ចោរឆក់កាបូប និស្សិត ស៊ីតិច អស់លក្ខណ៍ ជាប់អន្ទាក់ នគរបាលទួលគោក

ភ្នំពេញ ៖ មុខសញ្ញាឆក់កាបូប ម្នាក់ត្រូវកម្លាំង នគរបាលខណ្ឌ ទួលគោក និងកម្លាំងព្រហ្មទណ្ឌ រួមនិង កម្លាំង ប៉ុស្តិ៍សហការស្ទាក់ចាប់ បានភ្លាមៗនៅចំណុច ផ្លូវទេពផន កែងផ្លូវ២៦៥ ច្រក ចូលផ្សារសំណង់១២ សង្កាត់ ទឹកល្អក់ទី៣ ខណ្ឌទួលគោក កាលពីវេលាម៉ោង ១និង៤០នាទី រសៀលថ្ងៃទី១៨ ខែកញ្ញា ឆ្នាំ២០១២ គ្រាដែលជនសង្ស័យ ម្នាក់នេះរួមនិងបក្សពួក ម្នាក់ទៀតបានធ្វើ សកម្មភាព ឆក់កាបូប ប្រជាពលរដ្ឋ ម្នាក់មិនបានសម្រេច នៅក្បែររបងពេទ្យ លោកសង្ឃ សង្កាត់ ទឹកល្អក់ទី២ ។

លោក ហ៊ួត ចាន់យ៉ារ៉ាន់ អធិការនគរបាលខណ្ឌទួលគោក បាននិយាយថា ជនសង្ស័យឈ្មោះ ជួន ពិសិដ្ឋ អាយុ ២៤ឆ្នាំ ស្នាក់នៅ សង្កាត់ទំនប់ទឹក ខណ្ឌចំកាមន ត្រូវកម្លាំងសមត្ថកិច្ច ស្ទាក់ចាប់ បានភ្លាមៗ នៅកន្លែងកើតហេតុ បន្ទាប់ពីជនសង្ស័យម្នាក់ នេះបានធ្វើសកម្មភាព ឆក់កាបូប ឈ្មោះ រិទ្ធី ស៊ូលាន ភេទស្រី អាយុ១៨ឆ្នាំ ជានិស្សិត ឆ្នាំទី១នៅវិទ្យាស្ថាន ស៊ីតិច ស្នាក់នៅសង្កាត់ ស្ទឹងមានជ័យ គ្រាដែលសមត្ថកិច្ច កំពុងល្បាតតាមមូលដ្ឋាន ។

តាមចម្លើយបំភ្លឺពីជនរងគ្រោះនិងចម្លើយសារភាព ពីជនសង្ស័យបានឲ្យ សមត្ថកិច្ចដឹងថា ខណះដែលនារី រងគ្រោះ បានបើកម៉ូតូម៉ាក ស្កុបពី ពាក់ស្លាកលេខ ភ្នំពេញ 1BA-7921 តែម្នាក់ឯង ស្រាប់តែត្រូវជនសង្ស័យ ពីរនាក់ជិះម៉ូតូ ម៉ាកស្តេបពណ៌ខ្មៅ ពាក់ស្លាកលេខ ភ្នំពេញ 1AA-2984 មកក្បែរ បន្ទាប់មកក៏ធ្វើ សកម្មភាពឆក់ កាបូប នារីរងគ្រោះតែម្តង ប៉ុន្តែ គេចមិនរួច ត្រូវកម្លាំងសមត្ថកិច្ច ស្ទាក់ចាប់បានភ្លាមៗ ម្នាក់និងម្នាក់ទៀត ឈ្មោះ មឿន រត់គេចខ្លួន ។

ជនសង្ស័យម្នាក់នេះសមត្ថកិច្ចកំពុងសាកសួរនៅអធិការដ្ឋាននគរបាល ខណ្ឌទួលគោក ដើម្បីរៀបចំសំណុំរឿង បញ្ជូនទៅកាន់តុលាការ ចាត់ការតាមច្បាប់ ។ រីឯវត្ថុតាងម៉ូតូដែលរបស់ជនសង្ស័យត្រូវ បានសមត្ថកិច្ចរក្សាទុក នៅអធិការដ្ឋាន នគរបាលខណ្ឌ ទួលគោក ៕