សកម្មភាព
នៃការធ្វើត្រាប់តាម អំពីការប្រើអំពើហិង្សាទៅលើស្ត្រី
និងកុមារនៅក្នុងសង្គមកម្ពុជានាពេលបច្ចុប្បន្ន។ រូបថត ហុង មិនា
កោះកុងៈ ខណៈដែលអង្គការសង្គមស៊ីវិល និងរដ្ឋាភិបាល កំពុងធ្វើយុទ្ធនាការបំពាក់បូពណ៌សប្រយុទ្ធប្រឆាំងនឹងអំពើហិង្សា លើស្ត្រី កាលពីម្សិលមិញ ស្រ្តីវ័យ ៣៧ឆ្នាំម្នាក់ នៅក្រុងខេមរភូមិន្ទ បានរត់ទៅកាន់ការិយាល័យអង្គការអាដហុក ដើម្បីសុំឲ្យអង្គការនេះ ជួយដាក់ពាក្យបណ្តឹងទៅប៉ូលិសមូលដ្ឋានឲ្យធ្វើការចាប់ខ្លួនស្វាមី ដែលបានប្រើអង្រែវាយប្រដាប់ភេទ និងតែងតែវាយធ្វើបាបមកលើខ្លួនស្ទើរតែមានជំងឺផ្លូវចិត្ត។
ស្ត្រី រងគ្រោះ មានឈ្មោះនឹង នៀត រស់នៅសង្កាត់ស្ទឹងវែង ក្រុងខេមរភូមិន្ទ បានរត់គេចពីផ្ទះកាលពីយប់ថ្ងៃពុធ ដោយហែលទឹក ទៅកាន់ការិយាល័យអង្គការអាដហុក បន្ទាប់ពីត្រូវប្តីវាយធ្វើបាប។
អ្នកស្រី នឹង នៀត បាននិយាយកាលពីម្សិលមិញថា អ្នកស្រី បានរស់នៅជាមួយស្វាមីឈ្មោះ សេង រុន វ័យ ៤២ ឆ្នាំ ជិត ៥ ឆ្នាំមកហើយ ហើយជារឿយៗត្រូវបានស្វាមីវាយធ្វើបាប។ អ្នកស្រី បន្តថា គាត់បានប្រើកាំបិតចាក់ដៃនិងវាយក្បាល ហើយគាត់ បានវាយទាត់ធាក់ និងដៀលអ្នកស្រីថា «មីសំផឹង»ស្ទើរតែរាល់ថ្ងៃ។ នៅថ្ងៃចុងក្រោយ ស្រាប់តែប្តីរបស់អ្នកស្រី បានយកអង្រែវាយប្រដាប់ភេទរបស់អ្នកស្រី ទើបធ្វើឲ្យអ្នកស្រី មិនអាចអត់ទ្រាំបន្តទៀតបាន ក៏បានសម្រេចចិត្តរត់ចេញពីផ្ទះ ហើយដាក់ពាក្យបណ្តឹង។ អ្នកស្រីបន្តថា៖«ប្តីរបស់ខ្ញុំ បានយកអង្រែវាយប្រដាប់ភេទខ្ញុំពីរដង។ ខ្ញុំមិនអាចទ្រាំបានទេ។ ខ្ញុំបានរត់គេចពីផ្ទះដោយហែលទឹកខណៈដែលប្តីដេកលក់»។ ស្រ្តីរូបនេះ បានអំពាវនាវដល់អាជ្ញាធរមូលដ្ឋាន ចាប់ខ្លួននិងផ្តន្ទាទោសស្វាមីរបស់អ្នកស្រីទៅតាមផ្លូវច្បាប់។
អ្នកស្រីបន្ត ថា៖«អស់រយៈពេល ៥ ឆ្នាំមកហើយ ខ្ញុំទ្រាំរស់នៅជាមួយគាត់ ទោះបីគាត់ បានវាយធ្វើបាបខ្ញុំស្ទើរគ្រប់រូបភាពមានដូចជាច្របាច់ក ចាក់នឹងកាំបិត ប៉ុន្តែចុងក្រោយ គាត់ បានប្រើអំពើហិង្សាធ្ងន់ធ្ងរ ដោយវាយប្រដាប់ភេទរបស់ខ្ញុំ»។
លោក នាង បូរ៉ាទីណូ អ្នកសម្របសម្រួលអង្គការអាដហុកប្រចាំខេត្តកោះកុង បានថ្លែងថា វាជាករណីប្រើអំពើហិង្សាធ្ងន់ធ្ងរនៅក្នុងគ្រួសារ។ លោក បានបញ្ជាក់ថា៖«វាជារឿងឃោរឃៅណាស់ ដែលស្ត្រីរូបនេះ ត្រូវបានប្តីធ្វើទារុណកម្ម។ គាត់ត្រូវបានប្តីវាយធ្វើបាបស្ទើរឆ្កួត។ ខ្ញុំបានដាក់ពាក្យបណ្តឹងបន្តទៅប៉ូលិសមូលដ្ឋានរួចហើយ ដើម្បីចាត់វិធានការលើករណីនេះ»។
លោក នុត សុខុម នាយប៉ុស្តិ៍ប៉ូលិសសង្កាត់ស្ទឹងវែង បានដឹកនាំកម្លាំងអន្តរាគមន៍ ចុះទៅដល់ផ្ទះស្ត្រីរងគ្រោះ ដើម្បីធ្វើការសាកសួរពីបញ្ហានេះ កាលពីម្សិលមិញ ប៉ុន្តែក្រោយពីសួរនាំរួចមក បុរសជាប្តីបានរត់គេចខ្លួនបាត់។
អង្គការយេនឌ័រ និងការអភិវឌ្ឍសម្រាប់កម្ពុជា (GADC) និងអង្គការក្រៅរដ្ឋាភិបាលមួយចំនួនទៀត ព្រមទាំងរដ្ឋាភិបាល បានរួមគ្នាធ្វើយុទ្ធនាការ បំពាក់បូពណ៌ស ប្រឆាំងអំពើហិង្សាលើស្រ្តី ចាប់តាំងពីថ្ងៃទី ២៥ ខែវិច្ឆិកា រហូតដល់ថ្ងៃទី១០ ខែធ្នូ ឆ្នាំ ២០១២ នៅរាជធានីភ្នំពេញនិងនៅតាមបណ្តាខេត្តមួយចំនួន។
លោកស្រី រស់ សុភាព នាយកប្រតិបត្តិនៃអង្គការ GADC ថ្លែងថា ប្រធានបទនៃយុទ្ធនាការ ១៦ ថ្ងៃនេះ គឺអំពើហិង្សាប្រឆាំងស្រ្តីជះឥទ្ធិពលដល់មនុស្សគ្រប់ៗគ្នា«នៅ ពេលមិនមានអំពើហិង្សាចំពោះស្រ្តីសហគមន៍ទាំងមូលទទួលបាន ប្រយោជន៍»៕NR(POSTKHMER)
