បុរសម្នាក់ស្លាប់ យ៉ាងអា ណោចអាធ័ម​ ដោយ រថយន្តហ៊ីណូ​ បើកបុកម៉ូតូ វីវ៉ារួចកិន

ភ្នំពេញ៖ បុរសម្នាក់បានស្លាប់ យ៉ាងអាណោចអាធ័ម ក្នុងថ្លុកឈាម ខណៈដែលរូបគេជិះ ម៉ូតូម្នាក់ឯង ហើយត្រូវរថយន្តហ៊ីណូ មួយគ្រឿងបើកបរបុក ពីក្រោយពេញទំហឹង នៅតាមបណ្តោយផ្លូវវេងស្រេង សង្កាត់ស្ទឹង មានជ័យ ខណ្ឌមានជ័យ កាលពីវេលាម៉ោង ២២ និង ១៥នាទីយប់ ថ្ងៃទី៣០ ខែវិច្ឆិកា ឆ្នាំ២០១២ ។
យោងតាមសេចក្តីរាយការណ៍ពីកន្លែងកើតហេតុបានឲ្យដឹងថា បុរសដែលស្លាប់ក្នុងហេតុការណ៍ គ្រោះថ្នាក់ ចរាចរណ៍ ខាងលើនេះមានឈ្មោះ ម៉ៅ ស៊ីថាន ភេទប្រុស អាយុ ២៧ ឆ្នាំជាអ្នករត់ម៉ូតូឌុប មានស្រុកកំណើត នៅខេត្តស្វាយរៀង ជិះម៉ូតូម៉ាកវីវ៉ា ពណ៌ខ្មៅ ពាក់ស្លាកលេខ តាកែវ 1C-8432 បានជិះម៉ូតូក្នុងទិសដៅពីលិច ទៅកើតតាមបណ្តោយផ្លូវវេងស្រេង ពេលជិះមកដល់ចំណុចភូមិដំណាក់ធំ២ សង្កាត់ស្ទឹងមានជ័យ ស្រាប់តែ មានរថយន្តធុនធំមួយគ្រឿង ម៉ាកហ៊ីណូ ពណ៌ក្រហម លាយខៀវ ពាក់ស្លាកលេខភ្នំពេញ 3A-0103 បានបើកបរ ក្នុងល្បឿនលឿន រួចជ្រុលចង្កូតបុក បុរសឈ្មោះ ម៉ៅ ស៊ីថាន ពីក្រោយពេញទំហឹងតែម្តង បណ្តាលឲ្យ កិនបុរស ជាម្ចាស់ម៉ូតូវីវ៉ា បាក់ចង្កេះស្លាប់ភ្លាមៗនៅនឹងកន្លែងកើតហេតុ ។ ចំណែករថយន្តបង្កហេតុត្រូវបាន សមត្ថកិច្ច ឃាត់បាន ភ្លាមៗតែម្តង ប៉ុន្តែអ្នកបើកបររថយន្តបានរត់គេចខ្លួនបាត់ស្រមោសលតែម្តង ។
ក្រោយពីកើតហេតុសមត្ថកិច្ច នគរបាលចរាចរណ៍ ខណ្ឌមានជ័យ បានសហការជាមួយនគរបាល ចរាចររាជធានី ចុះវាស់វែងនាំយករថយន្តបង្កហេតុ និងម៉ូតូរបស់ជនរងគ្រោះទៅរក្សាទុកនៅការិយាល័យចរាចរណ៍ជើងគោក រាជធានីភ្នំពេញ ដើម្បីចាត់តាមនិតីវិធីច្បាប់៕