ងាកមក មើលតារាចម្រៀង ពៅ បញ្ញាពេជ្រ ដ៏អភ័ព្វនោះ ថ្មីនេះៗបានចូលស្រុកវិញហើយ ដោយសារតែក្រុមគ្រួសាររបស់នាងពុំមានលទ្ធភាពរកប្រាក់បញ្ជូនឲ្យ នាងដើម្បីបង់ថ្លៃថ្នាំពេទ្យដូចមុនទៀតហើយ គឺត្រូវតែវិលមករកស្រុកកំណើតរបស់ខ្លួនវិញ។
ពៅ បញ្ញាពេជ្រ បានវិលត្រឡប់មកពីទីក្រុងបាងកក ប្រទេសថៃ ដើម្បីមកព្យាបាលនៅកម្ពុជាវិញ អស់រយៈពេលជិត២ខែហើយ។ នាងបាននិយាយថា “ខ្លួននាងពិការបែបនេះ មានតែសង្ឃឹមទៅលើការជួយជ្រោមជ្រែងពីសំណាក់ប្រជាជនដែលបានគាំទ្រ។ ខ្ញុំ ជាបងប្អូនខ្មែរដូចគ្នា ហើយនាងខ្ញុំក៏លែងគិតព្រួយបារម្ភពីសុវត្ថិភាពអ្វីទៀតដែរ”។
ដោយឡែក តារាសាច់សខ្ចី សុខ ពិសី ឯណេះវិញដែរ បានទៅបង្ហាញខ្លួននៅមុខព្រះបរមរាជវាំង ក្នុងពិធីគោរពព្រះវិញ្ញាណក្ខន្ធព្រះមហាវីរក្សត្រ នរោត្តម សីហនុ ហើយមានសាក្សីជាច្រើននាក់បានឃើញផ្ទាល់ថា តារារូបនេះមិនមានផ្ទៃពោះទេ គ្រាន់តែនាងឡើងសាច់ជាងមុនបន្តិច ឯការបង្ហាញខ្លួននោះក៏ដូចជាអំពិលអំពែកទៅទៀត ព្រមទាំងមិនបានផ្តល់បទសម្ភាសន៍ដល់អ្នកសារព័ត៌មានទេ។
សូម រំឭកថា ក្រុមហ៊ុនសាន់ដេ បានប្រកាសថា នឹងរៀបចំធ្វើសន្និសីទកាសែតទ្រង់ទ្រាយធំមួយ ដើម្បីលាងសម្អាតព័ត៌មានអាស្រូវថា សុខ ពិសី មានផ្ទៃពោះ ប៉ុន្តែរហូតមកដល់ពេលនេះទៅហើយ ខាងក្រុមហ៊ុននៅតែអះអាងថា មិនទាន់ដល់ពេល ព្រោះថាត្រូវរៀបចំទៅលើគម្រោងបទចម្រៀងនាងសិន ដើម្បីប្រមែប្រមូលការគាំទ្រឡើងវិញ៕
