មន្ត្រីកងរាជអាវុធហត្ថ និងមន្ត្រីយោធាក្រសួងការពារជាតិ កំពុងត្រៀមខ្លួនជួយសង្គ្រោះប្រជាពលរដ្ឋ ពេលជួបគ្រោះទឹកជំនន់ ដោយធ្វើលំហាត់សមយុទ្ធសង្គ្រោះលើផ្ទៃទឹក ដើម្បីត្រៀមលក្ខណៈមុនគ្រោះទឹកជំនន់កើតឡើង។
សកម្មភាពគ្រូពេទ្យកងយោធពលខេមរភូមិន្ទក្នុងលំហាត់សមយុទ្ធ នៅសង្កាត់ព្រែកលៀប ខណ្ឌឫស្សីកែវ រាជធានីភ្នំពេញ កាលពីថ្ងៃទី៥ ខែកញ្ញា ឆ្នាំ២០១២។
តបតាមអនុសាសន៍របស់លោកនាយករដ្ឋមន្ត្រី ហ៊ុន សែន ក្នុងការជួយសង្គ្រោះប្រជាពលរដ្ឋពីគ្រោះទឹកជំនន់ឆ្នាំ២០១២ ក្រសួងការពារជាតិ និងកងរាជអាវុធហត្ថ បានត្រៀមកម្លាំងប្រមាណ៥ពាន់នាក់ សម្រាប់ជួយសង្គ្រោះជនរងគ្រោះ។
លោកឧត្តមសេនីយ៍ត្រី ម៉ា ភិរម្យ ជាមេបញ្ជាការហ្វឹកហ្វឺនកងរាជអាវុធហត្ថលើផ្ទៃប្រទេស លោកបានឲ្យដឹងថា នៅព្រឹកថ្ងៃពុធ ទី៥ ខែកញ្ញា កម្លាំងយោធាកងពលតូចដឹកជញ្ជូនលេខ៩៩ និងមន្ត្រីកងរាជអាវុធហត្ថលើផ្ទៃប្រទេសមានចំនួនជិត៣០០នាក់ បានរួមគ្នាហ្វឹកហ្វឺន ដើម្បីត្រៀមយុទ្ធនាការសង្គ្រោះប្រជាពលរដ្ឋពេលជួបគ្រោះទឹកជំនន់ឆ្នាំនេះ។ សមយុទ្ធនេះ បានរៀបចំលើផ្ទៃទឹកធំល្ហល្ហេវ នៅម្តុំតំបន់កោះដាច់ និងកោះឧកញ៉ាតី ក្បែរបន្ទាយកងទ័ពជើងទឹក ស្ថិតក្នុងភូមិកៀនឃ្លាំង សង្កាត់ព្រែកលៀប ខណ្ឌឫស្សីកែវ។
ឧត្តមសេនីយ៍ត្រី ម៉ា ភិរម្យ៖ «ត្រូវតែមានផែនការត្រៀមលក្ខណៈមុនជានិច្ច ដើម្បីជួយសង្គ្រោះប្រជាពលរដ្ឋនៅពេលណាដែលមានទឹកជំនន់មកដល់។ កុំដល់ពេលមានទឹកជំនន់មកដល់ហើយ ទើបរកអូប័រ រកឡាន គឺធ្វើឲ្យប្រជាពលរដ្ឋមានគ្រោះថ្នាក់។ ដូច្នេះ ត្រូវតែត្រៀមលក្ខណៈទាំងសម្ភារៈ ទាំងស្បៀង ថ្នាំពេទ្យ អូប័រសព្វយ៉ាងទាំងអស់ ដើម្បីត្រៀមជួយសង្គ្រោះពលរដ្ឋកុំឲ្យមានគ្រោះថ្នាក់»។
លោក ម៉ា ភិរម្យ បន្តថា សម្ភារៈដែលយកមកប្រើប្រាស់ក្នុងយុទ្ធនាការជួបគ្រោះទឹកជំនន់ពេលនេះ មានអូប័រ រថយន្តសង្គ្រោះ រថយន្តដឹកជញ្ជូនពលរដ្ឋរងគ្រោះ សរុបជិត៦០គ្រឿង និងផ្ដោតលើមុខសញ្ញាចំនួនពីរ គឺសង្គ្រោះអ្នកលង់ទឹក និងសង្គ្រោះអ្នកទើរលើកោះ ឬទួល។ ក្រៅពីនេះ ក៏បានត្រៀមតង់ចល័ត ត្រៀមអាហារ ទឹកស្អាត បង្គន់អនាម័យ និងគ្រូពេទ្យសម្រាប់ជួយសង្គ្រោះប្រជាពលរដ្ឋថែមទៀត។
ចំណែកមន្ត្រីដឹកនាំកងពលតូចដឹកជញ្ជូនលេខ៩៩ នៃក្រសួងការពារជាតិ មានជំនឿថា បច្ចេកទេសដែលទទួលបានក្រោយហ្វឹកហាត់សមយុទ្ធលើផ្ទៃទឹក នឹងជួយឲ្យការងារជួយសង្គ្រោះពលរដ្ឋរងគ្រោះក្នុងហេតុការណ៍ទឹកជំនន់មានលទ្ធផលល្អ។
យ៉ាងណាក៏ដោយ លោក ញឹម វណ្ណដា អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ មានប្រសាសន៍ថា គិតត្រឹមថ្ងៃពុធ ទី៥ ខែកញ្ញា ទំហំផ្ទៃទឹកមិនទាន់កើនខ្ពស់គួរឲ្យព្រួយបារម្ភនោះទេ ទោះមានខេត្តខ្លះទំហំទឹកទន្លេបានកើនខ្ពស់ក្តី។
លោកថ្លែងថា ឆ្នាំនេះរដ្ឋាភិបាល និងស្ថាប័នពាក់ព័ន្ធ បានត្រៀមកម្លាំង និងសម្ភារៈជាស្រេច ដើម្បីទប់ស្កាត់ និងជួយសង្គ្រោះជនរងគ្រោះពេលជួបគ្រោះទឹកជំនន់៖ «យើងឃើញថា ខេត្តស្ទឹងត្រែង និងក្រចេះ មានទឹកឡើងអ៊ីចឹងមែន។ ប៉ុន្តែ កំពង់ចាម ព្រៃវែង កណ្ដាល ទឹកកំពុងតែហូរទៅតាមដងស្ទឹងទៅតាមទន្លេតូច ចូលបឹងបួ និងស្រែប្រជាជន។ រីឯទន្លេសាប ទឹកកំពុងតែហូរចាក់ឆ្លងកាត់ស្រុកបាធាយ ខេត្តកំពង់ចាម និងតាមដងទន្លេសាប។ ហើយទឹកកំពុងតែហូរចុះទៅក្រោម ឆ្លងកាត់ខេត្តតាកែវ ឆ្លងកាត់ទន្លេបាសាក់ និងមកទន្លេមេគង្គក្រោម ឆ្ពោះទៅតាមប្រទេសជិតខាង គឺតាមខេត្តកណ្ដាល ខេត្តព្រៃវែង ត្រង់ម្តុំអ្នកលឿង ហូរកាត់ទៅក្រោម។ យើងគិតថា ទឹកនេះបើសិនជាឡើងក៏មិនយូរដែរ»។
ទាក់ទិនបញ្ហានេះ ធនាគារអភិវឌ្ឍន៍អាស៊ី (ADB) បានផ្តល់ប្រាក់កម្ចីសម្បទានជាង៦៧លានដុល្លារសហរដ្ឋអាមេរិក ដល់រដ្ឋាភិបាលកម្ពុជា ក្នុងគម្រោងស្ដារ និងជួសជុលហេដ្ឋារចនាសម្ព័ន្ធផ្លូវថ្នល់ ស្ពាន និងប្រព័ន្ធធារាសាស្ត្រ ក្នុងខេត្តចំនួន៦ ដែលបំផ្លាញដោយសារទឹកជំនន់ឆ្នាំ២០១១។ ខេត្តទាំង៦ មានខេត្តព្រៃវែង បន្ទាយមានជ័យ កំពង់ធំ សៀមរាប កំពង់ចាម និងខេត្តកណ្ដាល ដែលរងការខូចខាតធ្ងន់ធ្ងរជាងគេ។
ធនាគារអភិវឌ្ឍន៍អាស៊ី បានវាយតម្លៃថា ការខូចខាតដោយសារគ្រោះទឹកជំនន់ឆ្នាំ២០១១ ក្នុងខេត្តចំនួន១៨ ក្នុងប្រទេសកម្ពុជា មានតម្លៃសរុបជិត៥០០លានដុល្លារសហរដ្ឋអាមេរិក និងប៉ះពាល់ដល់ប្រជាពលរដ្ឋជិត២លាននាក់ និងបានសម្លាប់មនុស្សចំនួន២៥០នាក់ និងមានប្រជាពលរដ្ឋជាង៥ម៉ឺនគ្រួសារ ត្រូវជម្លៀសទៅកាន់ទីទួលមានសុវត្ថិភាព៕
