Friday, December 7, 2012
អាជីវករលក់ដូរ និងបញ្ចូលបទភ្លេងទូរស័ព្ទ រិះគន់អង្គភាពវប្បធម៌ស្រុក ដើរយកលុយតាមតូប
យុវជនឈ្មោះសេង គឹមសាន អាយុ២៣ឆ្នាំ ដែលជាអ្នកបញ្ចូលបទភ្លេងនៅតាមចិញ្ចើមផ្លូវលេខ១៥៥ ក្នុងភូមិអូរឫស្សី ឃុំបាក់ចិញ្ចៀន ស្រុកភ្នំក្រវាញ ខេត្តពោធិ៍សាត់។ យុវជនឈ្មោះសេង គឹមសាន បានប្រាប់ឲ្យដឹងថា កាលពីព្រឹកថ្ងៃទី៣ ខែធ្នូ ឆ្នាំ២០១២ កន្លងមក មានមន្ត្រីម្នាក់ដែល គាត់បានអះអាងខ្លួនថា ជាមន្ត្រីបម្រើការឲ្យអង្គភាព វប្បធម៌ស្រុកភ្នំក្រវាញ បានមកទារលុយតាមតូប។ លោកគឹមសាន បានបន្តថា នៅថ្ងៃដែលគាត់បានដើរទារលុយនោះ គឺមានតែម្នាក់ឯងទេ ដោយបានពន្យល់ប្រាប់ហេតុផលថា ការរកស៊ីបញ្ចូលបទភ្លេងនេះ គឺជាបទល្មើស ត្រូវតែ បង់លុយជូនរដ្ឋ តែ ប្រសិនបើប្អូនឯងបង់លុយឲ្យចំនួន២៦.០០០រៀលក្នុងមួយឆ្នាំនោះហើយ គាត់នឹងទៅរាយការណ៍ជូនថ្នាក់លើថា នៅតំបន់នេះ គឺគ្មានបទល្មើសបញ្ចូលបទភ្លេងនោះទេ ចង់រកបន្តទៀតក៏រកទៅ។ ការទារលុយបង់ពន្ធនេះ គឺមានកំរិតមួយឆ្នាំម្ដង ដែលមានចេញបង្កាន់ដៃបង់ប្រាក់ជូនអ្នកបង់លុយមួយច្បាប់ផងដែរ តែនៅក្នុងបង្កាន់ដៃនោះ គឺគ្មាន ការចុះលេខ ឬឈ្មោះ ប្រធានគ្រប់គ្រងទេ គឺមានតែ ឈ្មោះ លោក អ៊ុក ជាណែត ដែលជាអ្នកដើរទារលុយ ម្នាក់ឯងគត់។
ចំណែកស្ត្រីឈ្មោះយ៉ុង រ៉េត អាយុ៥៧ឆ្នាំ ដែលជាអ្នកលក់ឥវ៉ានចាប់ហួយបន្តិចបន្តួច នៅភូមិអូរឫស្សី ដែរនោះ បានឲ្យដឹងដែរថា នៅថ្ងៃទី៤ខែធ្នូ ឆ្នាំ២០១២កន្លងមក មានខាងវប្បធម៌ស្រុកភ្នំក្រវាញឈ្មោះ អ៊ុក ជាណែត បានមកបង្ខំឲ្យគាត់បង់លុយចំនួន ២៥.០០០រៀល សម្រាប់ការលក់ដូរមួយឆ្នាំ ប៉ុន្តែគាត់មិនបានបង់លុយឲ្យនោះទេ ព្រោះ ថាកន្លងមកធ្លាប់តែឮគេនិយាយថា ខាងពន្ធដាទារលុយ តែឥឡូវខាងវប្បធម៌មកទារម្ដង ដូចជា មិនត្រូវរឿងទាល់តែសោះ ខ្ញុំមិនព្រមបង់ឲ្យទេ រង់ចាំសួរទៅថ្នាក់លើសិន។ ហេតុផលដែលមិនព្រមបង់លុយនេះ ព្រោះវាចម្លែកពេក ដើរទារពន្ធអីក៏គ្មានប៉ូលិស ឬ អាជ្ញាធរណាម្នាក់ដើរជាមួយអញ្ចឹង គឺមានតែគាត់ម្នាក់ឯងគត់ នេះប្រហែល ជាមិនស្រួលទេ។
លោក ទូច សំបូរ អភិបាលស្រុកភ្នំក្រវាញ បានអះអាងប្រាប់អ្នកយកព័ត៌មានយើងថា រឿងនេះលោកមិនបានដឹងទេ ថែមទាំងគេមិនបានសុំសហការមួយដែរ អរគុណណាស់ដែលបានផ្ដល់ព័ត៌មាន។ រឿងនេះ លោកនឹងធ្វើការស្រាវជ្រាវនៅពេលក្រោយ។
លោក រស់ សំណាង អនុប្រធានមន្ទីរវប្បធម៌ ខេត្តពោធិ៍សាត់ បានប្រាប់គេហទំព័រ CEN នៅថ្ងៃទី៧ ខែធ្នូ ឆ្នាំ២០១២ថា មិនមែនដាក់ទិសទេ វាជាផែនការធ្វើតាមច្បាប់ បង្ក្រាបចំពោះអ្នកបញ្ចូលបទចំរៀងយ៉ាងអាណាធិបតេយ្យ ពីការប្រើប្រាស់រូបភាពអាសអាភាស ដូចជា រូបភាពរឿងសិចជាដើម។ ជាមួយគ្នានោះ ក៏ត្រូវទារពន្ធលើការលើក ស្លាកយីហោហាងលក់ដូរដែរលើផ្នែកតុបតែង ឯច្បាប់អាជីវកម្មលក់ដូរ គឺជារឿងរបស់ពន្ធដារផ្សេង។ លោកអនុប្រធានបានបន្តថា ការចុះប្រតិបត្តិការនេះ ពេលទៅដល់មូលដ្ឋានណា គឺត្រូវតែសហការ ជាមួយកន្លែងនោះ មិនអាចធ្វើតែម្នាក់ឯងបានទេ៕(CEN)
