ប្រតិបត្តិការនេះ ដឹកនាំដោយលោក លី សុផាន់ណា ព្រះរាជអាជ្ញារងអមសាលាដំបូងរាជធានីភ្នំពេញ សហការជាមួយលោក សៅ ប៊ុនធឿន អនុប្រធានគណៈកម្មការអន្តរក្រសួង បង្ក្រាបបទល្មើសភាពយន្ត និងវីដេអូ ដោយមានការចង្អុលបង្ហាញពីលោក ឃឹម សារិទ្ធ រដ្ឋលេខាធិការក្រសួងវប្បធម៌ និងវិចិត្រសិល្បៈ។
លោក សៅ ប៊ុនធឿន អនុប្រធានគណៈកម្មការអន្តរក្រសួងបង្ក្រាបបទល្មើសភាពយន្ត និងវីដេអូ បានឲ្យដឹងថា ក្នុងប្រតិបត្តិការនេះ សមត្ថកិច្ចឆែកឆេររកឃើញឌីសថតចម្លងជាច្រើន ដែលមានលក់នៅក្នុងតូបជាច្រើនក្នុងផ្សារអូឡាំពិក។ លោកបានបន្តថា ការចុះបង្ក្រាបនេះ គឺដើម្បីណែនាំអប់រំអាជីវករកុំឲ្យទិញលក់ឌីសថតចម្លង ក្នុងគោលបំណងលើកស្ទួយវប្បធម៌ និងវិស័យសល្បៈ។
លោក សៅ ប៊ុនធឿន បន្តទៀតថា ឌីសថតចម្លងដែលសមត្ថកិច្ចបង្ក្រាបបាន សមត្ថកិច្ចបានយកទៅរក្សាទុកនៅក្រសួងវប្បធម៌ និងវិចិត្រសិល្បៈ៕
