.jpg)
ខេត្តប៉ៃលិន ៖ ចោរមួយក្រុមមានគ្នា៣នាក់ប្រដាប់ដោយកាំភ្លើងខ្លី៣ដើម បានធ្វើសកម្មភាពចូលប្លន់ផ្ទះលក់ចាប់ហួយនៅភូមិអូររអិល យកគ្រឿងអលង្ការនិង លុយមួយចំនួន សរុបអស់ជាង៥លានរៀល គេចខ្លួនបាត់ដោយសុវត្ថិភាព ។
ហេតុការណ៍នេះបានកើតឡើងកាលពីវេលាម៉ោង១៩ និង២០នាទីយប់ថ្ងៃទី៨ ខែកញ្ញា ឆ្នាំ២០១២ នៅផ្ទះប្រជាពលរដ្ឋមួយកន្លែងត្រង់ចំណុចខាងលិចខ្លោងទ្វារចូលសាលាបឋមសិក្សាអូររអិល ចំងាយប្រហែល៥០ម៉ែត្រ ក្នុងភូមិអូរអិល ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
លោក ឆម វ៉ាន់ធី នាយការិយាល័យព្រហ្មទណ្ឌកំរិតធ្ងន់នៃស្នងការនគរបាលខេត្តប៉ៃលិនបានឲ្យដឹង ថាម្ចាស់ផ្ទះរងគ្រោះដែលត្រូវក្រុមចោរប្លន់ឈ្មោះ រីក នឿន អាយុ ៦៥ ឆ្នាំ និងប្រពន្ធឈ្មោះ ដឿក ណន អាយុ ៥១ ឆ្នាំមានមុខរបរលក់ចាប់ហួយមានទីលំនៅភូមិឃុំកើតហេតុខាងលើ ។
លោកបានបន្តថាក្នុងហេតុការណ៍ប្លន់នេះមិនបណ្តាលឲ្យមានអ្នករងបួសទេគ្រាន់តែបាត់បង់ទ្រព្យសម្បត្តិមួយចំនួនសរុបជាទឹកប្រាក់អស់ប្រហែលជាង០៥លានរៀលក្នុងនោះមានខ្សែដៃប្លាកទីន១ខ្សែទម្ងន់៤ជី, ក្រវិលមាស១គូទម្ងន់២ជី ខ្សែកប្លាកទីន២ខ្សែទម្ងន់៧ជី ចិញ្ចៀននប្លាកទីន១វង់ទម្ងន់៣ជី លុយបាត៥០០បាតកាត់ទូរស័ព្ទ១៨ដុល្លារ ទូរស័ព្ទដៃ១គ្រឿង និងលុយខ្មែរមួយចំនួនទៀត នៅក្នុងកន្ត្រកដាក់លុយដែលគាត់លក់បានក្នុងមួយថ្ងៃមិនដឹងប៉ុន្មានទេ ព្រោះមិនទាន់បានរាប់ ។
បើតាមសម្តីរបស់ស្រី្តឈ្មោះ ដឿក ណន ជាម្ចាស់ផ្ទះបានឲ្យដឹងថា មុនពេលកើតហេតុគាត់នៅក្នុងផ្ទះ ជាមួយកូនស្រីគាត់ឈ្មោះ ដេង សំណាង អាយុ១៩ឆ្នាំ ពេលនោះស្រាប់តែមានយុវជន៣នាក់ដើរចូលមក ក្នុងផ្ទះគាត់ ដោយ២នាក់មានពាក់ម៉ាសបិទមុខជិត ម្នាក់ទៀតអត់មានពាក់ទេ ពេលចូលមកដល់ពួកគេទាំង បានយកកាំភ្លើងខ្លីពីចង្កេះភ្ជង់គាត់ ហើយសំឡុតគាត់ថាឲ្យយកលុយនិងគ្រឿងអលង្ការទាំងអស់ឲ្យ ពួកគេ ។ពេលនោះមានគ្នាវាម្នាក់ជាអ្នកដើរប្រមូលលុយក្នុងកន្ត្រកនិងកាតទូរស័ព្ទ ហើយម្នាក់ដែលភ្ជង់គាត់ ក៏ចាប់ដោះចិញ្ជៀន ក្រវិល ខ្សែដៃ ខ្សែកពីខ្លួនរបស់គាត់ ចំណែកគ្នាវាម្នាក់ទៀតបានទៅបណ្តាច់ខ្សែទូរស័ព្ទ នៅលើតុ និងយកទូរស័ព្ទដៃកូនស្រីគាត់ដើម្បីកុំឲ្យតេទៅប្តឹងសមត្ថកិច្ច ពេលកូនស្រីគាត់មិនព្រមឲ្យ វាក៏ចាប់ ដៃកូនស្រីគាត់ចេញមុខផ្ទះទាត់បីជើងចូលក្រោមតុ ថាកុំឲ្យស្រែកនៅឲ្យស្ងៀម ។
ស្ត្រីជាម្ចាស់ផ្ទះបានបន្តទៀតថាក្រោយពេលពួកវាយកបានទ្រព្យសម្បត្តិនិងលុយមួយចំនួននេះហើយ ពួកវាក៏រត់ចេញពីផ្ទះគាត់ឡើងមកលើថ្នល់ជាតិ ពេលនោះក្មួយប្រុសគាត់ឈ្មោះ អ៊ឹម ប្រុស ក៏មកដល់ហើយបានយកកាំបិទខ្វែវ ដេញតាមពីក្រោយ ពេលនោះក៏ឃើញពួកវាកំពុងរៀបឡើងជិះម៉ូតូ ដែលពួកវាបានទុកចោលនៅខាងកើតផ្ទះ គាត់ប្រហែលជា ៥០ ម៉ែត្រ ។ពេលនោះក្មួយគាត់ក៏ស្រែកថា ចោរ ចោរ រត់ទៅសំដៅពួកវាស្រាប់តែពួក វាបានបាញ់មួយគ្រាប់ហើយក៏ឡើងជិះម៉ូតូរត់គេចខ្លួនបាត់តែម្តង ។
លោក ឆម វ៉ាន់ធី បានបញ្ជាក់ថាពេលនេះសមត្ថកិច្ចប៉ូលិសកំពុងធ្វើការស្រាវជ្រាវរកមុខសញ្ញាជនល្មើស ៕
.jpg)
