នៅក្នុងលិខិត ដាក់ទៅស្ថាប័នទាំងពីរនេះ បានលើកឡើងថា ពលរដ្ឋបឹងកក់ និងបុរីកីឡា សុំអន្តរាគមន៍ដើម្បីឲ្យរាជរដ្ឋាភិបាលកម្ពុជា ផ្ដល់ភាពយុត្តិធម៌ ដោយដោះលែងអ្នកស្រី យ៉ោម បុប្ផា សកម្មជនដីធ្លី និងជាតំណាងសហគមន៍បឹងកក់ ពីពន្ធនាគារព្រៃស និងបញ្ចប់ជម្លោះនៅតំបន់បឹងកក់ ដោយផ្ដល់ប្លង់កម្មសិទ្ធិ ដល់ពលរដ្ឋបឹងកក់ ដែលនៅសេសសល់ជាង ៦០ គ្រួសារ និងកំណត់ព្រំប្រទល់ដី ១២,៤៤ ហិកតា ឲ្យបានច្បាស់លាស់ តាមអនុក្រឹត្យរបស់សម្ដេចនាយករដ្ឋមន្ត្រី ហ៊ុន សែន។
ក្រុមអ្នកភូមិ ក៏បានទាមទារឲ្យដោះលែងអ្នកស្រី ទឹម សាក់មុន្នី តំណាងអ្នកភូមិបុរីកីឡា ដែលត្រូវបានតុលាការ ចោទប្រកាន់ និងឃុំខ្លួននៅពន្ធនាគារព្រៃសផងដែរ។
ខ្លឹមសារលិខិតបន្តថា ជាង ១ឆ្នាំហើយ ដែលអនុក្រឹត្យរបស់សម្ដេចនាយករដ្ឋមន្ត្រីបានចេញ ប៉ុន្តែពលរដ្ឋសហគមន៍បឹងកក់ មិនទាន់បានដឹងទីតាំង ដីទំហំ ១២,៤៤ ហិកតា នៅទីណានៅឡើយទេ។
សូមរម្លឹកថា អ្នកភូមិបឹងកក់ អ្នកស្រី យ៉ោម បុប្ផា ត្រូវបានតុលាការសម្រេចឃុំខ្លួន ពីបទ ប្រើអំពើហិង្សាដោយចេតនា វាយលើបុរសពីរនាក់ កាលពីថ្ងៃ៤ ខែកញ្ញា ឆ្នាំ២០១២។ ចំណែកអ្នកតវ៉ាដីធ្លីម្នាក់ទៀត នៅបុរីកីឡា គឺអ្នកស្រី ទឹម សាក់មុន្នី ក៏ត្រូវបានតុលាការក្រុងភ្នំពេញសម្រេចឃុំខ្លួន កាលពីព្រឹកថ្ងៃទី៥ ខែកញ្ញា ឆ្នាំ២០១២ តាមពាក្យបណ្តឹងរបស់ក្រុមហ៊ុន ផានអ៊ីម៉ិច ពីបទ ញុះញង់ឲ្យប្រព្រឹត្តបទឧក្រិដ្ឋ តាមរយៈការចូលរួមតវ៉ាក្នុងជម្លោះដីធ្លី ដែលក្រុមហ៊ុន និងអាជ្ញាធរ បានវាយកម្ទេចផ្ទះរបស់ពលរដ្ឋបុរីកីឡា កាលពីថ្ងៃទី៣ ខែមករា ឆ្នាំ២០១២។
ក្នុងរឿងចាប់ខ្លួនស្ត្រីទាំងពីររូបនោះ អង្គការសិទ្ធិមនុស្សជាច្រើន បានចេញសេចក្ដីថ្លែងការណ៍ដាច់ដោយឡែកពីគ្នា ជាបន្តបន្ទាប់ ដោយថ្កោលទោសនឹងការចាប់ខ្លួនស្ត្រីអ្នកភូមិបឹងកក់ និងបុរីកីឡាទាំងពីរ ហើយបានទាមទារឲ្យដោះលែងស្ត្រីទាំងពីរនាក់ ជាបន្ទាន់ និងគ្មានលក្ខខណ្ឌ។
ចំណែកក្រុមអ្នកភូមិ ក៏បានប្រមូលផ្តុំតវ៉ា និងដាក់ញត្តិទៅកាន់ស្ថានទូតនានា ព្រមទាំងសម្តេចហ៊ុនសែន និងដាក់ទៅកាន់លោកឧបនាយករដ្ឋមន្ត្រី សុខ អាន រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី ដើម្បីឲ្យអន្តរាគមន៍ដោះលែងស្ត្រីទាំងពីរនាក់ ចេញពីពន្ធនាគារព្រៃស។
យ៉ាងណាក៏ដោយ ក្នុងរឿងឃុំខ្លួនស្ត្រីអ្នកតវ៉ាដីធ្លីនៅបឹងកក់ និងនៅបុរីកីឡានេះ ត្រូវបានអាជ្ញាធរ និងមន្ត្រីតុលាការអះអាងថា មិនជាប់ពាក់ព័ន្ធនឹងការតវ៉ាដីធ្លីទេ តែជារឿងព្រហ្មទណ្ឌ ដែលស្ត្រីទាំងពីរបានប្រព្រឹត្តបទល្មើសប៉ុណ្ណោះ។
ក្នុងនោះ ក៏មានក្រុមអ្នកតវ៉ាផ្សេងទៀត បានទាមទារឲ្យតុលាការ ដាក់ទោសលើស្ត្រីបឹងកក់ ដែលត្រូវចាប់ខ្លួន ហើយប្រកាសថា រឿងនោះមិនពាក់ព័ន្ធនឹងជម្លោះដីធ្លី ដូចការលើកឡើងរបស់ពលរដ្ឋបឹងកក់ និងសង្គមស៊ីវិលឡើយ៕
