 |
| ចាប់ទាហាទ័ពអាកាស៥ នាក់ ដែលជាជើងកាងប្រចាំភូមិក្រាំងលាវ ពីបទ គម្រាមក្រុមយុវជនស្ម័គ្រចិត្ដ |
ប្រភពពីសមត្ថកិច្ចមូលដ្ឋានបានឲ្យដឹងថា នៅវេលាម៉ោង១៧និង១០នាទីល្ងាច ថ្ងៃទី៥ ខែវិច្ឆិកា ឆ្នាំ២០១២ លោកអួង វិរៈ ប្រធានក្រុមយុវជនស្ម័គ្រចិត្ដក្រុមទី៩០ រួមដំណើរជាមួយនិង យុវជន២នាក់ទៀត ដោយជិះម៉ូតូមួយគ្រឿងឌុបគ្នា៣នាក់ចេញពីកន្លែងស្នាក់នៅ (វត្ដក្រាំងលាវ ) ឆ្ពោះមកកាន់ផ្លូវជាតិលេខ៥ លុះមកដល់ចំណុចស្ពានមួយក្បែរព្រលានយន្ដហោះ ខេត្ដកំពង់ឆ្នាំង ក៏ជួបនិងក្រុមជនបង្កមានគ្នា៥នាក់ជិះម៉ូតូ៣គ្រឿង ក្នុងនោះមានម៉ូតូ១គ្រឿងបានជិះមកឆាបម៉ូតូ ក្រុមនិស្សិតស្ម័គ្រចិត្ដ ឃើញដូចនេះខាងក្រុមនិស្សិតបានឈប់ម៉ូតូ ហើយងាកទៅមើលក្រុមដែលជិះម៉ូតូឆាបនោះ ស្រាប់តែក្រុមជនបង្កនាំគ្នាឈប់ម៉ូតូដើរសំដៅមកក្រុមនិស្សិត ដោយមានកាន់ កាំបិតប៉័ងតោផងបានស្រែកជេប្រមាថនិងគម្រាម ដល់ក្រុមនិស្សិតទាំង៣នាក់នោះ។ ឃើញដូចនេះ លោកអួង វិរៈ ប្រធានក្រុមយុវជនស្ម័គ្រចិត្ដ ក្រុមទី៩០ ដែលស្ថិតក្នុងហេតុការណ៍នេះដែរ បានទូរស័ព្ទសុំការអន្ដរាគមន៍ពីសមត្ថកិច្ច។ នៅពេលសមត្ថកិច្ចមកដល់ក្រុមជនបង្កបាននាំគ្នាជិះម៉ូតូចូលទៅ ក្នុងទីបញ្ជារការទ័ពអាកាស ដែលមានទីតាំងស្ថិតក្នុងបរិវេណព្រលានយន្ដខេត្ដកំពង់ឆ្នាំង គេចខ្លួនតែម្ដង។
ប្រភពខាងលើបានឲ្យដឹងទៀតថា នៅក្រោយពេលកើតហេតុភ្លាមៗនោះលោក ចេង ញ៉ាន់ ដែលជាអភិបាលរងខេត្ដកំពង់ឆ្នាំង បានដឹកនាំកម្លាំង ប៉ូលិស និងប៉េអឹម ចុះទៅកាន់កន្លែងកើត ហេតុ ដើម្បីស្រាវជ្រាវចាប់ខ្លួនជនបង្ក។ ដោយមានកិច្ចសហការពីមេបញ្ជារការទ័ពអាកាស ជនបង្ក ៤ នាក់ត្រូវបានប្រគល់ឲ្យសមត្ថកិច្ចទាំងយប់ និងម្នាក់ទៀតត្រូវបានឪពុករបស់ខ្លួននាំយកមកប្រគល់ឲ្យសមត្ថកិច្ចនៅ ព្រឹកថ្ងៃទី៦ វិច្ឆិកា។
លោកវរសេនីយ៍ត្រី លឹម ហាក់ នាយការិយាល័យស្រាវជ្រាវបទល្មើសព្រហ្មទណ្ឌ អាវុធហត្ថកំពង់ឆ្នាំង បានឲ្យដឹងថា ជនទាំង៥នាក់ដែលត្រូវសមត្ថកិច្ចចាប់ខ្លួននេះ ១-ឈ្មោះ ថាន សុវណ្ណដេត ហៅ តុលា ភេទប្រុស អាយុ១៩ឆ្នាំ មានទីលំនៅភូមិកោះកំពង់ត្រំ ឃុំកោះនិមិត្ដ ស្រុកកំពង់សៀម ខេត្ដកំពង់ចាម ជននេះមានក្របខ័ណ្ឌជាយោធាទ័ពអាកាស និងត្រូវជាកូនរបស់ លោកវរសេនីយ៍ ទោ អ៊ី សារិន មន្ដ្រីទ័ពអាកាសកំពង់ឆ្នាំង។ ២-ឈ្មោះ មុជ ចាន់ណាវុធ ហៅម៉ាប់ ភេទប្រុស អាយុ២៧ឆ្នាំ មានទីលំនៅឃុំបន្ទាយព្រាល ស្រុករលាប្អៀរ ខេត្ដកំពង់ឆ្នាំង។ ៣-ឈ្មោះ អ៊ុន ឡុង ភេទប្រុស អាយុ១៩ឆ្នាំ មានទីលំនៅភូមិពោធិព្រះសង្ឃ ឃុំតាភេម ស្រុកត្រាំកក់ ខេត្ដតាកែវ។ ៤-ឈ្មោះ ហេង តុលា ភេទប្រុស អាយុ២២ឆ្នាំ មានទីលំនៅឃុំរលាប្អៀរ ស្រុករលាប្អៀរ ខេត្ដកំពង់ឆ្នាំង និង ៥-ឈ្មោះធិន ថារ៉ា ភេទប្រុស អាយុ២៣ឆ្នាំ មានទីលំនៅភូមិអូលាជ ឃុំបន្ទាយព្រាល ស្រុករលាប្អៀរ ខេត្ដកំពង់ឆ្នាំង។ ជនទាំង៤នាក់នេះមានក្របខណ័ណ្ឌជាទាហានទ័ពអាកាស នៅព្រលានយន្ដហោះខេត្ដកំពង់ឆ្នាំង។
លោក លឹម ហាក់ បានបញ្ជាក់ឲ្យដឹងទៀតថា ករណីនេះកើតឡើងដោយសារតែ ការស្រវឹងមិនមែនជារឿងគំនុំទេ ហើយជនទាំ៥នាក់នេះ គឺជាជើងកាងប្រចាំភូមិក្រាំងលាវ តែម្ដង។ បច្ចុប្បន្នពួកគេកំពុងសាកសួរយកចម្លើយនៅទីបញ្ជាការកងរាជអាវុធហត្ដ ខេត្ដកំពង់ឆ្នាំង ដើម្បីកសាងសំណុំរឿងបញ្ជូនទៅកាន់តុលាការ ចាត់ការបន្ដទៅតាមនីតិវិធី៕
