 |
| លោកទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ |
នៅក្រៅសិក្ខាសាលា ស្តីពី ការត្រួតពិនិត្យឡើងវិញនូវការអនុវត្តន៍អនុសញ្ញា របស់អង្គការសហប្រជាជាតិ អ.ស.ប ប្រឆាំងអំពើពុករលួយ (UNCAC) នៅកម្ពុជា កាលពីព្រឹកថ្ងៃទី២៧ ខែកញ្ញា ឆ្នាំ២០១២ នៅសណ្ឋាគារ សូហ្វីតែល ភ្នំពេញ លោកទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ បានមានប្រសាសន៍ថា នៅថ្ងៃទី២៧ ខែកញ្ញានេះ គឺគណៈកម្មការនេះ បានបើកសិក្ខាសាលាលើកដំបូងរបស់ខ្លួន ដោយបានសហការជាមួយអង្គការ UNODC។ អង្គការនេះ នឹងជួយបំពាក់បំប៉នលើការងារថ្មីនេះ ដល់គណៈកម្មការរបស់យើង។
លោក ឱម យ៉ិនទៀង បានបន្តថា យើងស្វាគមន៍ទាំងអស់ ចំពោះការចូលរួមសហការរបស់អ្នកសារព័ត៌ទាំងអស់ ហើយថ្ងៃក្រោយក្រសួងសេដ្ឋកិច្ច និងហិរញ្ញវត្ថុ នឹងផ្ដល់រង្វាន់ដល់អ្នកសារព័ត៌មាន ដែលបានសរសេរនូវព័ត៌មានទាក់ទងនឹងការប្រឆាំងអំពើពុករលួយ។
ជាមួយគ្នានេះ លោក ប៉ែន សមិទ្ធិ ប្រធានក្លឹបអ្នកកាសែតកម្ពុជា បានមានប្រសាសន៍តាមទូរស័ព្ទនៅរសៀលថ្ងៃទី២៧ ខែកញ្ញានេះថា ក្លឹបអ្នកកាសែតកម្ពុជា ស្វាគមន៍ការដែលអង្គភាពប្រឆាំងអំពើពុករលួយ ដែលចាត់ទុកក្លឹបអ្នកកាសែតកម្ពុជា ជាដៃគូ ហើយយើងនឹងប្រឹងប្រែងធ្វើការងារប្រឆាំងអំពើពុករលួយ តាមវិជ្ជាជីវៈអ្នកកាសែត ដើម្បីឲ្យការប្រឆាំងអំពើពុករលួយនៅក្នុងសង្គមខ្មែរ បានផ្លែផ្កា។
រីឯលោក ឱម ចន្ទតារ៉ា ប្រធានសមាគមមិត្តអ្នកសារព័ត៌មានខ្មែរ បានមានប្រសាសន៍តាមទូរស័ព្ទដែរថា លោកមានការសប្បាយរីករាយ នៅពេលដែលអង្គភាពប្រឆាំងអំពើពុករលួយ ជ្រើសរើសសមាគមអ្នកសារព័ត៌មានចំនួនពីរ ដែលក្នុងនោះ មានសមាគមរបស់លោកផង ធ្វើជាដៃគូប្រយុទ្ធប្រឆាំងអំពើពុករលួយ។
លោកបញ្ជាក់ថា “យើងនឹងខិតខំសហការចូលរួមជាមួយនឹងអង្គភាពប្រឆាំងអំពើពុករលួយ ប្រឆាំងអំពើពុករលួយ ដើម្បីធ្វើឲ្យសង្គមមានតម្លាភាព”។
សូមបញ្ជាក់ថា លោកទេសរដ្ឋមន្ត្រីក៏បានបញ្ជាក់ថា នៅក្នុងរយៈពេល ៨ខែ ក្នុងឆ្នាំ២០១២ គិតត្រឹមខែមករាមក អង្គភាពប្រឆាំងអំពើពុករលួយរបស់រដ្ឋាភិបាល បានទទួលពាក្យបណ្តឹងរឿងពុករលួយ ចំនួន ៨០០ ពាក្យបណ្តឹង ដែលក្នុងនោះ ៥០% ជាបណ្តឹងអនាមិក។ ប៉ុន្តែអង្គភាពប្រឆាំងអំពើពុករលួយ ក៏បានបើកការស៊ើបអង្កេត ចំនួន ៣០% ផងដែរ៕ K
