តារាសម្តែងមុខកាត់ចិន អេឡិច ចាន់ត្រា បានឲ្យដឹងថា ការចេញទៅសម្តែងនៅប្រទេសកាណាលើកនេះ មានរយៈពេលមួយខែ។ ប៉ុន្តែលើកនេះ លោកចេញសម្តែងរួមគ្នា ជាមួយកំពូលតារាចម្រៀងដ៏ល្បីល្បាញដូចនេះ រឹតតែធ្វើឲ្យលោក កាន់តែទទួលបានប្រជាប្រិយភាពថែមមួយកម្រិតទៀត ហើយរូបលោក នឹងខិតខំ ក៏ដូចជារិះរកអ្វីដែលថ្មីៗ និងប្លែកៗ ដើម្បីសម្តែងជូនបងប្អូនខ្មែរ ដែលរស់នៅកាណាដា ទស្សនាកំសាន្ត។
តាមការគ្រោងទុក លោក អេឡិច ចាន់ត្រា នឹងដឹកដៃ កញ្ញា ឱក សុគន្ធកញ្ញា ឡើងយន្តហោះ ចាកចេញពីភ្នំពេញ នៅថ្ងៃទី២៣ ខែកញ្ញា ឆ្នាំ២០១២ ហើយនិងវិលត្រឡប់មកវិញ នៅថ្ងៃទី២៣ ខែតុលា ឆ្នាំ២០១២។
នេះជាលើកទី១ហើយ ដែលតារាវ័យ ២៤ ឆ្នាំ លោក អេឡិច ចាន់ត្រា ចេញទៅសម្តែង នៅប្រទេសកាណាដា។
កន្លងមក អេឡិច ចាន់ត្រា ធ្លាប់បានចេញទៅសម្តែងនៅក្រៅប្រទេស ដូចជា ប្រទេសអូស្ត្រាលី ចំនួន ៣ដង អាមេរិក និងប្រទេសបារាំង។
យ៉ាងណាក៏ដោយ ក្នុងដំណឹងទៅកាន់ប្រទេសកាណាដា នាចុងខែនេះ កាសែតបានរាយការណ៍ថា កញ្ញា ឱក សុគន្ធកញ្ញា នៅមិនទាន់សម្រេចចិត្តបែបណានៅឡើយទេ។
ជាមួយគ្នានោះ កាសែតក៏រាយការណ៍ថា កញ្ញា កុល ដាវី និងកញ្ញា ឆៃលី ដាលែន ក៏នឹងត្រូវចេញដំណើរទៅសម្តែងនៅប្រទេសកាណាដា នៅខែតុលាខាងមុខផងដែរ។ ប៉ុន្តែមិនមែនជាដំណើរសម្តែងរួមគ្នាជាមួយនឹងដៃគូចាស់របស់កញ្ញា ឆៃលី ដាលែន គឺលោក អេឡិច ចាន់ត្រា ដូចសព្វដងឡើយ៕
