ព្រះសីហនុៈ អាជ្ញាធរខេត្តនេះបានបើកការស៊ើបអង្កេតភ្លាមកាលពីថ្ងៃព្រហស្បតិ៍ក្រោយ ពីមានការបំផ្ទុះគ្រាប់បែកកាលពីយប់ថ្ងៃពុធ នៅនឹងស្ពាន តាមផ្លូវជាតិលេខ៤ ក្បែរជ្រោះពេជ្រនិល។
លោក តាក វណ្ណថា ស្នងការនគរបាលខេត្តព្រះសីហនុឲ្យដឹងថា យើងកំពុងតែជួសជុលស្ពានឡើងវិញ បន្ទាប់ពីមានការផ្ទុះគ្រាប់បែកធ្វើឲ្យខូចខាតបន្តិចបន្តួច ហើយថា អាជ្ញាធរនៅមិនទាន់សន្និដ្ឋានបាននៅឡើយ។
លោកបញ្ជាក់ថា៖ «ខ្ញុំនៅមិនទាន់អាចវាយតម្លៃពីស្ថានភាពក្រោយការបំផ្ទុះគ្រាប់នេះបានទេ ដោយសារយើងកំពុងសហការស៊ើបអង្កេតរួមគ្នាលើករណីនេះ ព្រោះកន្លែងកើតហេតុស្ថិតក្នុងទឹកដីខេត្តកំពង់ស្ពឺ»។
លោក បន្តថា៖ «វាគឺជាប្រភេទគ្រាប់បែកច្នៃ ដាក់ក្នុងធុងទឹកចំណុះ៣០លីត្រ ដើម្បីបំផ្ទុះស្ពាន គ្រាប់ប្រភេទនេះ ធ្លាប់ប្រើប្រាស់ដោយអតីតរបបខ្មែរក្រហម»។
លោក ទេព មាន ចៅហ្វាយស្រុកភ្នំស្រួច ខេត្តកំពង់ស្ពឺ ដែលបានចុះទៅកន្លែងកើតហេតុថា មានការខូចខាតតិចតួច ដែលមិនធ្វើឲ្យស្ទះដល់ថ្នាក់បិទផ្លូវទេ។
លោកបន្តថា៖ «ខ្ញុំមិនអាចសន្និដ្ឋានមុខសញ្ញាជនដៃដល់ និងមូលហេតុបង្កការបំផ្ទុះនៅឡើយ ទេ ហើយការវាយតម្លៃនឹងធ្វើឡើងដោយថ្នាក់លើ»។
ស្នងការនគរបាលខេត្ត កំពង់ស្ពឺ និងអ្នកនាំពាក្យអគ្គស្នងការនគរបាលជាតិបដិសេធមិនធ្វើអត្ថាធិប្បាយដោយលោកជាប់ប្រជុំ។
លោក ហេង រតនា អគ្គនាយកមជ្ឈមណ្ឌលសកម្មភាពកម្ចាត់មីនកម្ពុជាប្រាប់ថា លោកមិនទាន់ទទួលព័ត៌មាននេះនៅឡើយ។
លោក រតនា បានបញ្ជាក់ថា៖«ក្រុមរបស់យើងកំពុងចុះធ្វើការពាក់ព័ន្ធនឹងករណីនេះ ហើយខ្ញុំនៅមិនទាន់ទទួលបានព័ត៌មានពីពួកគេនៅឡើយ»៕ VT
