ក្រុមប្រឹក្សាស្រុកដែលរងការចោទប្រកាន់រូប
នោះត្រូវបានគេស្គាល់ឈ្មោះជា ឈឿង អាយុ៦២ឆ្នាំ
មានទីលំនៅភូមិឧទម្ពរ ឃុំស្វាយជ្រុំ ស្រុករលាប្អៀរ ។ លោកជា
ឈឿង ត្រូវបានមន្ត្រីប៉ូលិសព្រហ្មទណ្ឌកម្រិតស្រាល
នៃស្នងការដ្ឋាននគរបាលខេត្ត
ធ្វើការកោះហៅសាកសួរនៅល្ងាចថ្ងៃទី៧ វិច្ឆិកា
ហើយបានបញ្ជូនទៅតុលាការ
និងបានធ្វើការសាកសួររយៈពេលពេញមួយថ្ងៃ គឺថ្ងៃទី៨ វិច្ឆិកា
ទើបសម្រេចឃុំខ្លួនតែម្តង ។
យោងតាមប្រភពមន្ត្រីប៉ូលិសដែលសុំមិនបញ្ចេញឈ្មោះបាននិយាយថា
លោកជា ឈឿង ត្រូវបានដើមបណ្តឹងឈ្មោះសុខ ប៊ុន
មានទីលំនៅក្រុងភ្នំពេញ
ប្តឹងពីបទឆបោកប្រាក់ចំនួន២៥ម៉ឺនដុល្លារ ។ ប្រភពដដែលបន្តថា
លោកជា ឈឿង បានទទួលប្រាក់ដើមបណ្តឹងចំនួន២៥ម៉ឺនដុល្លារ
កាលពីថ្ងៃទី៩ មេសា ២០១២ ដើម្បីទិញ និងរៀបដីចំនួន១.៣០០ហិកតា
ប៉ុន្តែរហូតមកដល់ពេលនេះមិនបានដីអ្វីទាំងអស់ ។
លោកពេញ វិបុល
ព្រះរាជអាជ្ញាអមសាលាដំបូងខេត្តបាននិយាយនៅព្រឹកថ្ងៃទី៩
វិច្ឆិកា នេះថា លោកជា ឈឿង បានទទួលស្គាល់ថា
លោកពិតជាបានទទួលប្រាក់ចំនួន២៥ម៉ឺនដុល្លារនោះពិតមែន
ដោយលោកបានទិញដីចំនួន៣៥០ហិកតា
និងបានធ្វើលិខិតស្នាមផ្ទេរឱ្យឈ្មោះសុខ ប៊ុន
ម្ចាស់ដើមបណ្តឹងហើយដែរ ។ លោកព្រះរាជអាជ្ញាបានបញ្ជាក់ថា
ប៉ុន្តែលិខិតដីធ្លីនោះ គឺគ្មានដីពិតប្រាកដទេ
វាជាដីរបស់ប្រជាពលរដ្ឋទាំងអស់មានន័យថា
លិខិតស្នាមខ្យល់តែប៉ុណ្ណោះ ។ ដោយហេតុនេះ
ហើយលោកបានសម្រេចចោទប្រកាន់ក្នុងបទ «ឆបោក»
និងបានបញ្ជូនសំណុំរឿងនេះទៅចៅក្រមសាកសួរបន្ត ។
