 |
| អតីតអភិបាលក្រុងបាវិត ខេត្តស្វាយរៀង លោក ឈូក បណ្ឌិត |
ព្រះរាជអាជ្ញា អមសាលាដំបូង ខេត្តស្វាយរៀង លោក ហ៊ីង ប៊ុនជា បានប្រាប់អ្នកកាសែត នៅថ្ងៃទី១៨ ខែធ្នូ ឆ្នាំ២០១២ ថា តាមរយៈការស៊ើបអង្គេតរបស់តុលាការ និងវត្ថុតាង ពុំមានគ្រប់គ្រាន់ ដើម្បីដាក់សំអាងចោទលើលោក ឈូក បណ្ខិត ទេ។ ដូច្នេះលោកបានសំរេចលើកលែងការចោទប្រកាន់លើអតីតអភិបាលក្រុងបាវិត កាលពីសបា្តហ៍មុន។
ក្រោយពីប៉ូលិសក្រសួងមហាផ្ទៃ បានបញ្ជូនសំណុំរឿងទៅកាន់តុលាការ ខេត្តស្វាយរៀង តុលាការក៏បានចោទប្រកាន់លោក ឈូក បណ្ឌិត ពីបទបង្ករបួសស្នាម ដោយអចេតនា។
លោក ឈូក បណ្ឌិត អតីតអភិបាលក្រុងបាវិត ជាប់ចោទក្នុងរឿងបាញ់ស្ត្រីកម្មករ ៣ នាក់ ឲ្យរបួសធ្ងន់ ស្ទើរតែស្លាប់ នៅពេលក្រុមកម្មករ ផ្ទុះការតវ៉ាក្នុងតំបន់សេដ្ឋកិច្ចពិសេស មេនហាតធេន នៅទីក្រុងបាវិត ជាប់ព្រំដែនវៀតណាម កាលពីថ្ងៃទី២០ ខែកុម្ភៈ ឆ្នាំ២០១២។
យ៉ាងណាក៏ដោយ ចំពោះការសម្រេចរបស់តុលាការខេត្តស្វាយរៀង ក្នុងការលើកលែងការចោទប្រកាន់លើអតីតអភិបាលក្រុងបាវិត ដូច្នេះ ត្រូវបានលោក មឿន តុលា ប្រធានផ្នែកសិទ្ធិការងារ របស់មជ្ឈមណ្ឌលអប់រំច្បាប់ សម្រាប់សហគមន៍ បានសម្តែងការភ្ញាក់ផ្អើល និងហួសចិត្ត។
លោក មឿន តុលា បានមានប្រសាសន៍ថា "មែនទែនទៅ អារម្មណ៍ខ្លួនឯង ដូចជា មិនជឿ។ មិនជឿថា តុលាការលើកលែងការចោទប្រកាន់ទៅលើលោក ឈូក បណ្ឌិត។ ប៉ុន្តែបើក្នុងករណីលើកលែងការចោទប្រកាន់ពិតប្រាកដមែន វាជារឿងមួយចម្លែកខ្លាំងមែនទែន ហើយខ្ញុំគិតថា វាមានរឿងមិនប្រក្រតីច្រើនកើតឡើង ក្នុងរឿងនឹង..."។
សកម្មជនសិទ្ធិមនុស្ស ដែលតែងតែឃ្លាំមើលលើករណីកម្មករ លោក មឿន តុលា ក៏បានបន្ថែមថា "តុលាការគួរតែពិចារណាឡើងវិញ ពាក់ព័ន្ធរឿងនេះ។ រឿងនេះ ( ករណីលោក ឈូក បណ្ឌិត បាញ់ស្ត្រីកម្មករ ៣ នាក់ ឲ្យរងរបួសធ្ងន់ ) មានការឃ្លាំមើល ទាំងសហគមន៍ជាតិ និងទាំងអន្តរជាតិ ជាពិសេសក្រុមអ្នកបញ្ជាទិញផលិតផលកាត់ដេរ ពីស្រុកខ្មែរ គេតាមដានរឿងនេះ ដិតដល់ណាស់ ហើយសមាគមអ្នកប្រើប្រាស់ទំនិញស្បែកជើង ខោអាវ ដែលនាំចេញពីស្រុកខ្មែរយើងនឹង គេកំពុងតាមដានរឿងនឹង សំបើមណាស់។ អីចឹង បើកាលណាយើង ធ្វើអីដែលមិនល្អ បង្កឲ្យអ្នកដែលបង្ករបួសស្នាម ឬក៏បង្កហេតុនឹង រួចខ្លួន ដោយសេរីអីចឹង វាធ្វើឲ្យនិរទណ្ឌភាព ( ការរួចទោស ) វាមាននៅស្រុកខ្មែរ។ អីចឹង វាធ្វើឲ្យខូចកេរិ៍ឈ្មោះដល់ទំនិញរបស់គេ និងខូចគេឈ្មោះដល់ក្រុមហ៊ុនគេ។ អីចឹងគឺខ្ញុំគិតថា កម្ពុជាយើងពិបាក នឹងស្តារមុខមាត់"។
ជាមួយគ្នានោះ លោក មឿន តុលា ក៏បានអំពាវនាវទៅកាន់អង្គភាពប្រឆាំងអំពើពុករលួយ របស់លោកទេសរដ្ឋមន្ត្រី ឱម យ៉ិនទៀង ដែលបានប្រកាសមុខមាំក្នុងការប្រឆាំងអំពើពុករលួយ គួរតែពិចារណា បើកការស៊ើបអង្កេតលើករណីនេះ ព្រោះមានរឿងមិនប្រក្រតី ក្នុងដំណើរការស៊ើបអង្កេតករណីរឿងក្តីនៅតុលាការខេត្តស្វាយរៀងនោះ ហើយបើសិនជាមានមែន អ្នកប្រព្រឹត្តនឹង គួរតែត្រូវបានទទួលទោស៕(CEN)
