ខេត្តកណ្តាល ៖ ជនសង្ស័យជាឃាតករជនជាតិវៀតណាមដែលសម្លាប់ប្រពន្ធរបស់ខ្លួន ដោយសារតែប្រចណ្ឌ ហើយត្រូវបានប៉ូលិសខេត្តកណ្តាលចាប់ខ្លួនកាលពីម៉ោង២រសៀលថ្ងៃទី១៣ កញ្ញា បន្ទាប់ពីប៉ូលិសធ្វើការសាកសួរ និងកសាងសំណុំរឿងរួចនៅវេលាម៉ោង១២និង៣០នាទីរំលងអធ្រាត្រឈានចូលថ្ងៃទី១៤ កញ្ញា ជនសង្ស័យរូបនេះបានធ្វើអត្តឃាតដោយយកក្រណាត់រឹកកខ្លួន រួចជ្រមុជចូលអាងទឹកនៅក្នុងបន្ទប់ឃុំខ្លួនបណ្តោះអាសន្ននៅក្នុងស្នងការដ្ឋាននគរបាលខេត្ត ។
ជនសង្ស័យដែលធ្វើអត្តឃាតឈ្មោះង្វៀន យ៉ាំងជិន ភេទប្រុស អាយុ៣៧ឆ្នាំ ជនជាតិវៀតណាម មានមុខរបរជាអ្នកលក់អេតចាយ ស្នាក់នៅផ្ទះជួលម្តុំបឹងបាយ៉ាប ខណ្ឌសែនសុខ និងមានស្រុកកំណើតនៅខេត្តតៃនិញ ប្រទេសវៀតណាម ។ ការធ្វើអត្តឃាតរបស់ជនសង្ស័យនេះគឺដោយសារតែការគិតខ្លី និងយល់ពីទោសទណ្ឌរបស់ខ្លួន ឬអាចចាត់ទុកថា ជាការអន្ទងហៅរបស់ប្រពន្ធដែលរងគ្រោះផងដែរ ។
លោកឧត្តមសេនីយ៍ត្រី អា៊វ ចំរើន ស្នងការនគរបាលខេត្តកណ្តាលបានឱ្យដឹងថា ជនសង្ស័យដែលធ្វើអត្តឃាតនៅក្នុងបន្ទប់ឃុំខ្លួនបណ្តោះអាសន្នត្រូវបាននគរបាលប្រចាំការប្រទះឃើញស្លាប់កាលពីម៉ោង១២និង៣០នាទីរំលងអធ្រាត្រឈានចូលថ្ងៃទី១៤ កញ្ញា ដោយប្រើក្រណាត់រឹត.ក រួចជ្រមុជក្បាលក្នុងអាងទឹក ឱ្យថប់ដង្ហើមស្លាប់ ។ នេះបើតាមរបាយការណ៍របស់ប៉ូលិសបច្ចេកទេស និងវិទ្យាសាស្ត្រ និងគ្រូពេទ្យរបស់តុលាការខេត្ត ។ ក្រោយពីធ្វើកោសល្យវិច័យរួចនៅព្រឹកថ្ងៃទី១៤ កញ្ញា សពជនសង្ស័យត្រូវបានយកទៅបូជានៅវត្តចាក់អង្រែក្រោម ខណ្ឌមានជ័យ រាជធានីភ្នំពេញ ដោយមានការឯកភាពពីលោកវង្ស ប៊ុនវិសុទ្ធ ព្រះរាជអាជ្ញារងអមសាលាដំបូងខេត្តកណ្តាល ។ មុនពេលបូជាសពជនសង្ស័យប៉ូលិសបានព្យាយាមទាក់ទងស្រាវជ្រាវរកសាច់ញាតិ និងក្រុមគ្រួសារដែរ ប៉ុន្តែរកមិនឃើញ ទើបសម្រេចបូជាតែម្តងទៅ ។
គួររំលឹកថា ជនសង្ស័យឈ្មោះង្វៀន យ៉ាំងជិន ជនជាតិវៀតណាម អាយុ៣៧ឆ្នាំ ត្រូវបានប៉ូលិសព្រហ្មទណ្ឌកម្រិតធ្ងន់ និងកម្រិតស្រាលេខត្តសហការជាមួយប៉ូលិសខណ្ឌទួលគោកចាប់ខ្លួនកាលពីម៉ោង២រសៀលថ្ងៃទី១៣ កញ្ញា នៅខណ្ឌទួលគោក រាជធានីភ្នំពេញ ។ តាមចម្លើយសារភាពរបស់ជនសង្ស័យ គឺជននេះដូចជាបានដឹងពីទោសទណ្ឌរបស់ខ្លួនដែលបានប្រព្រឹត្ត និងមានគំនិតចង់ផឹកថ្នាំពុលដើម្បីសម្លាប់ខ្លួនផងដែរ ប៉ុន្តែមិនទាន់មានឱកាស ហើយក៏ត្រូវប៉ូលិសចាប់ខ្លួនតែម្តង ។ ពេលប៉ូលិសចាប់ខ្លួនបានជនសង្ស័យក៏បានសារភាពមិនលាក់លៀមឡើយ និងប្រាប់ប៉ូលិសថា ខ្លួនចង់តែស្លាប់មិនចង់ជាប់គុកទេ ទើបទីបំផុតជនសង្ស័យបានធ្វើអត្តឃាតទាល់តែបាន ។
តាមចម្លើយសារភាពរបស់ជនសង្ស័យឈ្មោះង្វៀន យ៉ាំងជិន មូលហេតុដែលនាំឱ្យគាត់សម្លាប់ប្រពន្ធរបស់ខ្លួនដោយសារតែប្រពន្ធឈ្មោះង្វៀន ធីហ្វឿង ដែលចេញផ្សាយលេខមុនឈ្មោះងៀង ភឿង អាយុ៣៧ឆ្នាំ នៅប្រទេសវៀតណាមបានក្បត់ចិត្តខ្លួនលួចមានប្រុសថ្មី ។ អ្វីដែលធ្វើឱ្យគាត់ខឹងខ្លាំងបំផុត ហើយដាច់ចិត្តសម្លាប់នោះ គឺដោយសារពេលគាត់ទូរស័ព្ទទៅរក នាងបានចំអកឱ្យគាត់ស្ទើរចុកឈាម ទើបបែកគំនិតសម្លាប់នាងចោល ។ តាមចម្លើយរបស់ជនសង្ស័យគឺគេបានប្រើលិ្បចកុហកប្រពន្ធថា គេទើបតែលក់អេតចាយបានចំណេញច្រើនឱ្យប្រពន្ធមកយកលុយពីគេ ពេលនោះ ប្រពន្ធបានឱ្យគេទៅទទួលនៅព្រំប្រទល់ច្រកក្អមសំណ ស្រុកលើកដែក ។
ក្រោយពីជួបគ្នា ហើយពួកគេទាំង២នាក់បានទៅលេងខេត្តព្រៃវែង រហូតដល់ថ្ងៃទី២៦ សីហា ក៏បានធ្វើដំណើរបំណងមកភ្នំពេញវិញ ដោយធ្វើដំណើរឆ្លងកាត់ភូមិសំរោងក្អែរ ឃុំសំរោងធំ ស្រុកកៀនស្វាយ គាប់ជួនដល់កន្លែងស្ងាត់ និងយប់ងងឹតផង គេក៏បានចាប់អូសដៃប្រពន្ធទៅក្បែរមាត់ប្រឡាយក្បែរបឹង ហើយវាយឱ្យដួល និងបានយកឈើស្រួចចាក់ជាច្រើនកន្លែងទៀត រួចអូសទម្លាក់ក្នុងប្រឡាយតែម្តង ។
ប៉ូលិសបានឱ្យដឹងថា សពជនរងគ្រោះត្រូវបានប្រទះឃើញកាលពីថ្ងៃទី២៨ សីហា ក្នុងប្រឡាយទឹក ហើយប៉ូលិសក៏បានទៅធ្វើកោសល្យវិច័យ និងធ្វើការស្រាវជ្រាវរហូតដល់កំណត់មុខសញ្ញាជនសង្ស័យឈានដល់ការចាប់ខ្លួនកាលពីរសៀលថ្ងៃទី១៣ កញ្ញា នៅខណ្ឌទួលគោក រាជធានីភ្នំពេញ ៕
