ខេត្តឧត្ដរមានជ័យ ៖ កម្លាំងនគរបាលព្រហ្មទណ្ឌ អធិការដ្ឋាននគរបាលស្រុកអន្លង់វែង បានឃាត់ខ្លួនជនសង្ស័យ០៣នាក់ពីបទឆបោក នៅថ្ងៃទី២០ ខែកញ្ញា ឆ្នាំ២០១២ វេលាម៉ោង១៨ ដែលមានការសម្រេចពីលោក កូយ កាន់យ៉ា ព្រះរាជអាជ្ញា អមសាលាដំបូងខេត្តឧត្ដរមានជ័យ។
សមត្ថកិច្ចនគរបាលខេត្តប្រាប់ឲ្យដឹងថា ជនសង្ស័យ១-ឈ្មោះ អ៊ឹម សង្ហា ភេទប្រុស អាយុ៤៩ឆ្នាំ រស់នៅភូមិស្លក្រាម សង្កាត់ស្លក្រាម ក្រុងសៀមរាប ខេត្តសៀមរាប ២- ឈ្មោះ ម៉ឹក ហឿង ភេទប្រុស អាយុ២០ឆ្នាំ រស់នៅភូមិ ត្រពាំងស្រែ ឃុំត្រពាំងស្រែ ស្រុកមេសាង ខេត្តព្រៃវែង ៣-ឈ្មោះ នាង សំបូរ ភេទប្រុស អាយុ៧៧ឆ្នាំ រស់នៅភូមិស្រែណូយ ឃុំស្រែណូយ ស្រុកវ៉ារិន ខេត្តសៀមរាប។
ប្រភពខាងលើបន្តថា ជនសង្ស័យទាំង៣នាក់ បានក្លែងបន្លំជាអាចារ្យ ដើររៃអង្គាសបច្ច័យតាមភូមិនានាក្នុងស្រុកអន្លង់វែង ជាញឹកញាប់ហើយគ្មានឯកសារសំអាងច្បាស់លាស់ទេ។
ក្នុងការឃាត់ខ្លួននោះ សមត្ថកិច្ចធ្វើការដកហូតវត្ថុតាងរួមមាន លុយខ្មែរចំនួន ២៦៥០០០រៀល លុយបាត៤០បាត ទូរស័ព្ទដៃ៣ គ្រឿង នាឡិកាដៃ០២ គ្រឿង ម៉ូតូ០១គ្រឿង ៕(nokorwat)
