ភ្នំពេញ ៖
និស្សិតស្រីឈ្មោះប្រាក់ ពុទ្ធិការ ជាមិត្ដ ភក្ដិរបស់ជនរងគ្រោះបានប្រាប់ដើមអម្ពិល ថា មុនពេលកើតហេតុ ពួកគេមានគ្នាចំនួន ៥នាក់ ជិះម៉ូតូ៣គ្រឿង ចេញពីសាលាន័រតុន ទៅញ៉ាំអីនៅក្រោយវាំង រួចហើយក៏នាំគ្នាជិះម៉ូតូមកកាន់លំនៅឋានរបស់ខ្លួននៅកន្លែងកើតហេតុ ។ ពេលនោះ មិត្ដភក្ដិរបស់គេពីរនាក់ បានឡើងទៅលើផ្ទះ ដើម្បីផ្លាស់សំលៀកបំពាក់ទៅជប់លៀង រីឯ ៣នាក់ នៅចាំខាងមុខផ្ទះ មើលម៉ូតូ ។
និស្សិតស្រីរូបនេះបានបន្ដថា ភ្លាមៗនោះ ស្រាប់តែលេចមុខជនសង្ស័យពីរនាក់ ជិះម៉ូតូ មួយគ្រឿងស៊េរីទំនើបបានមកភ្ជង់នាង ហើយឆក់កាបូបនិងទូរស័ព្ទដៃម៉ាកអាយហ្វូន ហើយបន្ទាប់មកដោយឃើញមិត្ដភក្ដិរបស់នាងជាជនរងគ្រោះកំពុងនិយាយទូរស័ព្ទអាយហ្វូន ស្រាប់តែពួកវាបានទៅឆក់យក ប៉ុន្ដែដោយសារជនរងគ្រោះ មិនឱ្យមានការប្រតាយប្រតប់ ស្រាប់តែពួកវាបាញ់មួយគ្រាប់ បណ្ដាលឱ្យត្រូវភ្លៅខាងឆ្វេង ហើយត្រូវដឹកបញ្ជូនទៅកាន់មន្ទីរពេទ្យរុស្ស៊ី ។
យោងតាមនិស្សិតស្រីរូបនេះ ជនរងគ្រោះ ដែលជាមិត្ដភក្ដិរបស់នាង មានឈ្មោះជាតិ លីណា អាយុ២២ឆ្នាំ មានស្រុកកំណើតនៅខេត្ដព្រះសីហនុ ដោយឡែកជនសង្ស័យទាំងពីរ បានជិះម៉ូតូគេចខ្លួនបាត់ដោយសុវត្ថិភាព ខណៈដែលសមត្ថកិច្ចមូលដ្ឋានបានត្រឹមទៅហិតផ្សែងចោរតែប៉ុណ្ណោះ និងធ្វើកំណត់ហេតុពីជនរងគ្រោះទុកជូនមេរបស់ខ្លួន៕
