ទិដ្ឋភាពប្រាសាទអង្គរវត្តរបស់ខ្មែរ ដែលមានភាពល្បីល្បាញនៅទូទាំងពិភពលោក។ រូបថត ហេង ជីវ័ន
ភ្នំពេញៈ អាជ្ញាធរអប្សរា និងអង្គការយូណេស្កូ ប្រចាំកម្ពុជា បានចុះហត្ថលេខា លើកិច្ចព្រមព្រៀង ស្តីពីការបន្តគាំពារប្រាសាទអង្គរវត្ត ក្នុងទំហំទឹកប្រាក់ ២៥ ម៉ឺនដុល្លារអាមេរិក សម្រាប់ផ្តោតទៅលើការជួសជុលគូទឹក នៅព័ទ្ធជុំវិញប្រាសាទ។
ការចុះហត្ថលេខា ត្រូវបានធ្វើឡើង រវាងលោកឧបនាយករដ្ឋមន្ត្រីសុខ អាន រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានអាជ្ញាធរអប្សរា ជាមួយលោកស្រី Anne Lemaistre តំណាងអង្គការយូណេស្កូប្រចាំកម្ពុជា កាលពីម្សិលមិញ លើគម្រោងការវគ្គទី ២ ដែលផ្តោតទៅលើការជួសជុល និងថែរក្សាគូទឹកព័ទ្ធជុំវិញប្រាសាទ ដែលជាបេតិកភណ្ឌពិភពលោក។
លោក សាស្ត្រាចារ្យ Valter Mar Santoro ប្រធានបេសកកម្មបច្ចេកទេស របស់ប្រទេសអ៊ីតាលី លើការថែទាំថ្មប្រាសាទ ថ្លែងថា នេះជាកិច្ចសហប្រតិបត្តិការ របស់ក្រុមអ្នកជួសជុលនៃប្រទេសអូស្ត្រាលី និងកម្ពុជា ក្នុងការជួសជុលថែរក្សានូវកន្លែងទ្រុឌទ្រោម នៃប្រាសាទអង្គរវត្ត។
លោក សុខ អាន បានថ្លែងក្រោយការចុះហត្ថលេខានេះថា នេះជាគម្រោងនៃការគាំពារប្រាសាទអង្គរវត្ត របស់រដ្ឋាភិបាលអូស្ត្រាលី ក្នុងទឹកប្រាក់ ២០ ម៉ឺនដុល្លារ និងរដ្ឋាភិបាលកម្ពុជា ដែលផ្តល់ដល់អាជ្ញាធរអប្សរាចំនួន ៥ ម៉ឺនដុល្លារ។ លោកបន្តថា ៖ «នេះជាការជួសជុល នៃកាំជណ្តើរ គូទឹក ជុំវិញប្រាសាទអង្គរវត្ត ដែលមានប្រវែង ៥,៦ គីឡូម៉ែត្រ»។ លោកសុខ អាន បានឲ្យដឹងថា ប្រទេសអូស្ត្រាលី បានជួយតាមរយៈអង្គការយូណេស្កូ ដល់ការថែទាំតំបន់អង្គរវត្ត តាំងពីឆ្នាំ១៩៩៤ មក ក្នុងនោះមានគម្រោងថែទាំប្រាសាទប្រែរូបតាំងពីឆ្នាំ១៩៩៤មានទឹក ប្រាក់ប្រមាណ ២ លានដុល្លារ។ លោកថ្លែងថា៖ «នេះជាការឆ្លុះបញ្ចាំងឲ្យឃើញ ពីកិច្ចសហប្រតិបត្តិការដ៏ជិតស្និទ្ធ និងការគាំទ្រជានិច្ច ក្នុងកិច្ចគាំពារតំបន់អង្គរវត្ត ក៏ដូចជារួមចំណែក ដល់ការអភិវឌ្ឍសង្គម សេដ្ឋកិច្ច នៃប្រទេសកម្ពុជា»។
បើតាមលោក សុខ អាន តាំងពីមានការបង្កើតគណៈកម្មការសម្របសម្រួលអន្តរជាតិសម្រាប់ កិច្ចគាំពារ និងអភិវឌ្ឍន៍តំបន់ប្រវត្តិសាស្ត្រអង្គរ (ICC-Angkor) ពីឆ្នាំ ១៩៩៣ មក មានប្រទេសចំនួន ១៤ និងអង្គការចំនួន ២៨ បានអនុវត្តកិច្ចគាំពារតំបន់អង្គរ លើគម្រោងការចំនួនជាង៦០ រួចមកហើយ។
លោកស្រី Anne Lemaistre តំណាងអង្គការយូណេស្កូ នៅកម្ពុជា ថ្លែងថា អាជ្ញាធរអប្សរាបានរួមចំណែកជាច្រើន ដល់ការជួយគាំពារ ប្រាសាទអង្គរ និងតំបន់អង្គរ ដែលក្នុងនោះ បានដើរតួជាដៃគូ ជាមួយអង្គការយូណេស្កូ ក្នុងការផ្តល់នូវអ្នកជំនាញកម្ពុជាជាច្រើនរូប លើកិច្ចការគម្រោងគាំពារប្រាសាទ។
លោកស្រីថ្លែងថា៖ «នេះសបញ្ជាក់ឲ្យឃើញ ពីភាពជាម្ចាស់កម្មសិទ្ធិរបស់កម្ពុជា ជាមួយនឹងជំនាញការជាតិកម្ពុជា ដែលត្រូវបានបណ្តុះបណ្តាល តាមរយៈកិច្ចខិតខំប្រឹងប្រែង ក្នុងការពង្រឹងសមត្ថភាព ជាលក្ខណៈអន្តរជាតិ។ អង្គការយូណេស្កូ មានមោទនភាព ក្នុងការធ្វើជាដៃគូ ជាមួយគ្នា»។
លោកឧបនាយករដ្ឋមន្ត្រី ក៏បានប្រកាស នូវការរៀបចំខួបលើកទី ២០ ឆ្នាំ នៃការចុះបញ្ជីប្រាសាទអង្គរវត្ត ក្នុងបេតិកភណ្ឌពិភពលោក នាខែធ្នូ ឆ្នាំ២០១២ និងការត្រៀមខ្លួនធ្វើជាម្ចាស់ផ្ទះក្នុងការរៀបចំនូវកិច្ចប្រជុំ លើកទី ៣៧ នៃគណៈកម្មាធិការបេតិកភណ្ឌពិភពលោក នាឆ្នាំ២០១៣ ខាងមុខនេះ៕
