ភ្នំពេញ:
ព្រះមហាក្សត្រ និងសម្តេចម៉ែ
បានផ្ញើព្រះរាជសារួមគ្នា អរគុណដល់សម្តេចនាយករដ្ឋមន្ត្រី ហ៊ុន សែន
ចំពោះការចាត់ចែងរៀបចំព្រះរាជពិធីបុណ្យថ្វាយសម្តេចឪ សម្តេចព្រះ
នរោត្តម សីហនុ។ គុណបំណាច់របស់សម្តេចនាយករដ្ឋមន្ត្រី ហ៊ុន សែន
ត្រូវបានលើកបង្ហាញ រួមទាំងព្រះរាជបន្ទូលរបស់សម្តេចឪ
ដែលបានកោតសរសើរដល់វីរភាពរបស់សម្តេច ហ៊ុន សែន
ក៏ត្រូវបានព្រះករុណាទាំងពីរព្រះអង្គ
គូសបញ្ជាក់ជូនសម្តេចប្រមុខរាជរដ្ឋាភិបាល ហ៊ុន សែន ផងដែរ។ ក្នុងព្រះរាជសាររួមគ្នា ចុះថ្ងៃទី៨ ខែវិច្ឆិកា ឆ្នាំ២០១២ ព្រះករុណា ព្រះមហាក្សត្រ នរោត្តម សីហមុនី និងសម្តេចម៉ែ សម្តេចព្រះ នរោត្តម មុនីនាថ សីហនុ ផ្តើមដំបូងឡើយ ដោយសំដែងនូវអំណរគុណ និងកតវេទិតាដ៏ជ្រាលជ្រៅជាទីបំផុត ជូនសម្តេចនាយករដ្ឋមន្ត្រី ហ៊ុន សែន ដែលមានហឫទ័យដ៏សប្បុរសជាទីបំផុត ក្នុងការអញ្ជើញទៅកាន់រដ្ឋធានីប៉េកាំង ដង្ហែព្រះបរមសពព្រះករុណា សម្តេចឪ យាងមកកាន់រាជធានីភ្នំពេញ និងណែនាំចាត់វិធានការយ៉ាងល្អិតល្អន់គ្រប់ជ្រុងជ្រោយ ដោះស្រាយសំរួលគ្រប់កិច្ចការបានឆាប់រហ័ស ថ្វាយព្រះបរមសពព្រះករុណា ព្រះវររាជបិតាជាតិខ្មែរ បានសក្តិសមនឹងព្រះកិត្តិយស ព្រះកិត្តិនាម ជាព្រះមហាវីរក្សត្រ នៃប្រជាជាតិ ប្រជារាស្ត្រកម្ពុជា។
ព្រះមហាក្សត្រ និងសម្តេចម៉ែ ក៏បានគូសបញ្ជាក់ជម្រាបជូនសម្តេច ហ៊ុន សែន ថា "ពាក្យពេចន៍សច្ចាប្រណិធាន ដែលសម្តេចអគ្គមហាសេនាធិបតីតេជោ បានថ្លែងជាឱឡារិក នៅចំពោះមុខព្រះបរមសព នាំឲ្យហឫទ័យរបស់យើងខ្ញុំ រំជួលក្តុកក្តួលឥតឧបមា ហើយជាកម្លាំងចិត្តចំពោះយើងខ្ញុំ នៅក្នុងឱកាសដ៏មហាសែនក្រៀមក្រំ ពោរពេញទៅដោយមហាទុក្ខប៉ុនភ្នំព្រះសុមេរុ"។
ជាមួយគ្នានោះ ព្រះករុណា ព្រះមហាក្សត្រ និងសម្តេចម៉ែ ក៏បានលើកឡើងថា "យើងខ្ញុំចងចាំជាដរាបនូវគុណូបការគុណដ៏ធំធេង នៃសម្តេចអគ្គមហាសេនាបតីតេជោ និងលោកជំទាវធំកិត្តិព្រឹទ្ធបណ្ឌិត ដែលបានអញ្ជើញទៅកាន់រដ្ឋធានីប៉េកាំង យាងព្រះករុណា ព្រះវររាជបិតាជាតិខ្មែរ មាតុភូមិនិវត្តន៍មកកាន់មាតុប្រទេស នៅថ្ងៃទី១៤ ខែវិច្ឆិកា ឆ្នាំ១៩៩១ ហើយបានថ្វាយព្រះអង្គនូវព្រះឋានៈជាប្រមុខរដ្ឋ នៃកម្ពុជា។ ទង់ជាតិ ភ្លេងជាតិ នៃព្រះរាជាណាចក្រកម្ពុជា បានបដិសន្ធិឡើងវិញ នៅលើទឹកដីអង្គរដ៏បវររុងរឿង។ ថ្នាក់ដឹកនាំគណបក្សប្រជាជនកម្ពុជា បានថ្វាយយុត្តិធម៌ដល់ព្រះករុណា ព្រះវររាជបិតាជាតិខ្មែរ ក្នុងការបំរើប្រជាជាតិ មាតុភូមិ ប្រជារាស្ត្រកម្ពុជា និងជូនសង្គមរាស្ត្រនិយម"។
ជាមួយគ្នានោះ សម្តេចព្រះករុណា ព្រះមហាក្សត្រ និងសម្តេចម៉ែ ក៏បានគូសបញ្ជាក់ជម្រាបជូនសម្តេច ហ៊ុន សែន ថា "សម្តេចអគ្គមហាសេនាបតីតេជោ និងលោកជំទាវធំ កិត្តិព្រឹទ្ធបណ្ឌិត បានសំដែងនូវមនោសញ្ចេតនាដ៏ជ្រាលជ្រៅ បានចូលរួមប្រារព្ធពិធីបុណ្យឧទ្ទិសថ្វាយព្រះវិញ្ញាណក្ខ័ន្ធ ព្រះករុណា ព្រះវររាជបិតាជាតិខ្មែរ នៅក្នុងឱកាសថ្ងៃខួបចំរើនព្រះជន្មាយុ គំរប់ ៩០ ព្រះវស្សា នៅថ្ងៃទី៣០-៣១ ខែតុលា ឆ្នាំ២០១២ ដែលមានសម្តេចព្រះមហាសង្ឃរាជទាំងពីរគណៈ និងព្រះសង្ឃ ចំនួនសរុប ៩២ អង្គ"។
ព្រះរាជសាររបស់ព្រះករុណាទាំងពីរព្រះអង្គ ក៏បានគូសបញ្ជាក់ថា "ព្រះករុណា ព្រះវររាជបិតាជាតិខ្មែរ រមែងសំដែងនូវការកោតសរសើរដ៏កក់ក្តៅបំផុត ចំពោះសម្តេចអគ្គមហាសេនាបតីតេជោ អ្នកដឹកនាំជាតិដ៏ឈ្លាសវៃ ប៉ិនប្រសព្វ ក្នុងការបំរើប្រជាជាតិ មាតុភូមិ និងប្រជារាស្ត្រកម្ពុជា។ សមិទ្ធិផលដ៏ច្រើនសន្ធឹកសន្ធាប់ ពាសពេញព្រះរាជាណាចក្រកម្ពុជា គឺជាសក្ខីកម្មជាប្រវត្តិសាស្ត្រ នៃការបំពេញបេសកកម្មដ៏ឧត្តុង្គឧត្តមរបស់សម្តេចអគ្គមហាសេនាបតីតេជោ ដើម្បីជាឧត្តមប្រយោជន៍ប្រជាជាតិ និងប្រជារាស្ត្រកម្ពុជា"៕
