ករណីនេះបានកើតឡើងនៅវត្តអង្គតាមត្រី ស្ថិតនៅឃុំគុស ស្រុកត្រាំកក់ ខេត្តតាកែវ នៅថ្ងៃទី១៨ កញ្ញា ២០១២ វេលាម៉ោង ១២ថ្ងៃត្រង់។
លោក អ៊ួន សុខុម អធិការរងស្រុកត្រាំកក់ បានអោយដឹងថា ករណីពុលមានមនុស្សស្លាប់ និងដឹកយកទៅសង្គ្រោះនៅខាងលើ គេសង្ស័យថា បណ្តាលមកពីពុលកាហ្វេច្រើនជាង ព្រោះថា នៅព្រឹកថ្ងៃកើតហេតុ មានស្រីចំណាស់ម្នាក់ឈ្មោះ កែវ ផន អាយុ ៧១ឆ្នាំ ជាអនិជនមកពីប្រទេសអាមេរិក មកធ្វើបុណ្យបញ្ចុះធាតុអោយចៅនៅវត្តកើតហេតុ។ ដោយមានរៀបចំចង្ហាន់មាន បាយ សម្ល ផ្លែឈើ ជាពិសេសគាត់បានឆុងកាហ្វេចែកអោយជនរងគ្រោះទាំងអស់ទៀតផង។
លោក អ៊ូន សុខុម បានអោយដឹងទៀតថា ជនរងគ្រោះទាំងអស់រួមមានឈ្មោះ ជួប តិត ភេទប្រុស អាយុ ៧៧ឆ្នាំ នៅភូមិពងទឹកខាងត្បូង ឃុំគុស ស្លាប់នៅលើសាលាឆាន់ ឈ្មោះ តុប ណុប ភេទប្រុស អាយុ៨០ឆ្នាំ នៅភូមិអង្គក្រឡាញ់ ឃុំគុស ពេលហូបបាយ និងកាហ្វេហើយដឹងថា អត់ស្រួលខ្លួន ក៏ឡើងជិះម៉ូតូដល់ផ្ទះក៏ដាច់ខ្យល់ស្លាប់ទៅ។ និងជនរងគ្រោះ ៨នាក់ដែលដឹក យកទៅសង្គ្រោះនៅមន្ទីរពេទ្យមានឈ្មោះ ម៉ិល ញ៉េន ភេទប្រុស អាយុ ៦៧ឆ្នាំ ឈ្មោះ ង៉ែត លិម ភេទប្រុស អាយុ ៧២ឆ្នាំ ឈ្មោះ ញិន ណន ភេទប្រុស អាយុ ៧៥ឆ្នាំ ឈ្មោះកែវ ផន ភេទស្រី អាយុ ៧១ឆ្នាំ អនិជនមកពីអារិមេរិក ឈ្មោះ សៅ គឹន ភេទប្រុស អាយុ៦៥ឆ្នាំ ឈ្មោះ ស្រី ម៉ៅ ភេទស្រី អាយុ ១០ឆ្នាំ និងឈ្មោះ យក្យ ប្រុស អាយុប្រុស អាយុ ២ឆ្នាំ។
លោកតាម្នាក់បាននិយាយថា មុនពេលកើតហេតុពួកគាត់នៅហូបជុំគ្នា បន្ទាប់មកយាយកែវ ជន ដែលមកពីអាមេរិក ធ្វើបុណ្យអោយចៅគាត់បាន ឆុងកាហ្វេ មានកាហ្វេកញ្ចប់ និងកាហ្វេឆុងហើយ អោយពួកគាត់ហូប ពេលហូបរូច ក៏មានអ្នកខ្លះពុល ក្នុងលក្ខណៈធ្ងន់ធ្ងរ រហូតស្លាប់ ចំណែករូបគាត់និងមនុស្ស ៦-៧នាក់ ក៏ពុលដែរ តែត្រូវដឹកយកទៅ សង្គ្រោះនៅមន្ទីរពេទ្យទាន់ពេលវេលា៕
