ពិធីបរិច្ចាគឈាមដោយស្ម័គ្រចិត្តនេះ បានធ្វើឡើង កាលពីព្រឹកថ្ងៃទី២៩ ខែធ្នូ ឆ្នាំ២០១២ នៅសាលមហោស្រព នៃសាកលវិទ្យាល័យបាត់ដំបង ក្រោមអធិបតីភាពលោក ជាម ច័ន្ទសោភ័ណ អភិបាលរង ខេត្តបាត់ដំបង លោកវេជ្ជបណ្ឌិត វឿង ប៊ុនរ៉េត អនុប្រធានមន្ទីរសុខាភិបាល ខេត្តបាត់ដំបង លោកជុន ហៀង ថាវសិទ្ធិ ប្រធានផ្នែកទីផ្សារក្រុមហ៊ុន NVC corporation, Vital ព្រមទាំងសិស្សានុសិស្ស និងសហភាពសហព័ន្ធយុវជនកម្ពុជាខេត្តបាត់ដំបង ប្រមាណជាង៥០០នាក់ផងដែរ។
លោកស្រី សៀងឯម ទទឹម នាយិការង សាកលវិទ្យាល័យបាត់ដំបង បានឲ្យដឹងថា សិស្សនុសិស្សប្រមាណជាង ៥០០នាក់ មកពីវិទ្យាល័យនានា ក្នុងខេត្តបាត់ដំបង បានស្ម័គ្របរិច្ចាគឈាម ដើម្បីតម្រូវការជួយសង្គ្រោះដល់អ្នកជំងឺនានា ដែលទទួលរងគ្រោះថ្នាក់ផ្សេងៗ និងគ្រោះថ្នាក់ដោយធម្មជាតិជាយថាហេតុ នៅទូទាំងប្រទេសកម្ពុជា។
លោក ជុនហៀង ថាវសិទ្ធិ ប្រធានផ្នែកទីផ្សារក្រុមហ៊ុនទឹកបរិសុទ្ធិ វីតាល់ បានលើកឡើងថា ទឹកពិសារវីតាល់ បានចូលរួមកម្មវិធីផ្ដល់ឈាម របស់លោកលោកស្រី និងប្អូនៗទាំងអស់។ ទឹកពិសារវីតាល់ បានបង្កើតឡើងតាំងពីថ្ងៃទី៧ ខែមករា ឆ្នាំ២០១០ ដោយស្នាដៃរបស់កូនខ្មែរយើងពិតៗ។ ដោយយោងទៅលើវប្បធម៌ចែករំលែក ស្រឡាញ់ជាតិ ជួយជនរួមជាតិកម្ពុជាយើង ទឹកពិសារវីតាល់បានបង្កើតមូលនិធិរបស់ខ្លួន ចាប់តាំងពីនៃថ្ងៃបង្កើតទឹកពិសារ វីតាល់ ដោយរំលែកថវិកា
ដែល លក់ក្នុងមួយដប២៥រៀលនោះ សម្រាប់ការងារមនុស្សធម៌ និងសង្គមផ្សេងៗក្នុងនោះជួយឧបត្ថម្ភចំពោះកាកបាទក្រហមកម្ពុជា កងទ័ពសមរភូមិមុខ កុមារកំព្រា កុមារបាត់បង់កាយសម្បទាមន្ទីរពេទ្យគន្ធបុប្ផា និងជួយផ្នែកព្រះពុទ្ធសាសនាផងដែរ។ ប៉ុន្តែដោយយល់ឃើញថា តម្រូវការនៃការផ្ដល់ឈាននៅក្នុងប្រទេសកម្ពុជាមានកម្រិតខ្ពស់ ក្រុមហ៊ុនទឹកពិសារវីតាល់ បានផ្ដោតទៅលើការជួយឧបត្ថម្ភគាំទ្រសកម្មភាពបរិច្ចាគឈាមដោយ ស្ម័គ្រចិត្ត និងបានសហការជាមួយមជ្ឈមណ្ឌលជាតិផ្ដល់ឈាម យ៉ាងជិតស្និទ្ធិបំផុតអស់រយៈពេល៣ឆ្នាំមកហើយ។
ទោះបីយ៉ាងណាទឹក ពិសារវីតាល់មិនបានបញ្ឈប់សកម្មភាពរបស់ខ្លួននេះទេ គឺនៅតែបន្តសហការជួយឧបត្ថម្ភគាំទ្រ ដើម្បីចូលរួមបំផុស និងសំដៅសម្រេចឲ្យបាននូវការផ្ដត់ផ្គង់ឈាម ឲ្យបានគ្រប់គ្រាន់ ដើម្បីជួយសង្គ្រោះអ្នកជំងឺនៅក្នុងប្រទេសកម្ពុជា ដោយផ្អែកទៅលើការបរិច្ចាគឈាមដោយស្ម័គ្រចិត្ត មិនគិតកម្រៃ។
លោក ជាម ច័ន្ទសោភ័ណ អភិបាលរងខេត្តបាត់ដំបង និងជាប្រធានសហភាពសហព័ន្ធយុវជនកម្ពុជាខេត្តបាត់ដំបង បានមានប្រសាសន៍អំពាវនាវថា ពលរដ្ឋគ្រប់រូប គឺមានសណ្ដានចិត្តចូលរួមបរិច្ចាគឈាម ដើម្បីជួយសង្គ្រោះអ្នកជំងឺដែលជួបគ្រោះថ្នាក់ដោយធម្មជាតិ ឬមានជំងឺចៃដន្យជាយថាហេតុ នៅក្នុងប្រទេសកម្ពុជា យើងឲ្យបានច្រើនគ្នាទៅតាមការស្ម័គ្រចិត្ត។ ការផ្ដល់ឈាមវាមិនប៉ះពាល់ដល់សុខភាពបងប្អូនឡើយ។ នេះជាការចូលរួមចំណែកជួយសង្គ្រោះ និងស្រឡាញ់ជាតិខ្មែរដូចគ្នា។
លោកវេជ្ជបណ្ឌិត វឿង ប៊ុនរ៉េត អនុប្រធានមន្ទីរសុខាភិបាលខេត្តបាត់ដំបង បានឲ្យដឹងថា នៅវេលាម៉ោងប្រមាណជា១រសៀល ថ្ងៃទី២៩ ខែធ្នូ ឆ្នាំ២០១២ មជ្ឈមណ្ឌលផ្ដល់ឈាមខេត្តបាត់ដំបង បានធ្វើការងាររបស់ខ្លួន ពីការស្ម័គ្ររបស់សិស្សានុសិស្ស និស្សិតបរិច្ចាគឈាមបានចំនួន១០៨នាក់ហើយ។ ដោយសារពេលវេលាខ្លី មជ្ឈមណ្ឌលផ្ដល់ឈាមខេត្តបាត់ដំបង និងចុះទៅតាមវិទ្យាល័យរៀងខ្លួន ដើម្បីធ្វើការងារដែលយុវជនផ្ដល់ឈាម៕(cen)
