ខេត្ដពោធិ៍សាត់ ៖ ដេប៉ូលក់ប្រេងឥន្ធនៈមួយកន្លែងដែលមានយីហោ ទឹម ទូច ឋិតនៅភូមិ-ឃុំត្រញំងជង ស្រុកបាកាន ខេត្ដពោធិ៍សាត់ នៅរសៀលថ្ងៃទី៥ខែកញ្ញាឆ្នាំ២០១២ ត្រូវបានភ្លើងឆេះទាំងស្រុង និងរាលទៅលំនៅឋានអ្នកជិតខាងអស់៣ខ្នង ដែលជំហានដំបូងសង្ស័យបណ្ដាលមកពីខុសបច្ចេកទេសបញ្ចូលអាគុយ បណ្ដាលឱ្យ ទុស្សេខ្សែភ្លើង និងខ្លះថាបណ្ដាលមកពីកន្ទុយបារីដែលគេបោះចោល ។
ប្រភពព័ត៌មានពីកន្លែងកើតហេតុបានឱ្យដឹងថា នៅដេប៉ូលក់ប្រេងឥន្ធនៈឈ្មោះ ទឹម ទូច មានបញ្ចូលភ្លើងអាគុយ ស្រាប់តែនៅវេលាម៉ោងប្រមាណ២និង៥០នាទី ថ្ងៃទី៥ ខែកញ្ញា ឆ្នាំ២០១២ បានឆាបឆេះឡើងយ៉ាងសន្ធោសន្ធៅ មិនអាចជួយពន្លត់បាន ហើយបានរាលដាលទៅលំនៅឋានរបស់អ្នកភូមិនៅក្បែរនោះឆេះអស់៣ខ្នងបន្ថែមទៀត ។ ដោយសារតែស្ថានភាពភ្លើងឆេះខ្លាំង គឺប្រជាពលរដ្ឋនៅកន្លែងកើតហេតុមិនអាចជួយអន្ដរាគមន៍ជះទឹកពន្លត់បាន នោះទេ ពីព្រោះឆ្លើងបានឆាបឆេះស៊ីទែនលក់ប្រេងយ៉ាងពេញទំហឹង ។
ប្រភពព័ត៌មានដែលបានឱ្យដឹងថា ករណីដែលបណ្ដាលឱ្យឆាបឆេះខាងលើនេះ អាចបណ្ដាលមកពីមានភាពធ្វេស ប្រហែសដោយសារមានបុរសម្នាក់បានកេះដែកកេះអុជបារីជក់នៅពេលម្ចាស់ផ្ទះឈ្មោះ ទឹម ទូច កំពុងចាក់សាំងលក់ ឱ្យភ្ញៀវ ទើបបណ្ដាលឱ្យឆាបឆេះឡើងតែម្ដង ។
នៅក្នុងហេតុការណ៍នេះ គេឃើញមានអាជ្ញាធរពាក់ព័ន្ធមួយចំនួនបានចុះទៅដល់កន្លែងកើតហេតុ ដើម្បីជួយអន្ដរាគមន៍ ដូចជាលោក សៅ សារឿន អភិបាលស្រុកបាកាន, លោក ប៉ែន ទុង អធិការស្រុកបាកាន និងលោកស្នងការនគរបាល ខេត្ដ សារុន ចន្ធី។ តែទោះយ៉ាងណា អាជ្ញាធរខាងលើមិនបានធ្វើអត្ថាធិប្បាយលំអិតណាមួយជុំវិញករណីឆេះ ដេប៉ូលក់ប្រេងឥន្ធនៈខាងលើនេះទេ ដោយសារតែស្ថានភាពភ្លើងរហូតមកដល់ម៉ោង៥ល្ងាចថ្ងៃដដែល នៅតែបន្ដឆាបឆេះនៅឡើយ ។
នៅក្នុងហេតុការណ៍ឆាបឆេះនេះ គេសង្កេតឃើញរថយន្ដពន្លត់អគ្គីភ័យតែ១គ្រឿងប៉ុណ្ណោះដែលបានចូលទៅអន្ដរា គមន៍ពន្លត់ ប៉ុន្ដែមិនអាចទប់ស្កាត់ឥទ្ធិពលភ្លើងដែលកំពុងឆាបឆេះស៊ីទែនប្រេងបាននោះទេ គឺភ្លើងនៅតែបន្ដឆេះ និងឆេះរាលដាលទៅដល់លំនៅឋានអ្នកជិតខាងថែមទៀតផង ។
រហូតមកដល់ម៉ោង៥ល្ងាចថ្ងៃទី៥ ខែកញ្ញា ឆ្នាំ២០១២ គេនៅមិនទាន់អាចវាយតម្លៃអំពីទំហំនៃការខូចខាត ដែលបង្ក ឡើងដោយការឆាបឆេះដេប៉ូលក់ប្រេងឥន្ធនៈខាងលើនេះបានទេ ហើយក៏គេមិនទាន់ដឹងថា តើមានមនុស្សប៉ុន្មាននាក់ រងគ្រោះក្នុងហេតុការណ៍នេះដែរ ប៉ុន្ដែសម្រាប់ផ្ទះដេប៉ូលក់ប្រេងឥន្ធនៈ ទឹម ទូច គឺខូចខាតទាំងស្រុង ដោយមិនបាន ប្រមូលយកសម្ភារបន្ដិចណាមួយចេញពីភ្លើងដែលកំពុងឆាបឆេះនោះបានទេ ៕
