ដូចដែលបង្ហាញមក ខាងលើនេះ បានធ្វើឲ្យមនុស្ស និងភ្ញៀវមួយចំនួន មានភាពអាក់អន់ស្រពន់ចិត្ត ឬពុំពេញចិត្ត នឹងកន្លែងផ្ញើម៉ូតូ-ឡាន ឬក៏ភោជនីយដ្ឋានមួយចំនួន ដែលពុំបានទទួលការខុសត្រូវទៅលើការបាត់បង់យានជំនិះរបស់ពួកគេ ។ ទោះបីជាកន្លែងទាំងនោះខ្លះបានយកថ្លៃសេវាកម្ម និងខ្លះទៀតឥតគិតថ្លៃយ៉ាងណាក៏ដោយ ហើយពួកគេទាំងនោះបាននិយាយថា “ម៉េចបានមិនទទួលខុសត្រូវ បើគេមកស៊ីអីអស់លុយហើយពេលខ្លះផ្ញើឲ្យលុយទៀត!”។
លោក រិន វាសនា ជាឱសថការីមួយរូប ដែលបានមកពិសារអាហារនៅភោជនីយដ្ឋាន (KFC) មួយកន្លែងនៅទីក្រុងភ្នំពេញ ជាមួយនឹងមិត្តស្រីរបស់គាត់ ដែលកំពុងលេងអ៊ីនធឺណែតយ៉ាងជក់ចិត្តនោះ បានឆ្លៀតឱកាសបន្តិចដើម្បីផ្តល់សម្ភាសន៍ដល់ភ្នាក់ងារសារព័ត៌មាន ស៊ី អ៊ី អិន (CEN) ឲ្យដឹងយ៉ាងដូច្នេះថា រូបលោកពុំមានការសប្បាយចិត្តឡើយ ដែលភោជនីយដ្ឋានពុំបានទទួលខុសត្រូវរាល់ការបាត់បង់យានជំនិះនោះ។
លោក រិន វាសនា បាននិយាយថា “ខ្ញុំគិតថាយើងយកសំបុត្រហ្នឹងដើម្បីបញ្ជាក់ថាមានបញ្ហាអី យកសំបុត្រនឹងទៅបញ្ជាក់ថាយើងបាត់។ យើងយកសំបុត្រហ្នឹងទៅដើម្បីបញ្ជាក់កាលដែលយើងបាត់”។
លោក រិន វាសនា បានបន្តថា “ចំពោះសំបុត្រដែលគេដាក់ថា “មិនទទួលខុសត្រូវ…” អ៊ីចឹងសំបុត្រហ្នឹងដូចអត់មានន័យអីទេ។ អាហ្នឹងគ្រាន់តែថាឲ្យសំបុត្រនេះមកដើម្បីកុំឲ្យច្រឡំម៉ូតូទេ! បើសិនជាមានគេលួចម៉ូតូបាត់ ម៉ូតូយើងនៅតែបាត់អ៊ីចឹង”។
លោក រិន វាសនា បានបន្ថែមថា “ខ្ញុំយល់ថារាល់សំបុត្រម៉ូតូដែលផ្ញើនៅទីនេះ គួរកុំដាក់អក្សរហ្នឹង គឺត្រូវតែមានការទទួលខុសត្រូវរាល់ការបាត់ម៉ូតូចំពោះភ្ញៀវ ដែលគាត់បានហូបអីនៅទីនេះ”។
ចំណែកឯ កញ្ញា សុភី ជានិស្សិតមួយរូប បាននិយាយថា “ខ្ញុំគិតថាអត់ល្អទេ ពីព្រោះអ្នកនោះបានយកលុយពីគេ ទោះជាមិនយកក៏ត្រូវទទួលខុសត្រូវដែរ វាជារបស់យើង។ យើងបានចំណាយលុយទិញអីញ៉ាំហើយតើ!”។
កញ្ញា សុភី បានបន្តថា “ដូចជានៅ សាកលវិទ្យាល័យជាតិគ្រប់គ្រង ធា្លប់មានបទពិសោធន៍បាត់ម៉ូតូដែរ គេសងពេលបាត់ ព្រោះគេមានសំបុត្រត្រឹមត្រួវ និងបានបង់លុយហើយ ទោះបីបានសរសេរថាបាត់មិនទទួលខុសត្រូវក៏ដោយ។ ប៉ុន្តែខ្ញុំនៅតែមានការបារម្ភខ្លាចដដែលហ្នឹង បើគេនៅតែសរសេរអ៊ីចឹង វាអត់មានន័យអីទេ”។
ចំពោះ លោក ជាណុច ជាភ្ញៀវមួយរូប ដែលបានជិះឡានទំនើបមកញ៉ាំស៊ុបជាមួយក្រុមគ្រួសាររបស់គាត់ នៅហាងម៉ាស្ទ័រ ស៊ុគីស៊ុប (MASTER SUKI SOUP) ស្ទើរតែបីដងក្នុងមួយខែនោះ បានឲ្យដឹងថា លោកឆ្ងល់ណាស់ ហេតុអីបានជាហាងទំនើបៗ ឬក៏សណ្ឋាគារមួយចំនួន មានលក់របស់សុទ្ធតែថ្លៃៗ និងតម្លៃបន្ទប់រាប់រយដុល្លារហើយមិនទទួលខុសត្រូវទៅលើការបាត់បង់ យានជំនិះរបស់អតិថិជនសោះ បើនៅតែធ្វើដូច្នេះមិនមានភាពយុត្តិធម៌សោះ ឬតុល្យភាពសម្រាប់ភ្ញៀវ ដែលមកញ៉ាំ ឬស្នាក់នៅសណ្ឋាគារនោះទេ។
លោក ជាណុច បាននិយាយថា “ខ្ញុំអន់ចិត្តណាស់! ទៅស៊ីស៊ុបអស់លុយហើយ មិនទទួលខុសត្រូវពេលបាត់បង់ ធ្វើអ៊ីចឹងមានតែទៅស៊ីហើយអង្គុយមើលតែឡានទៅបានហើយ មិនបាច់ចាំស៊ីទេ។ បើសណ្ឋាគារខ្លះក៏អ៊ីចឹងដែរ ទៅដេកអស់លុយហើយ ពេលឲ្យសំបុត្រឡានមកថា មិនទទួលខុសត្រូវពេលបាត់បង់ ម្ត៉េចបានសរសេរអ៊ីចឹង បើឡានខ្ញុំទិញអស់លុយរាប់ម៉ឺនដុល្លារ មិនបានដេកពួនអីទេមើលតែឡានទៅបានហើយអ៊ីចឹង!”។
ពាក់ព័ន្ធ ទៅនឹងបញ្ហានេះ លោក គន ធារ៉េត អ្នកគ្រប់គ្រងទូទៅនៅភោជនីយដ្ឋាន KFC ATWOOD បានប្រាប់ឲ្យដឹងថា លោកបានធ្វើអ្វីបានត្រឹមតែលោកធ្វើប៉ុណ្ណោះ។ ចំពោះការសរសេរពាក្យថា “ហាងយើងខ្ញុំពុំទទួលខុសត្រូវ រាល់ការបាត់បង់ទោចក្រយានយន្ត-រថយន្ត និងសម្ភារៈ ដែលនៅជាប់នឹងយានជំនិះ!” នៅនឹងប័ណ្ណចតម៉ូតូ-ឡាននោះ គឺជាការបញ្ជាក់ថា ហាងបានត្រឹមតែជួយសម្រួលដល់ខាងផ្នែកចរាចរ ចេញ-ចូលបានស្រួលតែប៉ុណ្ណោះ ព្រមទាំងមានភាពកក់ក្តៅនៅពេល ដែលមានសំបុត្រដាក់ជូនដល់ភ្ញៀវ ហើយពេលខ្លះភ្ញៀវគាត់មិនដែលពិនិត្យមើលទៅសំបុត្រនោះទេ កាលណាមានសំបុត្រហើយគឺគាត់ទុកចិត្តហើយ។
លោក គន ធារ៉េត បានបន្តថា “ខាងហាង (KFC) បានដាក់បុគ្គលិក Parking Attendant នៅទីនោះដើម្បីជួយសម្រួលដល់ភ្ញៀវចេញចូលបានស្រួល។ បើសិនជាមានការបាត់បង់អីនោះ ខាងយើងបានតែជួយសម្រួលដល់គាត់ដើម្បីដាក់ពាក្យបន្តឹងទៅអាជ្ញាធរ ឲ្យជួយដោះស្រាយ និងស្វែងរកតែប៉ុណ្ណោះ”។
លោក គន ធារ៉េត បានបន្ថែមថា “ចំពោះសាខា (KFC) ខ្លះបានដាក់សន្តិសុខក្រុមហ៊ុន ដើម្បីមើលការខុសត្រូវ បើសិនមានការបាត់បង់គឺខាងក្រុមហ៊ុនសន្តិសុខអ្នកទទួលខុសត្រូវជំនួស។ បើចង់ដឹងច្បាស់មានតែថ្នាក់លើទេ ទើបហ៊ានសម្រេចថាយ៉ាងណាយ៉ាងណា”៕
