ហេតុការណ៍នេះកើតឡើងកាលពីម៉ោង ម៉ោង៩ និង ៣០ នាទីយប់ ថ្ងៃទី១ ធ្នូ ២០១២ ស្ថិតនៅចំណុចផ្លូវលេខ២១៧ (ហ្សារដឺហ្គោល) កែង១០៧ (សុកហុក) ភូមិ៥ សង្កាត់អូរឫស្សីទី៣ ខណ្ឌ៧មករា។
ប្រភពព័ត៌មានបាន ឲ្យដឹងថា រថយន្តតូយ៉ូតា PRUIS ពណ៌ឈាមជ្រូក ស្លាកលេខ 2S-6324 បើកបរដោយនារីវ័យក្មេងម្នាក់ មិនត្រូវបានស្គាល់អត្តសញ្ញាណ បើកក្នុងទិសដៅពីកើតទៅលិច តាមផ្លូវលេខ២១៧ (ហ្សារដឺហ្គោល) រីឯម៉ូតូSmash v ពណ៌ស បើកតាមផ្លូវលេខ១០៧ (សុកហុក) បើកក្នុងទិសដៅពីត្បូងទៅជើង ខណៈបើកមកដល់ចំណុចផ្លូវបែកជាបួន ម៉ូតូបើកឆ្លងផ្លូវជិតផុតទៅហើយ ក៏ស្រាប់តែមានរថយន្តខាងលើ បើកមកដល់ចាប់ហ្វ្រាំងមិនទាន់ ក៏បានជ្រុលចង្កូតទៅបុកចំពាក់កណ្តាលម៉ូតូ បណ្តាលឲ្យអ្នកបើកម៉ូតូខ្ទាតទៅលើចិញ្ចើមផ្លូវសន្លប់ស្តូកមួយសន្ទុះ ភ្លាមនោះរថយន្តសង្គ្រោះគ្លីនិកឯកជន ទៅដឹកយកទៅព្យាបាលដែរ តែត្រូវជនរងគ្រោះដឹងខ្លួនពីសន្លប់មកវិញ ក៏មិនព្រមឡើងរថយន្តទៅព្យាបាលទេនោះទេ បានទូរស័ព្ទទៅបងប្អូនឲ្យមកដឹកយកទៅព្យាបាល នៅមន្ទីរពេទ្យដោយខ្លួនឯង។
រថយន្តខូចខាតមុខផ្នែកខាងស្តាំ បន្តិចបន្តួច រីឯម៉ូតូវិញខូចខាតគួរសមផងដែរ ម៉ូតូ និងរថយន្ត ត្រូវសមត្ថកិច្ចធ្វើការវាស់វែង ដើម្បីយកទៅរក្សាទុកនៅខណ្ឌ៧មករា រង់ចាំធ្វើការដោះស្រាយគ្នាជាក្រោយតាមនីតិវិធី៕ (CEN)
