ឪពុក របស់នាងបានស្លាប់នៅពេលនាងអាយុត្រឹមតែ១២ឆ្នាំប៉ុណ្ណោះ។ នាងបានចូលរៀននិងព្យាយាមរិះរកគ្រប់វិធីដើម្បីរកប្រាក់ជួយម្តាយ នាងនិងប្អូនស្រីបីនាក់របស់នាង។
បច្ចុប្បន្នហ្សូរីដា មានវត្តមាននៅក្នុងកម្មវិធីទូរទស្សន៍ចំនួន៨ រៀងរាល់សប្តាហ៍ ហើយមានគេស្គាល់នៅទូទាំងប្រទេសកម្ពុជា។ នាងមានហាង Zo Fashion នៅតាមផ្លូវកម្ពុជាក្រោម និងកម្មវិធីបង្ហាញម៉ូដកម្ពុជាCambodia Supermodel។
កាលពីសប្តាហ៍មុន ហ្សូរីដា បានរៀបរាប់រឿងរ៉ាវរបស់នាង ដែលមានវត្តមាននៅក្នុងកញ្ចក់ទូរទស្សន៍។
ហ្សូរីដា បានលើកឡើងថា៖ «ចាប់តាំងពីឪពុកខ្ញុំស្លាប់ទៅ ម្តាយរបស់ខ្ញុំ បានធ្វើការយ៉ាងលំបាក។ ខ្ញុំជាបងស្រីធំនៅក្នុងគ្រួសារ ហើយខ្ញុំគិតថា ប្រសិនបើខ្ញុំអាចស្វែងរកការងារធ្វើបាន វានឹងជួយសម្រាលបន្ទុកម្តាយរបស់ខ្ញុំ»។
នៅពេលដែលនាងធ្វើ ការនៅក្នុងហាងទឹកអប់ នាងបានដឹងថា ក្រុមហ៊ុនទូរស័ព្ទចល័ត Hello Axiata កំពុងជ្រើសរើសការប្រកួត « Fresh Girl and Boy»។ គំនិតនេះ គឺថា អ្នកឈ្នះ នឹងទទួលបានការងារធ្វើ។ ហ្សូរីដា បានចូលរួមប្រកួត ហើយទោះបីជានាងមិនជាប់លេខក៏ដោយ ប៉ុន្តែនាងក៏ទទួលបានការងារធ្វើដែរ។
នាងបានប្រាប់ថា៖ «ខ្ញុំបានទទួលការងារធ្វើ ដោយសារតែខ្ញុំអាចនិយាយភាសាអង់គ្លេសបារាំង និងថៃបាន»។ នាងបានធ្វើការនៅក្រុមហ៊ុនហេឡូ បានមួយឆ្នាំកន្លះ មុនពេលមិត្តភក្តិនាងប្រាប់ថា មានក្រុមហ៊ុនអាកាសចរណ៍មួយ ត្រូវការបុគ្គលិក។ ក្រុមហ៊ុននោះ ចង់ឲ្យនាងបម្រើការនៅផ្នែកបម្រើសេវាអតិថិជន ប៉ុន្តែនាងចង់ក្លាយជាអ្នកបម្រើលើយន្តហោះ។
នាងបានបន្ថែម ថា៖ «អាកាសយានិកមួយចំនួន បានសម្លឹងមកនាង ហើយនិយាយទៅកាន់ថ្នាក់គ្រប់គ្រងថា តើនារីម្នាក់នេះយ៉ាងម៉េចដែរ? នៅពេលខ្ញុំមកដល់ផ្ទះវិញ ពួកគេ បានទូរស័ព្ទមកខ្ញុំ អបអរសាទរ ដោយសារអ្នកគ្រប់គ្រងបានជ្រើសរើសខ្ញុំឲ្យធ្វើជាអ្នកបម្រើលើ យន្តហោះ»។
ព្រឹត្តិការណ៍នោះពិតជាសំខាន់ណាស់សម្រាប់ហ្សូរីដា ដោយសារវាឆ្លុះបញ្ចាំងថា នាងបានបំពេញក្តីស្រមៃរបស់ខ្លួនតាមគោលដៅដែលនាងចង់បាន។ នៅពេលនោះ នាងអាយុ ២២ឆ្នាំហើយជាសិស្សអាហារូបករណ៍នៅវិទ្យាស្ថានភាសាបរទេស (IFL)។ ក្រុមហ៊ុនអាកាសចរណ៍នោះមិនមានដំណើរការនៅកម្ពុជាទៀតទេ នាពេលបច្ចុប្បន្ន។ កាលនោះក្រុមហ៊ុននោះ ហោះហើរទៅមកខេត្តសៀមរាប រតនគិរី ហុងកុង ម៉ាកាវ Guangzhou និងបាងកក។ ក្រុមហ៊ុនអាកាសចរណ៍អន្តរជាតិជាច្រើន បានផ្តល់ឱកាសដល់នាង។
នាងបានប្រាប់ទៀតថា៖ «ខ្ញុំតែងតែតស៊ូមតិជាមួយថ្នាក់ដឹកនាំ ដើម្បីលើកកម្ពស់គោលនយោបាយក្រុមហ៊ុន»។
នៅ ពេលដែលនាងអាយុ ២៣ឆ្នាំ កាលពីឆ្នាំ២០០៥ ចំពេលដែលនាងបានទទួលសញ្ញាបត្របរិញ្ញាបត្រជាន់ខ្ពស់ផ្នែកគ្រប់ គ្រងធុរកិច្ច នៅមហាវិទ្យាល័យជាតិគ្រប់គ្រង ក្រុមហ៊ុនអាកាសចរណ៍នោះ ក៏ជួបបញ្ហាហិរញ្ញវត្ថុ ហើយម្តាយរបស់នាង និងប្អូនស្រីរបស់នាង បានជំរុញឲ្យនាងចូលប្រឡងជ្រើសរើសMiss Luck ដែលឧបត្ថម្ភដោយក្រុមហ៊ុនUnilever។ នៅពេលនោះ នាងក៏ទទួលបានជោគជ័យ ហើយនាងក៏ទទួលបានកិច្ចសន្យាមួយឆ្នាំ ដើម្បីជួយក្រុមហ៊ុនUnileverផ្សព្វផ្សាយពាណិជ្ជកម្ម។
បន្ទាប់ មក ឆ្នាំ២០០៦ Unilever បានឧបត្ថម្ភកម្មវិធីសម្ជស្សនៅប៉ុស្តិ៍លេខ៥។ ដោយសារអ្នកអត្ថាធិប្បាយម្នាក់ មិនអាចធ្វើវាបានក្រុមការងារ ក៏សម្រេចជ្រើសរើសអ្នកមកជំនួស។
ពួកគេស្នើឲ្យសួរហ្សូរីដា ពេលនោះហើយដែលនាងបានបង្ហាញមុខនៅលើកញ្ចក់ទូរទស្សន៍។
បច្ចុប្បន្ន នាងធ្វើជាអ្នកអត្ថាធិប្បាយក្នុងកម្មវិធីទូរទស្សន៍សរុប៨កម្ម វិធី។ ក្នុងនោះ មានកម្មវិធីមួយ ឈ្មោះថា វេទិកាសម្រាប់ប្រធាននាយកប្រតិបត្តិនៅទូរទស្សន៍អាស៊ីអាគ្នេយ៍។ នាងបានជួបសម្ភាសជាមួយមនុស្សសំខាន់ៗមកពីក្រុមហ៊ុន និងរដ្ឋាភិបាល នៅរៀងរាល់ថ្ងៃចន្ទពីម៉ោង៥:៣០នាទី ដល់ម៉ោង៦:៣0នាទី។ កម្មវិធីសុខភាពប្រជាជនបង្ហាញនៅលើកញ្ចក់ទូរទស្សរ៍អាស៊ីអាគ្នេយ៍ រៀងរាល់ថ្ងៃពុធ ពីម៉ោង៥:៣០នាទី ដល់ម៉ោង៦:៣០នាទី។ នាងលើកឡើងថា៖ «យើងបានថតកម្មវិធីនោះ នៅរៀងរាល់ថ្ងៃពុធ។ វាពិតជាលំបាកណាស់ក្នុងការស្វែងរកភ្ញៀវ ដោយសារមនុស្សសំខាន់ៗភាគច្រើន មិនចង់បង្ហាញមុខ ប៉ុន្តែបច្ចុប្បន្ន វាកំពុងតែមានភាពងាយស្រួល»។
កម្មវិធីផ្សេងមួយទៀត នៅប៉ុស្តិ៍អាស៊ីអាគ្នេយ៍ ឈ្មោះថាPop Music Concert ដែលជាកម្មវិធីបង្ហាញអំពីតន្ត្រីខ្មែរបុរាណចាក់ផ្សាយជារៀងរាល់ ថ្ងៃសៅរ៍ ចាប់ពីម៉ោង ៥ ដល់ម៉ោង ៧:៣០យប់។ កម្មវិធីផ្សេងមួយទៀត ឈ្មោះថា SEA TV Concert ចាក់ផ្សាយរៀងរាល់ថ្ងៃអាទិត្យចាប់ពីម៉ោង៥ដល់ ៨ ដោយមានចាក់ផ្សាយតន្ត្រីសម័យផ្សាយផ្ទាល់តែម្តង។
នាងក៏បាន កាន់កម្មវិធីចម្អិនម្ហូបនៅប៉ុស្តិ៍លេខ៥ផងដែរឈ្មោះថា LadiesCorner ដែលចាក់ផ្សាយនៅរៀងរាល់ថ្ងៃសៅរ៍ព្រឹក ពីម៉ោង១០ ដល់ ១១។ នៅប៉ុស្តិ៍លេខ ៥ ហ្សូរីដា ក៏ធ្វើអត្ថាធិប្បាយក្នុងកម្មវិធីជជែកឈ្មោះថា Wonderful Tonight ពីម៉ោង ៨ ដល់ ១០យប់ រៀងរាល់ថ្ងៃអាទិត្យ។នៅCTN ហ្សូរីដា ធ្វើអត្ថាធិប្បាយកម្មវិធី My Beauty, My Mega-Belle ចាក់ផ្សាយរៀងរាល់ថ្ងៃអាទិត្យពី៤:៣០នាទី ដល់៥៕CS(POSTKHMER)
