ខេត្ដព្រះសីហនុ ៖ នារីម្នាក់បានបើកទ្វាររថយន្ដកុងតឺន័រលោតទម្លាក់ខ្លួនចុះមកលើដី បណ្ដាលឱ្យស្លាប់ពេលបញ្ជូន ទៅសង្គ្រោះនៅមន្ទីរពេទ្យ។ ហេតុការណ៍ នេះបានកើតឡើងកាលពីវេលាម៉ោង៨យប់ថ្ងៃទី២៣ ខែកញ្ញា ឆ្នាំ២០១២ នៅចន្លោះបង្គោលគីឡូម៉ែត្រលេខ១៩៨-១៩៩ ស្ថិតក្នុងមូលដ្ឋានភូមិអូរឧកញ៉ា ហេង ឃុំអូរឧកញ៉ាហេង ស្រុកព្រៃនប់ ។
លោកសេង ចំរើន អធិការរងស្រុក ព្រៃនប់បានឱ្យដឹងថា ស្ដ្រីម្នាក់បានលោត ទម្លាក់ខ្លួនចេញពីរថយន្ដកុងតឺន័រម៉ាក ហ្វ៊ុយសូ ពាក់ស្លាកលេខ ភ្នំពេញ 3A- 0074 ពេលដែលរថយន្ដកំពុងបើកបរ ក្នុងទិសដៅពីខេត្ដព្រះសីហនុទៅរាជធានីភ្នំពេញ លើផ្លូវជាតិលេខ៤។ ពេលលោត ទម្លាក់ខ្លួនភ្លាមៗបណ្ដាលឱ្យស្ដ្រីរងគ្រោះ បែកមុខបែកមាត់ និងបានស្លាប់ពេល បញ្ជូនទៅដល់មន្ទីរពេទ្យ ។
មន្ដ្រីនគរបាលមូលដ្ឋានបានឱ្យដឹងថា ជនរងគ្រោះឈ្មោះ សុខ ស្រីមុំ អាយុ២៤ ឆ្នាំ ជាស្ដ្រីមេម៉ាយរស់នៅភូមិថ្មី សង្កាត់ លេខ៣ ក្រុងព្រះសីហនុ ខេត្ដព្រះសីហនុ។ ក្រោយពេលកើតហេតុ រថយន្ដនិង អ្នកបើកបរត្រូវបានសមត្ថកិច្ចឃាត់ខ្លួន ដើម្បីសួរនាំទាក់ទិននឹងករណីស្ដ្រីរងគ្រោះ ធ្វើអត្ដឃាតលោតសម្លាប់ខ្លួននេះ ។ នគរបាលបានឱ្យដឹងថា អ្នកបើកបររថយន្ដឈ្មោះ ឈុំ ប៊ុនឈឿន ភេទប្រុស អាយុ២៩ឆ្នាំ មានទីលំនៅភូមិ-ឃុំទួល ទទឹង ស្រុកព្រៃនប់ ខេត្ដព្រះសីហនុ ។
លោក សេង ចំរើន អធិការរងស្រុក បានឱ្យដឹងថា បន្ទាប់ពីសួរនាំអ្នកបើកបរ រថយន្ដនិយាយថា មុនពេលកើតហេតុ គាត់បានបើករថយន្ដចេញពីកំពង់ផែ ស្វយ័តក្រុងព្រះសីហនុឆ្ពោះទៅរាជធានី ភ្នំពេញ ដោយនៅលើរថយន្ដមានមនុស្ស ៣នាក់(អ្នកបើកបរ, ព្រូ និងស្ដ្រីរងគ្រោះ) ហើយនៅពេលកំពុងធ្វើដំណើរ រូបគាត់ និងស្ដ្រីរងគ្រោះបានជជែកគ្នាលេងនៅ តាមផ្លូវមិនចេះចប់ ។ ការជជែកគ្នា ឈានដល់ការដេញដោលអំពីអនាគត រវាងពួកគេទាំងពីរនាក់ ពីព្រោះថា ពួក គេស្រឡាញ់គ្នាជាង១ឆ្នាំមកហើយ ។
នៅពេលដែលស្ដ្រីរងគ្រោះនិយាយ អំពីអនាគតធ្វើឱ្យរូបគាត់(អ្នកបើកបរ)គាំងស្ញេញមិនអាចនិយាយអ្វីរួច ។ ពេល នោះស្ដ្រីរងគ្រោះទំនងជាខឹង ក៏ស្ទុះទៅ បើកទ្វាររថយន្ដដែលកំពុងបើកបរយឺតៗ លោតទម្លាក់ខ្លួនមកលើដីបណ្ដាលឱ្យរង របួសធ្ងន់ និងបានស្លាប់នៅមន្ទីរពេទ្យ ឯកជនវាលរេញ ។
លោកសេង ចំរើន បានឱ្យដឹងថា វត្ថុ តាងដែលមានរថយន្ដ និងអ្នកបើកបរ ក្រោយពីឃាត់ខ្លួនដើម្បីសួរនាំរួចត្រូវ បានដោះលែងឱ្យត្រឡប់ទៅវិញ ដោយ មានការឯកភាពពីលោកព្រះរាជអាជ្ញា អមសាលាដំបូងខេត្ដព្រះសីហនុ ៕(nokorwat)
