 |
| អគ្គិសនីកម្ពុជានឹងកាត់ខ្សែបណ្តាញឆ្លងកាត់ផ្លូវ មានកម្ពស់ទាបជាង ១០ម៉ែត្រ |
អគ្គិសនីកម្ពុជា បានប្រកាសជាសាធារណៈថា ដើម្បីបង្កលក្ខណៈ ឲ្យក្បួនដង្ហែព្រះ បរមសព បានដំណើរការរលូនល្អ ពុំមានការ ទើសទាក់ អគ្គិសនីកម្ពុជាស្នើសុំដល់ម្ចាស់ខ្សែទាំងអស់ ដែលបានបំពាក់លើបង្គោលអគ្គិសនីទាញឆ្លងកាត់ទទឹងនិរវិថី ព្រះស៊ីសុវត្ថិ វិថីបក្សីចាំក្រុង មហាវិថីព្រះនរោត្តម មហាវិថីព្រះសីហនុ និង វិថីសម្តេចសុធា ជួយសម្រួលដោះស្រាយទល់ទ្រ ឲ្យបានកម្ពស់ជាង១០ម៉ែត្រ ឬ បង្វែរ មកកប់ ក្នុងដី ឬ កាត់ចេញឲ្យបានមុនថ្ងៃទី១៥ខែកមរាឆ្នាំ២០១៣ជាកំណត់។
នៅក្នុងសេចក្តីប្រកាសជូនដំណឹងនៅថ្ងៃទី៤ ខែធ្នូ ឆ្នាំ២០១២ ចុះហត្ថលេខា ដោយលោក ឆឹង អ៊ឺង អគ្គនាយកស្តីទីអគ្គិសនីកម្ពុជាបានបញ្ជាក់ថា ករណីហួសកាលបរិច្ឆេទដូចបានជម្រាបជូនខាងលើ អគ្គិសនីកម្ពុជានឹងស្នើទៅសាលារាជធានីភ្នំពេញ សុំការសហការកាត់សម្អាតនូវខ្សែដែលទាញ ឆ្លងកាត់ទទឹងផ្លូវទាំងនោះ ដោយមិនទទួលខុសត្រូវរាល់ការខូចខាតនោះឡើយ។
សេចក្តីជូនដំណឹង ខាងលើបានឲ្យដឹងទៀតថា ព្រះបរមសពព្រះករុណាព្រះបាទសម្តេចព្រះនរោត្តមសីហនុ ព្រះមហាវីរក្សក្សត្រ ព្រះវររាជបិតា ជាតិខ្មែរ នឹងត្រូវដង្ហែឆ្លងកាត់តាមនិតិរវិថីព្រះស៊ីសុវត្ថិ វិថីបក្សីចាំក្រុង បត់មួយជុំវត្តភ្នំ មហាវិថីព្រះនរោត្តម មហាវិថីព្រះសីហនុ វិថីសម្តេចសុធារ សឆ្ពោះទៅដល់ទីវាលព្រះមេរុខាងជើងព្រះបរមរាជវាំង។
ព្រះ រាជរថតម្កល់ព្រះបរមមញ្ជូសាព្រះបរមសព មានកម្ពស់១០ម៉ែត្រហើយព្រះរាជពិធីដង្ហែព្រះបរមសពនឹងត្រូវប្រព្រឺ ត្តទៅក្នុងសប្តាហ៍ទីមួយ នៃខែកុម្ភៈ ឆ្នាំ២០១៣ ខាងមុខនេះ។ នេះបើយោងតាមលិខិតលេខ២៣៩គជបអ ចុះថ្ងៃទី១៩ខែវិច្ឆិកាឆ្នាំ២០១២ របស់គណៈកម្មាធិការជាតិរៀបចំបុណ្យជាតិ និងអន្តរជាតិ៕(CEN)
