ខេត្តបាត់ដំបង ៖ បុរសម្នាក់ត្រូវសមត្ថកិច្ចឃាត់ខ្លួនកសាងសំណុំរឿងបញ្ជូនទៅតុលាការកាលពីព្រឹកថ្ងៃទី៩ កញ្ញា តាមបណ្តឹងរបស់នាងក្រមុំម្នាក់ប្តឹងចោទថា ជននេះបានព្យាយាមដោះដៃមិនទទួលខុសត្រូវ ក្រោយពីចាប់បង្ខំរួមមេត្រីជាមួយនាងរួច កាលពីយប់ថ្ងៃអាទិត្យ ចុងសប្តាហ៍មុននៅក្រោមផ្ទះរបស់នាង ស្ថិតក្នុងក្រុងបាត់ដំបង ខណៈនាងនៅផ្ទះម្នាក់ឯង ។
មន្ត្រីនគរបាលព្រហ្មទណ្ឌកម្រិតធ្ងន់បានឱ្យដឹងថា ជនត្រូវចោទឈ្មោះម៉ូច សាម៉ុល អាយុ២៦ឆ្នាំ នៅភូមិស្វាយជ្រុំ ឃុំអូរដំបង២ ស្រុកសង្កែ ។ ឯនាងក្រមុំរងគ្រោះអាយុ២០ឆ្នាំ ។ សមត្ថកិច្ចបញ្ជាក់ថា នារីរងគ្រោះបានអះអាងថា បុរសរូបនេះបានចាប់រំលោភនាងកាលពីវេលាម៉ោង៩យប់ថ្ងៃទី២ កញ្ញា នៅលើគ្រែក្រោមផ្ទះរបស់នាង ក្នុងគ្រាដែលនាងនៅផ្ទះជាមួយក្មួយប្រុសម្នាក់នាយប់នោះ ។ សមត្ថកិច្ចបន្ថែមថា នាងសម្រេចមកប្តឹងចោទជនសង្ស័យនោះក្រោយពីជននេះបដិសេធមិនទទួលខុសត្រូវ និងព្យាយាមគេចវេស បន្ទាប់ពីរួមមេត្រីជាមួយនាងរួច ។ ទោះបីបែបណាបន្ទាប់ពីទទួលបណ្តឹងសមត្ថកិច្ចក៏បានឃាត់ខ្លួនបុរសនេះនៅរសៀលថ្ងៃទី៧ កញ្ញា តែម្តងទៅ ។
