ក្រុង ប៊ែរឡាំងៈ បើយើងមើលទៅឃើញវាហាក់ដូចជាការយករថយន្តក្រុងជាច្រើនមកដាក់ បន្តគ្នាអ៊ីចឹង។ នៅសប្តាហ៍នេះគេឃើញមានរថយន្តក្រុងមួយប្រភេទដែលគេហៅថា AutoTram Extra Grand ត្រូវបានគេដាក់បង្ហាញនៅប្រទេសអាល្លឺម៉ង់។ នេះជាប្រភេទរថយន្តក្រុងដែលវែងជាងគេបំផុតនៅលើពិភពលោក។
រថយន្ត ត្រូវបានក្រុមហ៊ុនមួយនៃវិទ្យាស្ថានបច្ចេកវិទ្យាចរាចរណ៍ និងប្រព័ន្ធហេដ្ឋារចនាសម្ព័ន្ធ ហ្វ្រូនហូហ្វឺរ របស់អាល្លឺម៉ង់បានផលិតឡើង។ រថយន្តនេះមានប្រវែង៣០,៧ម៉ែត្រមានដៃចង្កូតបួន និងអាចដាក់អ្នកដំណើរបានរហូតដល់២៥៦នាក់ឯណោះ។
រថយន្តដ៏វែង មួយនេះត្រូវបានគេយកមកបង្ហាញនៅឯភាគខាងកើតនៃទីក្រុងដ្រេសដិន នៅសប្តាហ៍នេះ ខណៈវានឹងត្រូវគេអនុញ្ញាតឲ្យយកមកបម្រើសម្រាប់សេវាកម្មដឹក ជញ្ជូនក្នុងស្រុកនាពេលឆាប់ៗនេះ។ ជាមួយគ្នានោះ គេបានដឹងថា អាជ្ញាធរទីក្រុងប៉េកាំង និងស៊ាងហៃ បានបញ្ជាទិញវារួចហើយដែរ ខណៈរថយន្តក្រុងមួយគ្រឿងតម្លៃ១០លានដុល្លារ។
នេះក៏ជាដំណឹង ល្អមួយសម្រាប់អ្នកបរិស្ថាននិយមដែរ ក្នុងករណីយន្តការីខិតខំបង្កើតឲ្យមានរថយន្តក្រុងដ៏វែងនេះបាន ដោយប្រើថាមពលចរន្តអគ្គិសនីនោះ។
លោក ម៉ាទីស ក្លីងណឺ នាយកវិទ្យាស្ថាន ខាងលើបាននិយាយថា៖«នេះគឺជាការវិនិយោគមួយដែលបានចំណាយពេលវេលា យ៉ាងយូរ ហើយវាជាប្រភេទរថយន្តប្រើប្រព័ន្ធកុំព្យូទ័រប្រកបដោយប្រសិទ្ធភាព ខ្ពស់ក្នុងការវិភាគរកទិន្នន័យនៃគម្រោងបង្កើតវាឡើង»។
ប្រភេទ រថយន្តក្រុង AutoTram នេះមិនត្រឹមតែអាចចរាចរបានលើផ្លូវជាតិដ៏វែងអន្លាយមួយមុខ ប៉ុណ្ណោះទេ តែវាថែមទាំងចរាចរលើផ្លូវទំហំត្រឹម១២ម៉ែត្រនៅក្នុងក្រុងបាន ទៀតផង។
វាហាក់ដូចជាបណ្តាញរថភ្លើងដឹកអ្នកដំណើរមួយខ្សែតូច អ៊ីចឹង។ រថយន្តក្រុងនេះបានកែច្នៃឡើងដោយប្រើចរន្តអគ្គិសនី ដោយអាចបញ្ចូលថ្មពេលអស់ក៏បាន។
ចំណែកអ្នកបើករថយន្តនេះវិញ មិនចាំបាច់មានប័ណ្ណបើកបរអ្វីឲ្យច្បាស់លាស់នោះទេ ដោយសារតែវាត្រូវបានគេបង្កើតប្រព័ន្ធកុំព្យូទ័រជាមួយនឹងដៃ ចង្កូតរបស់វាស្រាប់ផងដែរ។
ទោះវាជារថយន្តក្រុងដ៏វែងជាងគេ នៅលើលោកក្តី តែគេដឹងថា នឹងមានក្រុមហ៊ុនផលិតរថយន្តក្រុងរបស់ចិន China's New Liner Series បង្កើតរថយន្តក្រុងមានកន្លែងអង្គុយចំនួន៣០០កៅអីប្រវែង២៥ម៉ែត្រ ដែរ៕ PR(POSTKHMER)
