 |
| សុគន្ធ និសាបង្កើតការសង្ស័យថ្មី |
ទស្សនាវ ដ្តីអង្គរធំ បានរាយការណ៍ថា តារាចម្រៀង សុគន្ធ និសា បានបង្ហោះរូបភាពសិ្នទ្ធស្នាលជាមួយបុរស ដែលគេសង្ស័យថា ជាសង្សារថ្មីនាងនៅអាមេរិក ធ្វើឲ្យមានការលើកឡើងថា ហាក់បីដូចជាបានវាយបំបាក់ទឹកចិត្តអតីតគូស្នេហ៍ លោក សុខ ជំនោរ មិនឲ្យគេងយោលអង្រឹងទន្ទឹងរង់ចាំផ្លូវនាងទៀតទេ ព្រោះបេះដូងនាងបានបើកចំហជើងមេឃទទួលយកស្នេហាថ្មីទៀតហើយ ខណៈដែលលោក សុខ ជំនោរ នៅតែទ្រាំរង់ចាំផ្តើមស្នេហាជាថ្មីនោះ។
ថ្មីៗនេះ និសា មានបុរសៗ ទាំងចាស់ទាំងក្មេងស្ទាវៗ នៅអាមេរិក ចោមថតរូបជាមួយ បន្ទាប់ពីនាងសម្រាកមួយភ្លែតក្រោយពីការច្រៀង តែនាងពុំបានបណ្តែតបណ្តោយខ្លួនឲ្យស្និទស្នាល ជាមួយអ្នកដែលនាងមិនសូវស្គាល់នោះទេ ខ្លាចគេបន្លំកេងយកចំណេញ ហើយអ្នកដែលអាចវាចាឆ្លងឆ្លើយជាមួយនាងបានយូរ ច្រើនតែជាមនុស្សដែលរូបនាងទុកចិត្ត ឬស្គាល់គ្នាតាំងពីមុនមក។
ថ្វីបើយ៉ាងនេះក្តី ក៏មានរូបភាពខ្លះ ហាក់បានបង្ហាញពីការរាប់អានគ្នាមិនធម្មតា ជាមួយបុរសពីរនាក់ ដែលត្រូវនិសាដាក់បង្ហោះតាមបណ្តាញសង្គម Facebook របស់នាង ដោយប្រើឈ្មោះផ្សេង។ សកម្មភាពបែបនេះកើតមានបន្ទាប់ពីមុននេះ ដោយមានដំណឹងថា អ្នកអាមេរិកជាបុរសសម្បូរណ៍ទ្រព្យធនហូរហៀរម្នាក់ បានតាមចែចង់ដាក់ CV សុំស្នេហ៍សុគន្ធ និសា តាំងពីនាងបានចាកចេញទៅច្រៀងនៅអាមេរិក កាលពីជើងទី១ ខែមេសា ឆ្នាំ២០១២ មកម្ល៉េះ។
ក្នុងគ្រាដែល សុគន្ធ និសា ហាក់បីដូចជាបានបើកចិត្តចំហទូលាយបន្តិច នៅលើ Facebook មិនលាក់លៀមនឹងបុរសៗ ដែលនាងកំពុងតែនៅកៀក ដើម្បីធ្វើការជ្រើសរើសយកមកជួសជុលបេះដូងរបស់នាង នាំឲ្យមានការលើកឡើងថា នេះជាចេតនារបស់ស្រីស្អាតនិសាតែម្តង ចង់បំបាក់ទឹកចិត្តអតីតគូស្នេហ៍ លោក សុខ ជំនោរ ឲ្យឈប់រង់ចាំផ្តើមស្នេហ៍ជាថ្មីជាមួយនាងទៀត។
លោក សុខ ជំនោរ អតីតគូស្នេហ៍ សុគន្ធ និសា ត្រូវបានដកស្រង់សម្តីដែលនិយាយថា ដោយសារតែមួយរយៈនេះរវល់ពេក ទើបលោកមិនទាន់ឃើញរូបភាពទាំងនោះ។
លោក សុខ ជំនោរ បាននិយាយថា “ខ្ញុំអត់ទាន់បានឃើញរូបភាពគាត់ (និសា) ថតជាមួយអ្នកណាស្និទ្ធស្នាលទេ ព្រោះរវល់ពេក អ៊ីចឹងមិនទាន់អាចវាយតម្លៃបានសោះថា ស្និទ្ធស្នាលបែបណា ដោយសារតែខ្ញុំអត់ទាន់បានប្រទះមែន”។
ប្រសិនបើបុរសកៀកកើយ និសានោះ ជាម្ចាស់ចិត្ត ឬគូស្នេហ៍ថ្មី សុគន្ធ និសា មែន ចំពោះលោក ជំនោរ គិតថា នេះជាការវាយប្រហារបំបាក់ទឹកចិត្តរបស់លោក ដើម្បីកុំឲ្យចាំនាងទៀត ឬយ៉ាងណា? ហើយលោក ជំនោរ ខូចចិត្តទេ?
កវីនិពន្ធខកស្នេហ៍រូបនេះ បាននិយាយការពារម្ចាស់ចិត្តរបស់ខ្លួនថា “អូ! បើតាមដឹង កាលពីបីឆ្នាំមុន រូបជិតស្និទ្ធអ៊ីចឹង ច្រើនតែអ្នកស្និទ្ធស្នាលជាមួយ និសា ជាអ្នកស្គាល់គ្នាពីមុន ហើយជាអ្នកគាំទ្រ។ នៅស្រុកគេ ជួនកាលក្មេងអាយុតិចទេ តែមើលទៅធំ ហើយជាអ្នកគាំទ្រ ទើបហ៊ានថតក្បែរគ្នា មិនមែនស្នេហាទេ តែអាហ្នឹងជារឿងប៉ុន្មានឆ្នាំមុន ឥឡូវខ្ញុំមិនដឹងច្បាស់ថា គាត់ (និសា) ហ្នឹងយ៉ាងម៉េចទេ”។
លោក ជំនោរ បានបញ្ជាក់ថា “បើសិនជាបុរសនោះជាអ្នកថ្មីគាត់មែន ខ្ញុំក៏មិនខូចចិត្តអីធ្ងន់ធ្ងរទេ អាចតិចតួចដែរ តែចិត្តខ្ញុំនៅតែដូចមុន (ស្រឡាញ់) តែមិនដឹងថា គេយ៉ាងម៉េចទេ?”៕ S(CEN)
