអស់បានរួមគ្នាពង្រឹងស្មារតីសាមគ្គីភាព និងការបង្កើនកិច្ចសហប្រតិបត្តិការឲ្យកាន់តែទូលំទូលាយថែមទៀត ក្នុងនោះ គំនិតផ្ដួចផ្ដើម និងកិច្ចសហប្រតិបត្តិការ ជាច្រើន ត្រូវបានជជែកពិភាក្សាគ្នា និងឈានដល់ការព្រមព្រៀងជាមួយគ្នា។ នៅក្នុងស្មារតីនេះ រួមជាមួយនឹងការងើបឡើងយ៉ាងឆាប់រហ័ស សម្រាប់តំបន់ ក្រោយវិបត្តិហិរញ្ញវត្ថុពិភពលោកនាពេលកន្លងទៅនេះ បានផ្ដល់ឱកាសសម្រាប់អាស៊ាន និងអាស៊ានបូកបី ក៏ដូចជាដៃគូដទៃទៀត ក្នុងការពង្រឹងកិច្ចសហប្រតិបត្តិការនឹងគ្នា និងជំរុញកិច្ចសមាហរណកម្មតំបន់ឲ្យកាន់តែស៊ីជម្រៅថែមទៀត ទាំងលើវិស័យហិរញ្ញវត្ថុ ពាណិជ្ជកម្ម វិនិយោគ កសិកម្ម ទេសចរណ៍ អប់រំ សុខាភិបាល និងការតភ្ជាប់ហេដ្ឋារចនាសម្ព័ន្ធរូបវ័ន្ត។ ប៉ុន្តែ ចំពោះមុខនេះ អាស៊ានបាននិងកំពុងតែជួបនូវបញ្ហាប្រឈមមួយចំនួនផងដែរ ទាំងកម្រិតសកល និងកម្រិតតំបន់ ជាពិសេសបញ្ហាសន្តិសុខស្បៀង ថាមពល និងគ្រោះមហន្តរាយធម្មជាតិជាដើម។
សម្ដេចនាយករដ្ឋមន្ត្រី ហ៊ុន សែន បានបញ្ជាក់ថា “ឈរនៅលើមូលដ្ឋានទាំងនេះ យើងអាចមើលឃើញថា ការតភ្ជាប់ក្នុងវិស័យថាមពល គឺជាផ្នែកមួយនៃការតភ្ជាប់ហេដ្ឋារចនាសម្ព័ន្ធរូបវ័ន្ត ដែលជាផ្នែកមួយនៃផែនការមេ ស្ដីពីការតភ្ជាប់អាស៊ាន ដែលបានអនុម័តដោយប្រមុខរដ្ឋ នៃបណ្ដាប្រជាជាតិអាស៊ីអាគ្នេយ៍ នៅក្នុងកិច្ចប្រជុំកំពូលអាស៊ានលើកទី១៧ នៅទីក្រុងហាណូល សាធារណរដ្ឋសង្គមនិយមវៀតណាម កាលពីខែតុលា ឆ្នាំ២០១០ កន្លងទៅនោះ។ ដូច្នេះ ការកំណត់ប្រធានបទ ការតភ្ជាប់អាស៊ានបៃតង នាពេលនេះ បានបង្ហាញពីការយកចិត្តទុកដាក់ខ្ពស់ លើការផលិត និងការប្រើប្រាស់ថាមពល ដែលកាត់បន្ថយជាអតិបរមានូវផលប៉ះពាល់ដល់បរិយាកាស បរិស្ថានធម្មជាតិ និងសង្គម និងបានរួមចំណែកសំខាន់ដល់ការកាត់បន្ថយការប្រែប្រួលអាកាសធាតុ”។
សម្ដេចបានបន្ថែមថា ក្នុងបរិការនេះដែរ សម្ដេចនាយករដ្ឋមន្ត្រី បានយល់ឃើញថា វិស័យថាមពលអាចមានជម្រើសមួយចំនួន ដែលជាការរួមចំណែកដល់ការកាត់បន្ថយការប្រែប្រួលអាកាសធាតុ និងការកាត់បន្ថយការបំភាយឧស្ម័នកាបូនិចនៅក្នុងបរិយាកាស ដែលយើងត្រូវយកចិត្តទុកដាក់ទាំងការផលិត ទាំងការផ្គត់ផ្គង់ និងការប្រើប្រាស់ថាមពលឲ្យមានប្រសិទ្ធភាព រួមទាំងការបង្កើនការប្រើប្រាស់កកើតឡើងវិញផងដែរ ដូចជា ថាមពលវារីអគ្គិសនី ថាមពលខ្យល់ ថាមពលពន្លឺព្រះអាទិត្យ ថាមពលកម្ដៅទឹកក្នុងដី ថាមពលជីយ៉ូបាយ ថាមពលជីវឧស្ម័ន និងថាមពលជីវឥន្ធនៈជាដើម។
សម្ដេចតេជោ បានបន្ថែមទៀតថា ម្យ៉ាវិញទៀតប្រធានបទនេះ ពិតជាបានចូលរួមចំណែកដល់កិច្ចខិតខំប្រឹងប្រែងរបស់បណ្ដាប្រទេសក្នុងតំបន់អាស៊ាន ដែលបានប្ដេជាបង្កើនសមាមាត្រការប្រើប្រាស់ថាមពលកកើតឡើងវិញឲ្យបាន ១៥ភាគរយ នៃអនុភាពតំឡើងសរុប នៅឆ្នាំ២០១៥ខាងមុខនេះ ដើម្បីចូលរួមថែរក្សាបរិស្ថាន។ ដូច្នេះយើងអាចវាយតម្លៃបានថា ការតភ្ជាប់បណ្ដាញបញ្ជូនថាមពលក្នុងតំបន់ ក៏ជាចំណែកមួយនៃការចូលរួមក្នុងបរិការថាមពលបៃតងផងដែរ។
សម្តេចតេជោ សែន បានឲ្យដឹងទៀតថា ទន្ទឹមនឹងទស្សនវិស័យនេះ យើងកត់សម្គាល់ឃើញថា ការផលិតឧបករណ៍បរិក្ខាសម្រាប់ផលិតថាមពលអគ្គិសនី ដោយថាមពលកកើតឡើងវិញ ដូចជា ផ្ទាំងកញ្ចក់ស្រូបពន្លឺព្រះអាទិត្យ ទួលប៊ីនខ្យល់ ទួលប៊ីនវារីអគ្គិសនី ឡត៍ជីយ៉ូម៉ាស និងសម្ភារៈសម្រាប់ផលិតថាមពលបៃតងមួយចំនួនទៀត នៅមានកម្រិតផ្នែកគុណភាព និងមានតម្លៃខ្ពស់នៅឡើយ។ ក្នុងន័យនេះ យើងទាំងអស់គ្នាគួរស្នើដល់បណ្ដាអ្នកផលិតត្រូវយកចិត្តទុកដាក់ឲ្យបានច្រើនថែមទៀត ក្នុងការសិក្សាស្រាវជ្រាវរិះរកមធ្យោបាយ ដើម្បីធ្វើឲ្យផលិតផលទាំងនោះ មានគុណភាព មានតម្លៃទាប និងមានភាពងាយស្រួលក្នុងការប្រើប្រាស់ ដើម្បីសម្រេចគោលដៅអភិវឌ្ឍន៍ប្រភពថាមពលបៃតងឲ្យមានការរីកចម្រើនឆាប់រហ័ស។ ម្យ៉ាងទៀត ការតភ្ជាប់ថាមពលបៃតង ក៏នឹងអនុវត្តផងដែរ ទៅលើការផ្ទេរបច្ចេកវិទ្យាថាមពលកកើតឡើងវិញ ពីប្រទេសដែលមានបច្ចេកវិទ្យា និងការអភិវឌ្ឍសេដ្ឋកិច្ចខ្ពស់ ដល់ប្រទេសក្នុងតំបន់អាស៊ាន ដែលមានបច្ចេកវិទ្យានៅមានកម្រិតនៅឡើយ។
សូមរម្លឹកថា រដ្ឋមន្ត្រីថាមពលអាស៊ាន ត្រូវជួបប្រជុំគ្នាបន្តរយៈពេលពេញមួយថ្ងៃទី១២ ខែកញ្ញា ឆ្នាំ២០១២ នៅសណ្ឋាគារកាំបូឌីយ៉ាណា ក្នុងរាជធានីភ្នំពេញ។ នៅថ្ងៃទី១៣ ខែកញ្ញា ឆ្នាំ២០១២ រដ្ឋមន្ត្រីថាមពលអាស៊ាន ក៏នឹងត្រូវជួបប្រជុំនឹងប្រទេសដៃគូអាស៊ាន និងកិច្ចពិភាក្សាធុរកិច្ចអាមេរិក-អាស៊ាន។ កិច្ចប្រជុំ នឹងបន្តរហូតដល់ថ្ងៃទី១៣ ខែកញ្ញា ឆ្នាំ២០១២។ រីឯនៅថ្ងៃទី១៤ ខែកញ្ញា ឆ្នាំ២០១២ ជាការវិលត្រឡប់របស់រដ្ឋមន្ត្រីថាមពលអាស៊ាន ប្រទេសដៃគូអាស៊ាន និងគណៈប្រតិភូ ចាកពីកម្ពុជា៕
