ប៉ោយប៉ែត៖ស្ត្រីរងគ្រោះជាម្តាយនិងកូនស្រីបានរងបួសធ្ងន់ បន្ទាប់ពីជនសង្ស័យដែលត្រូវជាកូនប្រសានិងប្តីបាននាំបក្ខពួកមានគ្នា៥នាក់មកកាប់នៅផ្ទះស្ត្រីរងគ្រោះ កាលពីវេលាម៉ង៨និង៣០នាទីយប់ថ្ងៃទី១៥ ខែកញ្ញា ឆ្នាំ២០១២ ស្ថិតនៅម្តុំផ្លូវរថភ្លើង ភូមិក្បាលកោះ សង្កាត់ប៉ោយប៉ែត ខេត្តបន្ទាយមានជ័យ ។
ជនសង្ស័យបង្ករបួសស្នាមមានឈ្មោះរ៉ន ភេទប្រុស អាយុ២៧ឆ្នាំ និងបក្ខពួកមិនស្គាល់អត្តសញ្ញាណ មុខរបរមិនពិតប្រាកដ រស់នៅភូមិកើតហេតុជាមួយគ្នា ។ រីឯស្ត្រីរងគ្រោះមានឈ្មោះ អ៊ឹម ណេង អាយុ៥៨ឆ្នាំ ត្រូវជាម្តាយនិងឈ្មោះ ឆៃ លី អាយុ២២ឆ្នាំ ត្រូវជាកូននិងត្រូវជាប្រពន្ធជនដៃដល់ ។
តាមប្រភពពីសមត្ថកិច្ចបានឲ្យដឹងថា ជនដៃដល់និងស្ត្រីរងគ្រោះជាកូនបានលែងលះគ្នាជាង២ខែហើយ តែជនដៃដល់មិនអស់ចិត្តក៏នាំបក្ខពួកមកកាប់តែតម្តង ។ ប្រភពពីសមត្ថកិច្ចបានឲ្យដឹងទៀតថា ក្រុមជនដៃដល់ជាពួកញៀនថ្នាំទៀតផង ។
បច្ចុប្បន្នស្ត្រីរងគ្រោះត្រូវបានសមត្ថកិច្ចនាំយកទៅសង្រោះនៅមន្ទីរពេទ្យបង្អែកទាំងយប់ ។ ចំណែកជនដៃដល់និងបក្ខពួកសមត្ថកិច្ចកំពុងស្វែងរកចាប់ខ្លួន៕
