មន្ត្រី
២នាក់ដែលបានឃាត់ខ្លួនទាក់ទងនឹងការឈូសទន្ទ្រានព្រៃលិចទឹក
ដើរចេញពីសាលាដំបូងរាជធានីភ្នំពេញកាលពីថ្ងៃម្សិលមិញ។ រូបថត គីមឡុង
ភ្នំពេញៈ សាលាដំបូងរាជធានីភ្នំពេញ កាលពីម្សិលមិញ បានសម្រេចចោទប្រកាន់មន្ត្រីរដ្ឋាភិបាល២នាក់និងកសិករ៤នាក់ ដែលអាជ្ញាធរបានឃាត់ខ្លួននៅខេត្តកំពង់ធំ ដោយមានជាប់ពាក់ព័ន្ធនឹងបទល្មើសប្រើប្រាស់គ្រឿងចក្រឈូសឆាយ ទន្ទ្រានយកដីព្រៃលិចទឹកដែលស្ថិតនៅក្នុងតំបន់ហាមឃាត់ជម្រក ត្រីពងកូននិងអភិរក្សត្រីមេពូជ នៅក្នុងស្រុកស្ទោង ខេត្តកំពង់ធំ។
កញ្ញា វ៉ា សក្កា ព្រះរាជអាជ្ញារងសាលាដំបូងរាជធានីភ្នំពេញ បានឲ្យដឹងថា សំណុំរឿងនេះបានបញ្ជូនទៅដល់ដៃចៅក្រមស៊ើបសួរហើយ។ តែព្រះរាជអាជ្ញារូបនោះ បានបដិសេធពុំព្រមផ្តល់ពីបទចោទនោះទេ។ កញ្ញាបានឲ្យដឹងទៀតថា ៖ «ខ្ញុំមិនបានកាន់រឿងនោះទេដូច្នេះសុំទាក់ទងទៅចៅក្រមស៊ើបសួរ»។
លោក ចៅក្រម សេង នាង ដែលបានចុះហត្ថលេខាលើដីកាបង្គាប់ឲ្យនាំខ្លួននោះពុំអាចទំនាក់ ទំនង ដើម្បីធ្វើការអត្ថាធិប្បាយបានទេកាលពីថ្ងៃពុធម្សិលមិញ។
មនុស្ស ចំនួន៦នាក់ដែលត្រូវបានកម្លាំងសមត្ថកិច្ចកងរាជអាវុធហត្ថ លើផ្ទៃប្រទេសបានធ្វើការឃាត់ខ្លួនកាលពីល្ងាចថ្ងៃទី២៤ ខែកក្កដា នោះ មានដូចជាលោកជាតិ ស៊ីវុត្ថា ប្រធានមន្ទីរធនធានទឹកនិងឧតុនិយមខេត្តកំពង់ធំ លោកពាញ ពូល មេឃុំសំព្រោច លោកម៉េង ផល្លី លោកថាវ ទុំ លោកធាង ធា និងអ្នកស្រីយក់ គឹមឡេង ដោយអ្នកទាំងអស់មានជាប់ពាក់ព័ន្ធបទល្មើសប្រើប្រាស់គ្រឿង ចក្ររាប់សិបគ្រឿងទៅឈូសឆាយទន្ទ្រានយកដីព្រៃលិចទឹក នៅបឹងទន្លេសាបនៅកំពង់ធំយ៉ាងអនាធិបតេយ្យ។
លោកហង្ស ថុល មេបញ្ជាការកងរាជអាវុធហត្ថខេត្តកំពង់ធំ បានឲ្យដឹងថា មនុស្សទាំង៦នាក់នោះ បានបញ្ជូនមកសាលាដំបូងរាជធានីភ្នំពេញនៅព្រឹកព្រលឹមថ្ងៃទី២៥ ខែកក្កដា ហើយការឃាត់ខ្លួនជនទាំងនោះ គឺអនុវត្តតាមដីកាបង្គាប់ឲ្យនាំខ្លួនរបស់សាលាដំបូងរាជធានី ភ្នំពេញចុះថ្ងៃទី២៣ ខែកក្កដា ក្រោមបទចោទប្រកាន់ ធ្វើសកម្មភាពបំពាននៅក្នុងតំបន់ហាមឃាត់ដែលជាតំបន់គ្រប់គ្រងដោយ ស្ថាប័នជលផល និងធនធានទឹក ហើយបានកាប់ឆ្ការគាស់រានឈូសឆាយ ហ៊ុមព័ទ្ធ កាន់កាប់ និងធ្វើឲ្យខូចខាត ឬបំផ្លាញចោលបង្គោលព្រំខណ្ឌ និងផ្លាស់ប្ដូររំកិល ឬជីកបង្គោលខណ្ឌព្រំ ជីកប្រឡាយនិងលើកទំនប់អាងសាងសង់ថ្មីៗ។ លោក បានឲ្យដឹងបន្ថែមទៀតថា៖ «ខ្ញុំពុំទាន់ដឹងថាតើតុលាកាក្រុងភ្នំពេញនឹងចាត់វិធានការយ៉ាង ណាចំពោះជនទាំងអស់នោះទេ។ ការចូលឈូសទន្ទ្រានយកដីព្រៃលិចទឹកនោះ គឺធ្វើឲ្យប៉ះពាល់យ៉ាងធ្ងន់ធ្ងរដល់ជម្រកពងត្រី ពីព្រោះនៅរដូវវស្សាត្រីមកជ្រកបណ្តែតពងនៅក្នុងតំបន់នោះ»។
លោក បានឲ្យដឹងទៀតថា នៅក្នុងការចុះបង្ក្រាបនោះអាជ្ញាធរ បានស្រាវជ្រាវឃាត់ខ្លួនមនុស្សចំនួន៦នាក់ និងរឹបអូសអេស្កាវ៉ាទ័របានចំនួន៤៥គ្រឿង ហើយបច្ចុប្បន្នគ្រឿងចក្រទាំងអស់បានយកទៅទុកនៅទីបញ្ជាការដ្ឋាន កងរាជអាវុធហត្ថស្រុកស្ទោងខេត្តកំពង់ធំ ដើម្បីចាត់វិធានការទៅតាមផ្លូវច្បាប់។
លោកឈុន ឈន់ អភិបាលខេត្តកំពង់ធំ បានថ្លែងឲ្យដឹងថា ទាក់ទិនទៅនឹងបញ្ហានោះលោកពុំបានទទួលបានព័ត៌មានអ្វីនោះទេ ពីព្រោះកិច្ចការនោះថ្នាក់ជាតិជាអ្នកធ្វើ។ លោកបានឲ្យដឹងទៀតថា៖ «ខ្ញុំពុំបានដឹងរឿងអ្វីនោះទេ ពីព្រោះវាជាកិច្ចការរបស់ថ្នាក់ជាតិ»។
លោកចាន់ សុវ៉េត មន្ត្រីស៊ើបអង្កេតជាន់ខ្ពស់អង្គការសិទ្ធិមនុស្សអាដហុក បានថ្លែងឲ្យដឹងថា ការចាប់ខ្លួនជនទាំងនោះមកធ្វើការសាកសួរនៅឯសាលាដំបូងក្រុង ភ្នំពេញនោះអនុវត្តទៅតាមដីកាកោះឲ្យនាំខ្លួន ចុះថ្ងៃទី២៣ ខែកក្កដា ឆ្នាំ២០១២ របស់លោក សេង នាង ចៅក្រមស៊ើបសួរសាលាដំបូងរាជធានីភ្នំពេញ។ នេះ គឺជាការលើកទឹកចិត្តដល់ពលរដ្ឋដែលនៅក្នុងតំបន់នោះពីព្រោះ អ្នកទាំងអស់នោះកន្លងមកបានដើរប្រព្រឹត្តតាមតែទំនើងចិត្ត ដោយពុំមានអាជ្ញាធរណាហ៊ានធ្វើអ្វីពួកគេនោះទេ។ លោកបានឲ្យដឹងទៀតថា៖ «យើងទទូចស្នើឲ្យតុលាការអនុវត្តទៅតាមផ្លូវច្បាប់និងផ្តន្ទាទោស ពួកគេទៅតាមអ្វីដែលពួកគេបានប្រព្រឹត្តចៀសវាងគ្រាន់តែឃាត់ ខ្លួនធ្វើការសួរនាំ ហើយឲ្យរួចខ្លួនវិញនោះ»៕
