លោកស្រីថ្លែងថា៖ «ខ្ញុំគិតថាភូមាមិនចាំបាច់ប្រកាន់ជាប់ចំពោះការដាក់ទណ្ឌកម្មដែលមិនចាំបាច់ នោះទេ ពីព្រោះខ្ញុំចង់ឲ្យប្រជាពលរដ្ឋភូមាមានការទទួលខុសត្រូវចំពោះជោគវាសនារបស់ខ្លួន ហើយមិនពឹងផ្អែកយ៉ាងខ្លាំងលើអ្នកខាងក្រៅខ្លាំងពេកទេ»។
លោក ស្រី ស៊ូជី ថ្លែងយ៉ាងដូច្នេះប្រាប់វីអូអេក្នុងទីស្នាក់ការកណ្តាលរបស់វីអូអេនៅក្នុងរដ្ឋធានីវ៉ាស៊ីនតោន នៅពេលលោកស្រីបំពេញទស្សនកិច្ចជាង២សប្តាហ៍ក្នុងរដ្ឋធានីវ៉ាស៊ីនតោន។
លោកប្រធានាធិបតីស.រ.អា. បារ៉ាក់ អូបាម៉ា កំពុងពិចារណាបន្ធូរបន្ថយការដាក់ទណ្ឌកម្មសេដ្ឋកិច្ចនិងទណ្ឌកម្មនានាលើប្រទេសភូមាប្រសិនបើស.រ.អា.មើល ឃើញថាភូមាធ្វើឲ្យរីកចម្រើនផ្នែកប្រជាធិបតេយ្យនិងសិទ្ធិមនុស្សដែលជាប់ប្រវត្តិដ៏អាក្រក់នោះ។
លោកស្រី អង់សានស៊ូជី ដែលទទួលជោគជ័យក្នុងការបោះឆ្នោតកាលពីដើម ទសវត្សរ៍ ១៩៩០នោះ ត្រូវរដ្ឋាភិបាលយោធាភូមាមិនផ្តល់អំណាចឲ្យលោកស្រី ហើយបានចាប់លោកស្រីឃុំក្នុងផ្ទះអស់រយៈពេល២០ឆ្នាំ។ លោកស្រី ស៊ូជីត្រូវបានដោះលែងឲ្យមានសេរីភាពឡើងវិញកាលពីឆ្នាំ២០១០។ លោកស្រី បានជាប់ឆ្នោតជាសមាជិកសភាក្នុងការបោះឆ្នោតពាក់កណ្តាលអាណតិថ្មីៗនេះ។
ទោះជាយ៉ាងណាក៏ដោយលោកស្រី បានអះអាងថា រដ្ឋាភិបាលភូមារបស់លោក ប្រធានាធិបតី ថេន សេន (Thein Sein) កំពុងកែទម្រង់ប្រទេសភូមាហើយ។ លោកស្រីបានថ្លែងសំដៅទៅលើកំណែទម្រង់ប្រជាធិបតេយ្យ និងការអនុវត្ត ច្បាប់ ព្រមទាំងការដោះលែងអ្នកទោសជាង៥០០នាក់ និងអ្នកនយោបាយ នៅថ្ងៃច័ន្ទ និងការដោះលែងជាបន្តបន្ទាប់ជាដើម។
លោកស្រី អង់សាន ស៊ូជី នៅព្រឹកថ្ងៃអង្គារនេះបានជួបជាមួយលោកស្រីរដ្ឋមន្ត្រី ការបរទេស ហ៊ីឡារី គ្លីនតុន ហើយគ្រោងនឹងជួបជាមួយសមាជិកព្រឹទ្ធសភា រដ្ឋសភាស.រ.អា. និងសហគមន៍ជនជាតិភូមាតាមបណ្តារដ្ឋមួយចំនួនជាបន្តបន្ទាប់ក្នុងដំណើរទស្សនកិច្ចជាង២សប្តាហ៍នៅស.រ.អា. ចាប់ផ្តើមពីសប្តាហ៍នេះ។ ពានរង្វាន់កិត្តិយសកំពូលៗជាច្រើនត្រូវគេគ្រោងនឹងផ្តល់ជូនលោកស្រី។ ក្នុងនោះមានរង្វាន់មេដាយមាសនៃសភាស.រ.អា.ផងដែរ។
ក្នុងបទសម្ភាសន៍ដដែលជាមួយវីអូអេ លោកស្រីអង់សាន ស៊ូជី បានអះអាងថាប្រទេសភូមាត្រូវការជំនួយជាច្រើនសម្រាប់វិស័យអប់រំនិងសុខាភិបាលផងដែរ៕
តើប្រិយមិត្តគិតថាស្ថានភាពកាន់តែបើកចំហនៅក្នុងប្រទេសភូមានឹងនាំទៅរកលទ្ធិប្រជាធិបតេយ្យពិតប្រាកដដែរឬទេ?(voa)
