តារាចម្រៀង អឿន ស្រីមុំ និងស្វាមីក្រោយជាអាណិកជន។ សហការី
ភ្នំពេញៈ អ្នករស់នៅប្រទេសកាណាដា បានឲ្យដឹងថា តារាចម្រៀងម្ចាស់បទ «ពាក់អាវមិនដែលឃើញដោះ» អ្នកនាង អឿន ស្រីមុំ កំពុងរស់នៅទីក្រុងម៉ុងត្រេអាល់ មិនព្រមត្រឡប់មកប្រទេសកម្ពុជា ជាប្រទេសកំណើតវិញឡើយ ខណៈនៅពេលនេះ នាងទំនងកំពុងរស់នៅទីនោះដោយខុសច្បាប់។
តារាចម្រៀងល្បីបង្គួរ នាង អឿន ស្រីមុំ បានចេញទៅច្រៀងនៅប្រទេសកាណាដា កាលពីចុងឆ្នាំ២០១០ ហើយនាងមិនបានវិលត្រឡប់មកប្រទេសកម្ពុជាវិញតាមគម្រោងនោះឡើយ។ ការបោះទីតាំងសំចតរស់នៅប្រទេសធ្លាក់ព្រិលនោះ ត្រូវបានគេដឹងថា កើតឡើងក្រោយពេលតារាស្រីមេម៉ាយក្តៅស្រួយរូបនេះបានពើបប្រទះនឹង ចំណងស្នេហ៍ឆ្លងទ្វីបជាមួយនឹងអាណិកជនខ្មែររស់នៅប្រទេសកាណាដា ម្នាក់ ហើយនៅពេលនេះរូបនាង និងបុរសរូបនោះកំពុងរស់នៅក្រោមដំបូលផ្ទះតែមួយក្នុងនាមជាប្តី ប្រពន្ធរួចទៅហើយ ដោយនាងមិនបាននៅឈឺចិត្តស្អិតទ្រូង អាឡោះអាល័យស្នាមស្នេហ៍ជាមួយនឹងលោក កែវ សុខា អតីតប្តីមុននោះឡើយ។
គួរ បញ្ជាក់ថា អ្នកនាង អឿន ស្រីមុំ បានសម្រេចចិត្តលែងលះជាផ្លូវការជាមួយនឹងតន្ត្រីករលោក កែវ សុខា កាលពីឆ្នាំ២០០៧ បន្ទាប់ពីពួកគេបានរួមរស់ និងឆ្លងកាត់ការរស់នៅជាមួយគ្នាទាំងលំបាក និងសុខស្រួល អស់រយៈពេលជាង១០ឆ្នាំ។ ការលែងលះនោះ អឿន ស្រីមុំ បានចោទលោក កែវ សុខា ជាប្តីថាមិនចេះរកស៊ី គិតតែផឹក និងមានស្រីទៀត តែអ្នកស្គាល់តារារូបនេះបានឲ្យដឹងថាប្រហែលជាដោយសារកត្តាមិន មានកូនជាបញ្ហាគន្លឹះ។ តែផ្ទុយមកវិញ លោក កែវ សុខា បានចោទ អឿន ស្រីមុំ ថា នាងមានអ្នកថ្មីទើបបោះបង់រូបលោកចោល។
ការរស់នៅ យ៉ាងសុខសប្បាយជាមួយនឹងបុរសអាណិកជនខ្មែរកាណាដាមិនព្រមត្រឡប់មក ប្រទេសកំណើតរបស់តារារូបនេះ ត្រូវបានលោក ឃុន ដេវីត ម្ចាស់ស្ប៉នស័រនាំតារាចម្រៀងសម្តែងទៅសម្តែងច្រៀងនៅប្រទេសកាណាដា បានឲ្យដឹងថា តារាចម្រៀង អឿន ស្រីមុំ រស់នៅយ៉ាងសុខស្រួលនៅទីក្រុងម៉ុងត្រេអាល់ប្រទេសកាណាដា ជាមួយនឹងស្វាមីក្រោយរបស់នាងតាំងពីឆ្នាំ២០១០មក ប៉ុន្តែតារារូបនោះនាងមិនមានសិទ្ធិរស់នៅប្រទេសកាណាដាជាអចិន្ត្រៃយ៍បានទេ។
លោក ឃុន ដេវីត បានឲ្យដឹងថា៖«តារាចម្រៀងដ៏ពេញនិយមនាង អឿន ស្រីមុំ កំពុងរស់នៅជាមួយប្តីរបស់នាងនៅទីក្រុងម៉ុងត្រេអាល់នៅឡើយ គឺតាំងពីឆ្នាំ២០១០រហូតដល់ឥឡូវ ប៉ុន្តែនាងគ្មានសិទ្ធិរស់នៅជាអចិន្ត្រៃយ៍លើទឹកដីប្រទេសកាណាដានោះឡើយ»។
ម្ចាស់ ស្ប៉នស័ររូបនេះ បានបន្តថា៖«ស្រីមុំ បានប្រាប់មិត្តភក្តិនាងថា នាងនឹងចាកចេញពីកាណាដានៅខែមិថុនា ឆ្នាំ២០១២កន្លងទៅនេះ តែពេលនេះនាងកំពុងរស់នៅកាណាដានៅឡើយ»។
តាមរយៈសារអេឡិច ត្រូនិករបស់លោក ឃុន ដេវីដ ទស្សនិកជនបានគិតថា នេះមានន័យថា អ្នកនាង អឿន ស្រីមុំ សព្វថ្ងៃកំពុងរស់នៅលើទឹកដីកាណាដាខុសច្បាប់ តែអាចម្យ៉ាងទៀតគឺនាងរស់នៅដោយសារមានការធានាពីស្វាមីក្រោយ របស់នាង។
តាមរយៈការធានាចេញច្រៀងនៅក្រៅប្រទេស ហើយបែរជាគេចវេះមិនព្រមត្រឡប់មកប្រទេសកំណើតវិញនេះ ត្រូវបានគេមើលឃើញថាបានកើតឡើងជាញឹកញាប់សម្រាប់សិល្បករខ្មែរ ដែលបានបង្កផលវិបាកយ៉ាងខ្លាំងដល់អ្នកធានា។
អ្នកធានាសិល្បករ ខ្មែរចេញទៅសម្តែងច្រៀងនៅក្រៅប្រទេសធ្លាប់និយាយពីបញ្ហានេះថា ការធានាសិល្បករចេញក្រៅ ហើយមិនព្រមមកវិញនេះ បានធ្វើឲ្យពួក គេមានការពិបាកក្នុងការដោះស្រាយផ្នែកច្បាប់ ហើយនៅពេលពួកគេចង់ធានាអ្នកណាម្នាក់មកសម្តែងលើកក្រោយ នោះនឹងមិនងាយនឹងទទួលការអនុញ្ញាតពីស្ថានទូតឡើយ។
លោក ឃុន ដេវីដ បានឲ្យដឹងថា៖«នៅកាណាដា ឥឡូវមានតារាចម្រៀងខ្មែរជាច្រើនអាចរស់នៅជាអចិន្រៃ្តយ៍ ដូចជា នាង អ៊ិន លីដាលី វង់ សូលីនដា លីន ធីតា និងនាង សុភា ជាដើម»។
ដោយឡែក តារាចម្រៀង អឿន ស្រីមុំ មិនអាចទាក់សុំការបំភ្លឺបានទេ កាលពីម្សិលមិញ ខណៈទូរស័ព្ទក្រៅប្រទេសរបស់នាងមិនអាចទទួលការហៅចូលបាន។
ប៉ុន្តែ បើតាមរយៈអ្នករស់នៅកាណាដាបានឲ្យដឹងថា ក្រោយពេលលះលែងជាមួយស្វាមីនៅស្រុកខ្មែរ ហើយប្រទះស្នេហ៍ឯនាយសមុទ្រនោះ គេសង្កេតឃើញថា អឿន ស្រីមុំ កាន់តែស្រស់ស្អាត ដោយសារនាងស្រួលទាំងកាយសប្បាយទាំងចិត្ត ព្រោះមានស្វាមីជាអ្នកមានទ្រព្យ និងស្រឡាញ់ថ្នាក់ថ្នមនាងមិនឲ្យឃ្នើសចិត្តនោះ។
មិនខុសពីកាល រស់នៅស្រុកខ្មែរ អឿន ស្រីមុំ ក៏មិនបោះបង់អាជីពចម្រៀងដែរ ពោលគឺនាងនៅតែបន្តច្រៀង ភាគច្រើននៅចុងសប្តាហ៍ និងនៅពេលមានអ្នកសិល្បៈពីកម្ពុជាទៅសម្តែង៕
