តារាចម្រៀងមិនទាន់មានផលិតកម្មនាង នឹល អារីយ៉ា។ រូបថត ស៊ូ វុទ្ធី
ភ្នំពេញៈ បើទោះជានៅមិនទាន់មានទ្រនំ ឬកេរ្តិ៍ឈ្មោះដ៏សមគួរនៅក្នុងសង្វៀនសិល្បៈក៏ដោយ តែតារាចម្រៀងរាងតូចច្រឡឹង វ័យ២០ឆ្នាំកញ្ញា នឹល អារីយ៉ា បានប្រៀបប្រដូចសំឡេងខ្លួនឯងទៅនឹងតារាចម្រៀងកូនកាត់ចិន នាង លី អ៊ីវ៉ាធីណា ហើយនាងក៏បានប្រាប់ពីមហិច្ឆតារបស់ខ្លួនថា ថ្ងៃណាមួយនឹងទទួលបានការរីកចម្រើនមិនខាននៅក្នុងការតស៊ូ ក្នុងរបត់ជាអ្នកសិល្បៈ។
ក្នុងជំនួបជាមួយភ្នំពេញ ប៉ុស្តិ៍ អារីយ៉ា បានរៀបរាប់ថា នាងជាកូនទី១ក្នុងចំណោមបងប្អូន២នាក់ ដែលមានឪពុកជាមន្រ្តីប៉េអឹម និងម្តាយជាអាជីវករ។ នាងបានបញ្ចប់ការសិក្សានៅត្រឹមថ្នាក់ទី១២ កាលពីឆ្នាំ២០១០-២០១១ ហើយពេលនេះ នៅមិនទាន់បានបន្តការសិក្សានៅសាលាណានៅឡើយនោះទេ។ កាលដែលនាងសម្រេចដកឃ្លាពីការសិក្សានេះ មិនមែនមានគំនាបពីខាងណានោះដែរ ពោលគឺនាងយកពេលវេលានេះមកជួយការងារផ្ទះជំនួសដៃជើងម្តាយ ព្រោះថា ក្រៅពីឪពុកទៅធ្វើការ និងប្អូនប្រុសទៅរៀនគឺមានតែនាងម្នាក់គត់ ដែលអាចជំនួសការងារលក់ដូរបាន ហើយនៅសល់ពេលវេលាគឺនាងហាត់ច្រៀង។
ដោយការតាំងចិត្តនិងមិន បោះបង់នូវមហិច្ឆតារបស់ខ្លួន នាងលើកឡើងថា៖«មាននិស្ស័យសិល្បៈចូលចិត្តចម្រៀងតាំងពីតូច ហើយក្តីប្រាថ្នាធំឡើងគឺចង់ក្លាយជាតារាចម្រៀង និងមានកេរ្តិ៍ឈ្មោះក្នុងឆាកសិល្បៈចម្រៀងដូចគេ ដូចឯងផងដែរ»។
ជា មួយនឹងអំនួតដ៏ម៉ាត់ៗ តារាចម្រៀងដែលទើបរំកិលកាយមកជិតឆាកតន្រ្តីយុវវ័យ កញ្ញា នឹល អារីយ៉ា ក៏បានប្រៀបប្រដូចសំឡេងនាងទៅនឹងតារាចម្រៀងដែលមានឈ្មោះនៅក្នុង ផលិតកម្មថោនម្នាក់ ដោយនាងអះអាងថា៖«តារាចម្រៀងដែលខ្ញុំយកធ្វើជានិមិត្តរូប និងគំរូសំឡេងនោះគឺតារាចម្រៀងកូនកាន់ចិន លី អ៊ីវ៉ាធីណា»។
ការ និយាយបែបនេះមិនមែនមានន័យថា នាងនៅមិនទាន់ស្គាល់ឆាកតន្រ្តីនោះទេ តារាចម្រៀងរាងតូចល្អិតសាច់សខ្ចីដែលចាត់ទុកការច្រៀងរាំសំខាន់ ជាងការសិក្សារូបនេះ បានលើកឡើងថា៖«ដ្បិតថា ពេលនេះ ទឹកដមចម្រៀងរបស់ខ្ញុំនៅមិនទាន់មានភាពទូលំទូលាយ ហើយមិនទាន់មានទ្រនំជ្រកជាក់លាក់ក៏ដោយ ប៉ុន្តែកន្លងមក ខ្ញុំក៏ធ្លាប់ឡើងច្រៀងក្នុងកម្មវិធីប្រគំតន្រ្តីចុងសប្តាហ៍ជា ញឹកញាប់ដែរ»។
នាងឲ្យដឹងថា កន្លងមកនាងធ្លាប់ឡើងច្រៀងជាតារាកិត្តិយសនៅទូរទស្សន៍ប៉ុស្តិ៍ លេខ៥ ទូរទស្សន៍ប៉ុស្តិ៍លេខ៣ និងចុងក្រោយទូរទស្សន៍ហង្សមាសហៅ ឡើងច្រៀងជាកិត្តិយស ហើយក្នុងសប្តាហ៍នេះនាងក៏ត្រូវបានកម្មវិធី មរតកតារា របស់ទូរទស្សន៍អប្សរាហៅឡើងជាតារាកិត្តិយសផងដែរ។
ទោះជាមាន ភាពត្រេកត្រអាលនឹងអាជីពចម្រៀងយ៉ាងនេះក្តី តែនាងតារាចម្រៀងតូចល្អិតរូបនេះ បែរជាប្រកាសខ្លួនមិនចង់ក្លាយជាតារារាត្រីចរនោះទេ ដោយនាងអះអាងថា បើទោះជាយ៉ាងណានាងមិនតោងយកកន្លែងលក់សំនៀងពេលរាត្រីឡើយ ក្រៅពីប្រាថ្នាចង់ក្លាយជាតារាម្នាក់ដែលមានទ្រនំត្រឹមត្រូវ។
មួយ រយៈចុងក្រោយនេះ ឱកាសឡើងបញ្ចេញទឹកដមសំនៀងរបស់តារារះថ្មី នឹល អារីយ៉ា ធ្វើឲ្យនាងហាក់រំកិលកេរ្តិ៍ឈ្មោះឡើងបានមួយកាំ។ ក្នុងទឹកចិត្ត ពោរពេញដោយភាពជឿជាក់នោះ តារាចម្រៀងមិនធ្លាប់ឆ្លងកាត់វគ្គប្រឡងសមត្ថភាពរូបនេះ ក៏បានប្រកាសដោយចំហថា ខ្លួននឹងខំប្រឹងប្រែងតស៊ូក្នុងដំណើរសិល្បៈរបស់ខ្លួន រហូតក្លាយជាតារាក្នុងដួងចិត្តទស្សនិកជន៕
