ភ្នំពេញ:
ព្យុះទី២៤ ឈ្មោះបុប្ផា
ដែលជាឈ្មោះរបស់កម្ពុជាបានដាក់ឲ្យវា នឹងឡើងគោកនៅប្រទេសហ្វីលីពីន
នាថ្ងៃទី៤ ឬទី៥ ខែធ្នូ។ ព្យុះទីហ្វុង
ដែលមានល្បឿនពីររយគីឡូម៉ែត្រក្នុងមួយម៉ោងនេះ
វាមានភាគរយតិចតួចណាស់ ដែលអាចឆ្លងផុតប្រទេសហ្វីលីពីន
និងមានឥទ្ធិពលដល់កម្ពុជានោះ
តែវាបានធ្វើឲ្យថយឥទ្ធិពលសម្ពាធខ្ពស់ស៊ីបេរីជាច្រើនថ្ងៃមកហើយ។
នេះបើតាមការឲ្យដឹងពីមន្ត្រីឧតុនិយម។
លោក អ៊ុំ រីណា
ប្រធានស្តីទីនាយកដ្ឋានឧតុនិយម នៃក្រសួងធនធានទឹក
បានឲ្យដឹងនៅថ្ងៃទី៣ ខែធ្នូ ឆ្នាំ២០១២ នេះថា ព្យុះទី២៤
ឈ្មោះបុប្ផា
ដែលមានល្បឿនរហូតប្រមាណជាពីររយគីឡូម៉ែត្រក្នុងមួយម៉ោងនោះ ៩០
ភាគរយ វានឹងរលាយនៅពេលបានឡើងគោកប្រទេសហ្វីលីពីន
ឬក៏បានមកហួសប្រទេសហ្វីលីពីនបន្តិច។
វាមិនអាចមានកម្លាំងខ្លាំងជាថ្មីបាន
បន្ទាប់ពីឆ្លងផុតប្រទេសហ្វីលីពីននោះទេ ដោយសារពេលនេះ
សម្ពាធខ្ពស់ស៊ីបេរីបានធ្លាក់ចុះមកកាន់តែខ្លាំងហើយ។
លោក អ៊ុំ រីណា បញ្ជាក់ថា ព្យុះទីហ្វុងទី២៤នេះ មានកម្លាំងខ្លាំង
ដែលមកជិតដល់ប្រទេសហ្វីលីពីនហើយ ៗវានឹងឡើងគោកនៅប្រទេសហ្វីលីពីន
នៅថ្ងៃទី៤ ឬទី៥ ខែធ្នូ។ ព្យុះនេះមានភាគរយតិចតួចណាស់
ដែលអាចឆ្លងផុតពីប្រទេសហ្វីលីពីន ហើយមានឥទ្ធិពលដល់កម្ពុជានោះ
បើឆ្លងប្រទេសហ្វីលីពីនរួច ក៏មានកម្លាំងខ្សោយដែរ។
ព្យុះនេះបានធ្វើឲ្យសម្ពាធខ្ពស់ស៊ីបេរីថយឥទ្ធិពលជាច្រើនថ្ងៃ
មកហើយ។
ចំណែកស្ថានភាពទឹកភ្លៀងរដូវវស្សាវិញ លោក អ៊ុំ
រីណា បានបញ្ជាក់ថា អស់ជាស្ថាពរហើយ កាលពីចុងខែវិច្ឆិកា កន្លងទៅនេះ។
ចំពោះស្ថានភាពអាកាសធាតុត្រជាក់ វានឹងចាប់ផ្តើមមកដល់
បន្ទាប់ពីព្យុះឈ្មោះបុប្ផាបានរលាយអស់។ ពេលត្រជាក់ម្តងៗ
មានរយៈពេលច្រើនថ្ងៃជាងឆ្នាំកន្លងមក តែកម្រិតនៃការត្រជាក់
គឺប្រហាក់ប្រហែលរដូវត្រជាក់ឆ្នាំ២០១១-២០១២ដែរ។
រីឯការដាក់
ឈ្មោះឲ្យព្យុះ ដែលបានកើតមាននៅក្នុងតំបន់នាពេលកន្លងមក ត្រូវបានលោក
អ៊ុំ រីណា ពន្យល់ស្រដៀងនឹងលោក ម៉ៅ ហាក់
អគ្គនាយករងទទួលបន្ទុកកិច្ចការបច្ចេកទេស
និងជាប្រធាននាយកដ្ឋានជលសាស្ត្រ ក្រសួងធនធានទឹក និងឧតុនិយម ដែរថា
ប្រទេសជាងដប់នៅក្នុងតំបន់ ត្រូវបានគណៈកម្មការព្យុះ
ឲ្យប្រទេសនីមួយៗផ្ញើឈ្មោះសម្រាប់ដាក់ឲ្យព្យុះដែលបានកើតមាន។
ឈ្មោះព្យុះដែលបានផ្ញើមកពីជាងដប់ប្រទេស
ដែលមានប្រមាណជាមួយរយឈ្មោះ
ត្រូវគណៈកម្មការរៀបចំជាលេខរៀងសម្រាប់ដាក់ឲ្យព្យុះ
ដែលកើតមានជាបន្តបន្ទាប់ នៅពេលអស់ចាប់ផ្តើមរាប់សាជាថ្មី។
គួរបញ្ជាក់ផងដែរថា ព្យុះដែលបានកើតមានក្នុងតំបន់
តាំងពីដើមឆ្នាំរហូតមកទល់ពេលនេះ (៣ ធ្នូ) មានចំនួន២៤ ព្យុះហើយ
តែមានឥទ្ធិពលដល់កម្ពុជាតែពីរទេ។ ព្យុះទាំង២៤
ភាគច្រើនជាព្យុះមានកម្រិតខ្លាំង (កំបុតត្បូង)
ដែលបានកើតជាបន្តបន្ទាប់ មានឈ្មោះ PAKHAR, SUNVU, MAWAR, GUCHOL, TALIM,
DOKSURI, KHANUN, VICENTE, SAOLA, DAMREI, HAIKUI, KIROGI, KAITAK, TEMBIM,
BOLAVEN, SANBA, JELAWAT, EVINIAR, SONTINH, PHRAPERONNIG និងព្យុះទី២៤
ដែលកំពុងកើតមានឈ្មោះ BOPHA៕ J(CEN)
