ភ្នំពេញ: មេជួញដូរថ្នាំញៀន និងប្រើប្រាស់គ្រឿងញៀនម្នាក់ ត្រូវបានសមត្ថកិច្ចជំនាញចាប់ខ្លួន ពេលកំពុងធ្វើសកម្មភាពចែកចាយគ្រឿងញៀនកាលពីវេលាម៉ោង១៩និង៤៥នាទី យប់ថ្ងៃទី៩ ខែវិច្ឆិកា ២០១២ នៅត្រង់ចំណុចមុខផ្ទះលេខ៣១ ផ្លូវ៦០៨ ភូមិ២២ សង្កាត់បឹងកក់២ ខណ្ឌទួលគោក។
ករណីនេះ ធ្វើឡើងដោយកម្លាំងការិយាល័យប្រឆាំងគ្រឿងញៀន ដែលដឹកនាំដោយលោកវរសេនីយ៍ទោ ឈូក គា នាយការិយាល័យរងមន្ទីរប្រឆាំងគ្រឿងញៀន និងលោកវរសេនីយ៍ឯក សាន វុទ្ធី នាយការិយាល័យរងមន្ទីរប្រឆាំងគ្រឿងញៀន លោកហៀង សុភក្ត្រ ព្រះរាជអាជ្ញារងសាលាដំបូងរាជធានីភ្នំពេញ និងរួមសហការជាមួយប៉ូលិសមូលដ្ឋាន ធ្វើការឃាត់ខ្លួនឈ្មោះហុក សុភ័ក្ត្រ ភេទប្រុស អាយុ៣០ឆ្នាំ ស្នាក់នៅមិនប្រាកដ ដោយដកហូតវត្ថុតាងថ្នាំញៀនប្រភេទម៉ាទឹកកកចំនួន៨កញ្ចប់ និងឧបករណ៍ជក់ថ្នាំញៀនមួយ។
សមត្ថកិច្ចបានឲ្យដឹងថា ជនរងសង្ស័យនិងវត្ថុតាង ត្រូវបានប៉ូលិសមន្ទីរប្រឆាំងគ្រឿងញៀន ឃាត់ខ្លួននិងកសាងសំណុំឯកសារបញ្ជូនទៅតុលាការ៕ S(cen)
