ខេត្ដកណ្ដាល ៖ យុវជនម្នាក់បានស្លាប់ភ្លាមៗនៅនឹងកន្លែងកើតហេតុ និងនារីជាគូសង្សារបានរងរបួសធ្ងន់ត្រូវបាន ដឹកតាមរថយន្ដយកទៅសង្គ្រោះនៅមន្ទីរពេទ្យកាលពីវេលាម៉ោង៣និង៣០រសៀលនាទី ថ្ងៃទី១ ខែកញ្ញា ឆ្នាំ២០១២ បន្ទាប់ពីអ្នកទាំង២ជិះម៉ូតូឌុបគ្នាត្រឡប់មកពី ដើរកម្សាន្ដនៅរមណីយដ្ឋានទន្លេបាទីវិញ ហើយត្រូវរថយន្ដISUZUដឹកអ្នកដំណើរបើកបុកចំពីមុខពេញមួយទំហឹងនៅ តាមបណ្ដោយផ្លូវជាតិលេខ២ ស្ថិតក្នុង ភូមិអង្គុញ ឃុំសៀមរាប ស្រុកកណ្ដាលស្ទឹង ខេត្ដកណ្ដាល ។ ក្រោយពីបើករថយន្ដបុកម៉ូតូបណ្ដាលឱ្យមានមនុស្ស ស្លាប់ និងរងរបួសរួចមក អ្នកបើករថយន្ដមិនបានឈប់ទទួលខុសត្រូវទេ ហើយថែមទាំងបានបើករត់គេចទៅ ឈប់ទុករថយន្ដចោលនៅឯស្រុកបាទី ខេត្ដតាកែវ ។
មន្ដ្រីនគរបាលចរាចរស្រុកកណ្ដាលស្ទឹងបានឱ្យដឹងថា យុវជនរងគ្រោះដែល ត្រូវរថយន្ដបុកស្លាប់ភ្លាមៗនៅកន្លែង កើតហេតុនោះឈ្មោះ នួន បូរ៉ា ភេទ ប្រុស អាយុ១៩ឆ្នាំ ជាអ្នកបើកបរម៉ូតូ ១គ្រឿងម៉ាកហុងដាឌ្រីមស៊េរីឆ្នាំ២០០៨ ពណ៌ខ្មៅ ពាក់ស្លាកលេខកណ្ដាល 1J- 9368 និងគូសង្សារដែលរួមដំណើរជា មួយមានឈ្មោះ ចម រស្មី អាយុ១៧ឆ្នាំ រងរបួសធ្ងន់ អ្នកទាំង២មានទីលំនៅភូមិ សារិកាកែវ ឃុំសារិកាកែវ ស្រុកល្វឯម ខេត្ដកណ្ដាល ។
មន្ដ្រីនគរបាលដដែលបានបន្ដថា រថយន្ដបង្កហេតុម៉ាក ISUZU មួយបាំងកន្លះ ពណ៌ទឹកប្រាក់ ពាក់ស្លាកលេខភ្នំពេញ ង-៩៨៥៣ ភ.ព២ អ្នកបើកបរ មិនស្គាល់អត្ដសញ្ញាណ ក្រោយពេលកើតហេតុបានបើករថយន្ដគេចទៅចត ចោលនៅស្រុកបាទី ខេត្ដតាកែវ ។
មន្ដ្រីនគរបាលដដែលបានបន្ដទៀតថា នៅមុខពេលមានគ្រោះថ្នាក់ចរាចរ នេះកើតឡើងគេបានឃើញម៉ូតូ១គ្រឿងម៉ាកហុងដាឌ្រី បើកបរដោយយុវជន ម្នាក់ និងមាននារីម្នាក់រួមដំណើរជាមួយ បានជិះតាមបណ្ដោយផ្លូវជាតិលេខ២ក្នុងទិសដៅពីត្បូងទៅជើង (ពីខេត្ដតាកែវ មកក្រុងតាខ្មៅ)បើកដោយល្បឿនលឿន។ លុះបើកមកដល់ចំណុចកើតហេតុក៏ មានរថយន្ដ១គ្រឿងម៉ាក ISUZU បើក ពីជើងទៅត្បូងដោយល្បឿនលឿន មក ដល់ដែរហើយបានរេចង្កូតមកបុកម៉ូតូ ឌ្រីមនៅខាងស្ដាំដៃចំពីមុខពេញមួយទំហឹង លាន់ដូចរន្ទះ បណ្ដាលឱ្យអ្នកបើកបរម៉ូតូ និងអ្នករួមដំណើរជាមួយខ្ទាតពីកន្លែង កើតហេតុជាច្រើនម៉ែត្រ ។ ក្នុងនោះឱ្យអ្នកបើកបរម៉ូតូបោកក្បាលនឹងផ្លូវជាតិស្លាប់មួយរំពេច រីឯអ្នករួមដំណើរជាមួយ រងរបួសយ៉ាងធ្ងន់ធ្ងរ ។
មន្ដ្រីនគរបាលបានបញ្ជាក់ថា ក្រោយពីមានហេតុការណ៍កើតឡើងបណ្ដាលឱ្យមានមនុស្សស្លាប់និងរងរបួសរួចមក អ្នកបើកបររថយន្ដបង្ករហេតុមិនបានឈប់មើលទេ ដោយបន្ថែមល្បឿនបើករថយន្ដគេច តាមបណ្ដោយផ្លូវជាតិលេខ២ រត់គេចសំដៅទៅស្រុកបាទី ។ បន្ទាប់ពីកើតហេតុរួចមកជនរងគ្រោះត្រូវបាន ដឹកតាមរថយន្ដយកទៅសង្គ្រោះនៅមន្ទីរពេទ្យ ហើយសាកសពជនរងគ្រោះសមត្ថកិច្ចបានទាក់ទងទៅក្រុមគ្រួសារ ដើម្បី មកទទួលយកធ្វើបុណ្យ ។
ម៉ូតូនិងរថយន្ដត្រូវសមត្ថកិច្ចបញ្ជូនមកអធិការដ្ឋាននគរបាលស្រុកកណ្ដាលស្ទឹងចាត់ការតាមនីតិវិធី ។ ចំពោះករណីនេះនគរបាលចរាចរអះអាងថា កើតឡើង ដោយការបើកបរខ្វះការប្រុងប្រយ័ត្ន ៕(NOKORWAT)
