ខេត្តកំពង់ចាម:
បុរសចំណាស់ ៣នាក់ បាននាំគ្នាផឹកស្រាថ្នាំ
ដែលទុករយៈពេល ៤ ឆ្នាំមកហើយ។ ស្រានោះ ដាក់ក្នុងដបទឹកសុទ្ធ
ចំណុះកន្លះលីត្រ ហើយត្រូវបានបុរសទាំងបី
យកមកផឹកប្រហែលមួយពែងម្នាក់ៗ ក៏ពុល ដោយឈឺក្បាល
ឈាមហូរចេញតាមជើងធ្មេញ ទន់ដៃទន់ជើង និងប្រកាច់ស្លាប់ម្នាក់ភ្លាមៗ។
ចំណែកតាចាស់ ២នាក់ទៀត មានសភាពជំងឺធ្ងន់ខ្លាំង ត្រូវបានបញ្ជូន
ទៅសង្គ្រោះនៅមន្ទីរពេទ្យ ក្នុងរាជធានីភ្នំពេញ ជាបន្ទាន់
ក្នុងនោះលោកតាម្នាក់បានស្លាប់នៅមន្ទីរពេទ្យកាល់ម៉ែត។
លោក
វរសេនីយ៍ត្រី ខេង ស្រេង អធិការនគរបាលស្រុកស្រីសន្ធរ បានឲ្យដឹងថា
ហេតុការណ៍ពុលស្រា នាំឲ្យមនុស្សស្លាប់ និងរបួសនេះ បានកើតឡើង
នៅវេលាម៉ោង ១០ ព្រឹក ថ្ងៃទី១ ខែធ្នូ ឆ្នាំ២០១២
នៅផ្ទះហាងលក់គុយទាវមួយកន្លែង នៅភូមិព្រែកដំបូកលើ ឃុំព្រែកដំបូក
ស្រុកស្រីសន្ធរ ខេត្តកំពង់ចាម។ អ្នកស្លាប់ឈ្មោះ គុ ណឹមឃី អាយុ
៧៨ឆ្នាំ មានទីលំនៅភូមិអំពិល ឃុំព្រែកដំបូក ស្រុកស្រីសន្ធរ
ដែលមានចំងាយពីកន្លែងផឹកស្រាប្រមាណ ១៥០ ម៉ែត្រ។
លោកអធិការ
បន្ថែមថា លោកតានោះ ពេលផឹកស្រា បានមួយពែង ក៏មានអការៈឈឺក្បាល
ក៏ជិះម៉ូតូត្រឡប់ទៅផ្ទះវិញ ពេលដល់ផ្ទះក៏ប្រកាច់ ទន់ដៃទន់ជើង
ចេញឈាមតាមជើងធ្មេញ ស្លាប់ភ្លាមៗតែម្តង។ ចំណែកលោកតាពីរនាក់ទៀត
ដែលពុលធ្ងន់ធ្ងរ មានឈ្មោះ ឈុន យូ អាយុ ៥៧ឆ្នាំ ជាម្ចាស់ផ្ទះ លក់ស្រា
និងឈ្មោះ កឹង លាងហេង ហៅ លាវ អាយុ ៦០ ឆ្នាំ ស្នាក់នៅភូមិវាល
ឃុំព្រែកដំបូក ស្រុកស្រីសន្ធរ
បានស្លាប់នៅពេលយកមកសង្គ្រោះបន្ទាន់នៅមន្ទីរពេទ្យកាល់ម៉ែត។
លោក
អធិការ បានបន្តថា តា ឈុន យូ ជាម្ចាស់ផ្ទះលក់ស្រា
នៅពេលមិនទាន់មានអការៈពុលខ្លាំង បាននិយាយថា ពួកគាត់ បានផឹកស្រានេះ
អស់ប្រហែលម្នាក់មួយពែង ឬពីរពែងទេ ហើយក៏មានអការៈអីចឹងទៅ។
លោកតា បានបញ្ជាក់ថា ស្រានេះ កាលពី ៤ ឆ្នាំមុន
លោកអតីតអភិបាលរងស្រុកស្រីសន្ធរ ឈ្មោះ ម៉ក់ លឹមហ៊ន់
ដែលឥឡូវជាប្រធានក្រុមប្រឹក្សាស្រុកកងមាស ជាអ្នកឲ្យ
ហើយលោកក៏បានរក្សាទុករហូត ដោយមិនបានផឹកទេ រហូតដល់ថ្ងៃទី១ធ្នូនេះ
ក៏នឹកឃើញស្រា ដែលគេឲ្យ ក៏យកមកផឹក ទើបបណ្តាលឲ្យពុលតែម្តង៕(CEN)
