រាជធានីភ្នំពេញ ៖ តារាសម្តែងដែលចូលចិត្តបង្អួតដើមទ្រូងនាងកុល ដាវី បានត្រៀមខ្លួនរួចជាស្រេច ដើម្បីវេច សម្ពាយជិះយន្តហោះឆ្លងសមុទ្រទៅកាន់ប្រទេសកាណាដា ដើម្បីសម្តែង និងបង្អួតសម្រស់ឱ្យអាណិកជនខ្មែរដែលរស់នៅក្នុងទឹកដីដ៏ស៊ីវិល័យនេះបានឃើញដោយផ្ទាល់ជាលើកដំបូង ។
ការចាកចេញទៅសម្តែងឯក្រៅប្រទេសរបស់នាងកុល ដាវី នាពេលនេះ គឺជាឱកាសលើកដំបូងរបស់នាង បន្ទាប់ពីអាក់ខានក្នុងការចេញទៅសម្តែងនៅឯនាយសមុទ្រជាច្រើនឆ្នាំមកនោះ ។
តារាសម្តែងដែលចូលចិត្តបញ្ចេញដើមទ្រូងដ៏ទ្រលុកទ្រលន់រូបនេះបានប្រាប់កោះសន្តិភាពតាមទូរស័ព្ទនៅថ្ងៃទី១៤ កញ្ញា ២០១២ ថា គម្រោងចេញទៅសម្តែងនៅក្នុងប្រទេសកាណាដានេះ ជាការសម្រេចជាថ្មីរបស់នាង បន្ទាប់ពីកន្លងមកនាងបានធ្វើការបដិសេធក្នុងការចេញទៅសម្តែងនៅឯក្រៅប្រទេសនោះ ។ ការបដិសេធរបស់នាងនាពេលកន្លងមក គឺដោយយល់ថា ការងារនៅក្នុងស្រុកកំពុងតែមានការកាក់កបខ្លាំង ទើបមិនអាចដកឃ្លាបាន ។ នាងបន្តថា ទើបតែពេលនេះដោយសារការងារក្នុងស្រុកហាក់មានការធូរស្បើយបន្តិចនោះ ទើបនាងបានសម្រេចចិត្តទទួលយកការចេញទៅសម្តែងនៅឯបរទេសវិញម្តង ម្យ៉ាងដោយចង់ផ្លាស់ប្តូរបទពិសោធន៍ឱ្យបានច្រើនក្នុងការសម្តែងនៅក្រៅប្រទេស ។
នាងបញ្ជាក់ថា នាងនឹងចាកចេញទៅប្រទេសកាណាដានៅក្នុងខែតុលាខាងមុខនេះ ដោយមានការអមដំណើរដោយតារាចម្រៀងដែលចូលចិត្តបង្អួតដើមទ្រូងដែរនោះគឺនាងឆៃ លីដាឡែន ។ ការចេញទៅសម្តែងលើកនេះមានរយៈពេល២ខែតាមការស្នើសុំរបស់ម្ចាស់ឧបត្ថម្ភដើម្បីឱ្យអាណិកជនខ្មែរនៅទីនោះបានទស្សនាការសម្តែងដោយសប្បាយរីករាយ និងជួយរៃអង្គាសប្រាក់ជួយដល់កុមារកំព្រាដែលរស់នៅក្នុងប្រទេសកម្ពុជាផងដែរ ។
