សម្ដីបញ្ជាក់នាពេលកន្លងមករបស់ ពេជ្រ សេរីរ័ត្ន មិនទាន់អាចស្រាយមន្ទិលមហាជនបាន១០០ភាគរយនៅឡើយទេ។ ប្រិយមិត្តដែលគាំទ្រនាងនៅតែយល់ថា នាងពិតជាបានសម្រាលកូនប្រាកដមែន ស្របពេលដែលនាងធ្លាប់ព្យាយាមលាក់មុខ មិនព្រមបង្ហាញខ្លួន ឬបដិសេធមិនឲ្យក្រុមអ្នកកាសែតផ្ដិតយករូបភាពផ្ទាល់ នាពេលកន្លងមក បើទោះបីជាមានសារព័ត៌មានមួយចំនួន ធ្លាប់បានស្នើសុំទៅហើយក្តី។
យ៉ាង ណាក៏ដោយ មិនខុសអីនឹង នាង សុខ ពិសី ដែលមុននេះជួបរឿងប្រហាក់ប្រហែលគ្នា ហើយសុខចិត្តថតវីដេអូឃ្លីបដល់ទៅពីរដងអះអាងនោះ នាង ពេជ្រ សេរីរ័ត្ន បានយល់ព្រមឲ្យមានការថតរូបនាងផ្ទាល់ដើម្បីឲ្យអស់សង្ស័យ។ សិទ្ធិថតរូបផ្ដាច់មុខនេះ នាង បានផ្ដល់មកឲ្យ Sabay ហើយរូបភាពទាំងប៉ុន្មានប៉ុស្តិ៍នេះ គឺ Sabay បានផ្ដិតយកកាលពីប៉ុន្មានថ្ងៃមុននេះ ក្នុងពេលនាងមកទទួលអាហារល្ងាចនៅម្ដុំបាក់ទូក។
ក្នុងសំលៀក បំពាក់ រ៉ូបត្រឹមជង្គង់ពណ៌ទឹកប៊ិចស្រាល លាយគ្រាប់មូលៗស និងអាវខ្មៅស្ដើងនោះ ពេជ្រ សេរីរ័ត្ន បានបញ្ជាក់ហើយបញ្ជាក់ទៀតថា នាងមិនមានកូន ទាំងមិនទាន់មានប្ដីដូចការចុះផ្សាយកន្លងមកទេ។ សេរីរ័ត្ន ថ្លែងថា “ខ្ញុំមានកូនឯណា ដូចបងឃើញស្រាប់ហើយ!”។
មួយ រយៈចុងក្រោយនេះ ព័ត៌មានជុំវិញការសម្រាលកូនរបស់អតីតពិធីការិនីល្បីឈ្មោះនាង ពេជ្រ សេរីរ័ត្ន ត្រូវបានបណ្ដាញសារព័ត៌មានក្នុងស្រុក យកមកធ្វើការចុះផ្សាយ ដោយដកស្រង់សម្ដីរបស់ប្រភពនានាដែលអះអាងថា ជាអ្នកជិតស្និទ្ធជាមួយនាង។ ហើយអ្វីដែលនាំឲ្យគេយល់ថា ពិតមែននោះ ព្រោះនាងមិនដែលហ៊ានអើតមុខបកស្រាយឲ្យបានច្បាស់ម្ដងណានោះទេ។
ទោះ យ៉ាងនេះក្តី នៅក្នុងជំនួបផ្ទាល់ជាមួយ Sabay នោះ ពេជ្រ សេរីរ័ត្ន ឲ្យដឹងថា នាងមិនចេញមុខបកស្រាយ ដោយសារនាងបានដកខ្លួនឆ្ងាយពីសិល្បៈទៅហើយ ប៉ុន្តែឥឡូវសុខចិត្តចេញមុខម្តង ដើម្បីឲ្យទស្សនិកជនអស់ចម្ងល់។
នាង បានបន្តថា បន្ទាប់ពីការបកស្រាយលើកនេះ នាងក៏មានគម្រោងបង្ហាញមុខនៅក្នុងកម្មវិធីខួបកំណើត របស់នាង ថន លក្ខិណា នៅពាក់កណ្ដាលខែធ្នូផងដែរ ក្នុងន័យស្រាយមន្ទិលក្រុមអ្នកសារព័ត៌មាន និងឈានទៅដល់បញ្ចប់ព័ត៌មានពាក់ព័ន្ធរូបនាងទាំងស្រុង។
ពេជ្រ
សេរីរ័ត្ន កំពុងហ៊ុមព័ទ្ធ ទៅដោយព័ត៌មានអាស្រូវមានផ្ទៃពោះ
និងសម្រាលកូនដោយអត់ប្ដី។
នាងធ្លាប់ធ្វើការបកស្រាយពាក់ព័ន្ធរឿងរ៉ាវខាងលើដែរ
នៅតែមិនអាចស្រាយមន្ទិលមហាជនបាន
ព្រោះនៅមានបង្កប់ចំណុចសង្ស័យមួយចំនួន។ ទោះបីយ៉ាងណា
ការបង្ហាញមុខ និងយល់ព្រមឲ្យSabay ថតរូបផ្ដាច់មុខលើកនេះ
ល្មមអាចឲ្យទស្សនិកជនវិនិច្ឆ័យបានហើយថា នាងពិតជាមានផ្ទៃពោះមែន
ឬមិនមែន៕(sabay)
