ខេត្ដស្វាយរៀង ៖
ក្មេងស្ទាវ២នាក់ក្នុង ចំណោម៥នាក់ត្រូវសមត្ថកិច្ចនគរបាល
ស្រុកស្វាយទាប សហការជាមួយប៉ុស្ដិ៍ រដ្ឋបាលឃុំពពែត
ចុះស្រាវជ្រាវនិងឃាត់ ខ្លួននៅថ្ងៃទី២៩ ខែវិច្ឆិកា ឆ្នាំ២០១២
បន្ទាប់ពីយុវជនទាំង៥នាក់បានរត់គេចខ្លួន
ក្រោយពីធ្វើសកម្មភាពបង្កអុកឡុក
ក្នុងពិធីរាំធុងបាស់ក្នុងវត្ដពពែតចាស់ កាលពីថ្ងៃទី២៨
ខែវិច្ឆិកា ឆ្នាំ២០១២ វេលាម៉ោង១០និង៤០នាទីយប់ ស្ថិតក្នុង
បរិវេណវត្ដពពែតចាស់ ភូមិស្វាយគយ ឃុំពពែត ស្រុកស្វាយទាប ។លោកសួស សារិន នាយការិយាល័យ ព្រហ្មទណ្ឌកម្រិតស្រាលនៃស្នងការដ្ឋាន នគរបាលខេត្ដបានឱ្យដឹងថា ក្មេងស្ទាវ ដែលសមត្ថកិច្ចឃាត់ខ្លួនមានឈ្មោះ ញឹម ហើម អាយុ២២ឆ្នាំ និងឈ្មោះនៃ សំ អាយុ១៨ឆ្នាំ ជាសិស្សថ្នាក់ទី១២ ខណៈជន សង្ស័យទាំង២នាក់នេះមានទីលំនៅក្នុងភូមិ គុម្ពោតម្រះ ឃុំពពែត ស្រុកស្វាយទាប ។
លោកសួស សារិន បន្ដថា រីឯជន សង្ស័យដែលសមត្ថកិច្ចកំពុងស្វែងរក ចាប់ខ្លួនមាន ១-ឈ្មោះប៉ុល ពិសិដ្ឋ អាយុ២៣ឆ្នាំ មានទីលំនៅក្នុងភូមិទួល ច្រេស ឃុំពពែត ជាជនដៃដល់កាប់ទៅ លើជនរងគ្រោះ, ២-ឈ្មោះយឹម សង្ហា អាយុ២២ឆ្នាំ និង៣-ឈ្មោះអុក ភារុណ អាយុ២២ឆ្នាំ ជនសង្ស័យទាំង២នាក់រស់ នៅក្នុងភូមិគុម្ពោតម្រះ ឃុំពពែត ស្រុកស្វាយទាប ។
រីឯជនរងគ្រោះដែលត្រូវជនសង្ស័យ កាប់ឱ្យរងរបួសធ្លាយពោះវៀនមានឈ្មោះ ឈុំ រិទ្ធិ អាយុ២២ឆ្នាំ មុខរបរធ្វើស្រែ រស់ នៅក្នុងភូមិស្វាយគយ ឃុំពពែត និងជន រងគ្រោះម្នាក់ទៀតឈ្មោះអ៊ុក ជា អាយុ ២៥ឆ្នាំ មានទីលំនៅក្នុងភូមិអូតាមង ឃុំ មនោរម្យ ស្រុកស្វាយទាប រងរបួសរយះ ខ្នង ដៃខាងឆ្វេង ត្រូវបានក្រុមគ្រួសារ បញ្ជូនទៅមន្ទីរពេទ្យបង្អែកជីភូ ក្រុងបាវិត ។
នៅព្រឹកថ្ងៃទី១ ខែធ្នូ ឆ្នាំ២០១២ យុវជនសង្ស័យទាំង២នាក់ត្រូវសមត្ថកិច្ចកសាង សំណុំរឿងបញ្ជូនទៅសាលាដំបូងខេត្ដ ដើម្បីចាត់ការតាមច្បាប់ ។ រីឯជន សង្ស័យ៣នាក់ទៀតសមត្ថកិច្ចកំពុងស្វែង រកការចាប់ខ្លួនផងដែរ ៕(NOKORWAT)
