មន្ត្រីក្រសួងសុខាភិបាលកម្ពុជា អះអាងថា
ជំងឺគ្រុនឈាមរាតត្បាតកុមារ គិតមកដល់សប្ដាហ៍ទី២៧ នៃឆ្នាំ២០១២
បានសម្លាប់កុមារ ៦០នាក់ ហើយមានអ្នកជំងឺគ្រុនឈាម ១៥.៥៩៧នាក់
បានមកព្យាបាលក្នុងមន្ទីរពេទ្យ។
កុមារសម្រាកព្យាបាលជំងឺគ្រុនឈាម នៅក្នុងមន្ទីរពេទ្យ ខេត្តតាកែវ កាលពីថ្ងៃទី១៧ កក្កដា ឆ្នាំ២០១២។
គ្រូពេទ្យជំនាញផ្នែកជំងឺកុមារនៅមន្ទីរពេទ្យបង្អែកខេត្តតាកែវ អះអាងថា ក្នុងមន្ទីរពេទ្យនេះបានទទួលកុមាររាល់ថ្ងៃជាង ២០នាក់ ដែលសង្ស័យកើតជំងឺគ្រុនឈាម។
អនុប្រធានមន្ទីរពេទ្យបង្អែកខេត្តតាកែវ វេជ្ជបណ្ឌិត តែ វ៉ាន់ថា ថ្លែងនៅព្រឹកថ្ងៃអង្គារ ទី១៧ ខែកក្កដា ថា ជំងឺគ្រុនឈាម កំពុងរាតត្បាតកុមារកើនឡើងពីមួយសប្ដាហ៍ទៅសប្ដាហ៍នៅក្នុងរដូវ វស្សានេះ។
លោកថា កុមារឈឺគ្រុនឈាមដែលគ្រូពេទ្យទទួលឲ្យសម្រាកមាន ៦០នាក់ ហើយមានកុមារជិត ៥០ ទៅ ៦០នាក់ទៀត កំពុងរង់ចាំគ្រូពេទ្យជួយសង្គ្រោះ។ តែគ្រូពេទ្យមមាញឹកព្យាបាល មិនទាន់ជោះយកឈាមគ្រប់អ្នកជំងឺថ្មីយកទៅវិភាគនៅឡើយ។
លោកវេជ្ជបណ្ឌិត តែ វ៉ាន់ថា បន្តថា ជំងឺគ្រុនឈាមក្នុង ៣ខែចុងក្រោយនេះមានកុមារជាង ៣០០នាក់ បានមកសម្រាកក្នុងមន្ទីរពេទ្យបង្អែកខេត្តតាកែវ៖ «មានកូនឈឺ សង្ស័យមានគ្រុនឈាម គួរចៀសវាងកុំប្រើប្រាស់សេវានៅក្នុងភូមិ ជួនកាលវាជាការដាក់សេរ៉ូមនៅផ្ទះនោះ វាធ្វើឲ្យក្មេងរឹតតែគ្រោះថ្នាក់ថែមទៀត ធ្វើឲ្យក្មេងលើសជាតិទឹក ហើយគាត់ភ្លេចគិតថា ក្មេងវានឹងវិវឌ្ឍន៍ចូលដំណាក់កាលមួយធ្ងន់ធ្ងរ នៅថ្ងៃទី៤ ទី៥ ហើយយើងពិបាកជួយសង្គ្រោះ»។
ស្ត្រីមកពីភូមិព្រៃទូក ឃុំអង្កាញ់ ស្រុកទ្រាំង ខេត្តតាកែវ អះអាងថា កូនប្រុសគាត់អាយុជាង ៤ឆ្នាំក្ដៅខ្លួនខ្លាំង និងស្រែកឈឺក្នុងពោះ។ គាត់ព្យាបាលកូនដោយគ្រូពេទ្យភូមិ ២ថ្ងៃ កូនគាត់នៅតែក្ដៅត្រជាក់ៗ។ កាលពីរសៀលថ្ងៃច័ន្ទ ទី១៦ កក្កដា គាត់សង្ស័យកូនឈឺគ្រុនឈាម ក៏បានយកកូនមកមន្ទីរពេទ្យបង្អែកខេត្តតាកែវ៖ «ម្សិលមិញវាប្រកាច់ រឹងដៃរឹងជើង ហើយភ្នែកស្លឺឡើងលើ»។
កុមារាឈ្មោះ ឡុង ផេង អាយុ ១៣ឆ្នាំ កំពុងតែមានឈាមហូរតាមច្រមុះ ដៃជាប់សេរ៉ូម ឲ្យដឹងថា គាត់ក្ដៅខ្លួន ៤ថ្ងៃហើយ។ គ្រូពេទ្យបានជោះឈាមគាត់យកទៅពិនិត្យ ដឹងថា គាត់ឈឺគ្រុនឈាម។ គ្រូពេទ្យកំពុងជួយសង្គ្រោះ ប៉ុន្តែគាត់នៅតែហូរឈាមតាមច្រមុះ៖ «ក្ដៅញាក់ៗ ហើយឈឺក្បាល»។
យុវជនអាយុ ១៥ឆ្នាំ ឈ្មោះ សុភ័គ្រ មកពីភូមិ២ ឃុំរកាក្នុង ក្រុងដូនកែវ ខេត្តតាកែវ ឲ្យដឹងថា គាត់ទៅការបងនៅខេត្តបាត់ដំបង ហើយបានក្ដៅខ្លួន។ គ្រូពេទ្យនៅបាត់ដំបង ក្រោយពីជោះឈាមគាត់រួចប្រាប់ថា គាត់មានជំងឺគ្រុនឈាម និងគ្រុនពោះវៀន។ គាត់ត្រូវក្រុមគ្រួសារដឹកមកព្យាបាលបន្តនៅខេត្តតាកែវ កាលពីយប់ថ្ងៃច័ន្ទ ទី១៦ ខែកក្កដា។ គ្រូពេទ្យខេត្តតាកែវ ទើបជោះឈាម មិនទាន់ប្រាប់ថា គាត់មានជំងឺអ្វីនៅឡើយ ប៉ុន្តែគ្រូពេទ្យបានចាក់សេរ៉ូម និងផ្ដល់ថ្នាំលេបបន្ថយកម្ដៅ គាត់នៅតែក្ដៅខ្លួនខ្លាំង ចុកក្នុងពោះ និងឈឺក្បាល។
ប្រធានមណ្ឌលជាតិប្រយុទ្ធនឹងជំងឺគ្រុនចាញ់ បារ៉ាស៊ីតសាស្រ្ត បាណកសាស្រ្ត នៃក្រសួងសុខាភិបាល វេជ្ជបណ្ឌិត ច ម៉េងចួ ថ្លែងថា ក្រសួងជូនដំណឹងដល់សាធារណជនឲ្យប្រុងប្រយ័ត្នជំងឺគ្រុនឈាម នៅក្នុងឆ្នាំ២០១២ អាចមានការរាតត្បាតប្រហាក់ប្រហែលឆ្នាំ២០០៧ កន្លងទៅ។
លោកមានប្រសាសន៍បន្តថា គិតដល់ថ្ងៃ៧ ខែកក្កដា មានកុមារកើតជំងឺគ្រុនឈាម ១៥.៥៩៧នាក់ ក្នុងនោះបានស្លាប់ ៦០នាក់។ កុមារស្លាប់ និងកើតជំងឺគ្រុនឈាមភាគច្រើនមានអាយុពី ៥ឆ្នាំ ទៅ ៩ឆ្នាំ។ លោកថា អ្នកជំងឺគ្រុនឈាមដែលមកពីខេត្តតាកែវ កំពុងព្យាបាលនៅមន្ទីរពេទ្យក្នុងក្រុងភ្នំពេញ មាន ៥៣៦នាក់ ក្នុងនោះបានស្លាប់ ២នាក់។
អនុប្រធានមន្ទីរពេទ្យបង្អែកខេត្តតាកែវ វេជ្ជបណ្ឌិត តែ វ៉ាន់ថា ឲ្យដឹងថា ក្រៅពីជំងឺគ្រុនឈាម ជំងឺគ្រុនឈីក (CHIKV) ក៏មានកើតលាយឡំដែរ។ ក្រុមគ្រូពេទ្យមកពីក្រសួងសុខាភិបាល បានចុះយកឈាមអ្នកជំងឺទៅពិនិត្យ។ លោកសុំឲ្យពលរដ្ឋទូទៅរហ័សយកកូនមកកាន់មន្ទីរពេទ្យនៅពេលកូនចៅ មានអាការៈក្ដៅខ្លួនខ្លាំង និងក្ដៅសន្លឹម។
របាយការណ៍ក្រសួងសុខាភិបាលបង្ហាញថា អត្រាគ្រុនឈាមខ្ពស់ គឺខេត្តបន្ទាយមានជ័យ កំពង់ស្ពឺ ឧត្តរមានជ័យ សៀមរាប និងខេត្តកណ្ដាល។ គ្រុនឈាមកំពុងផ្ទុះរាតត្បាត គឺខេត្តក្រចេះ មណ្ឌលគិរី រតនគិរី ស្ទឹងត្រែង និងខេត្តកែប។
ករណីឈឺកើនឡើងដោយមូលហេតុ ៤យ៉ាង គឺទី១ ដោយឆ្នាំ២០១២ ជាឆ្នាំទី៥ នៃវដ្ដការរាតត្បាត រាប់ពីឆ្នាំ២០០៧ មក។ នៅឆ្នាំ២០១២ សន្ទស្សន៍មូសខ្ពស់ជាងឆ្នាំ២០០៧ ច្រើនខ្លាំង។ ទី២ ដោយសន្ទស្សន៍អ្នកជំងឺដើមឆ្នាំ២០១២ ខ្ពស់ជាងឆ្នាំ២០០៧ ដែលជាឆ្នាំរាតត្បាតធំ។ ទី៣ ដោយប្រជាពលរដ្ឋបានយកកូនមកព្យាបាលនៅសេវាសាធារណៈ តាមការអំពាវនាវរបស់ក្រសួង។ ទី៤ កុមារជាង ១ម៉ឺននាក់ដែលគ្រូពេទ្យព្យាបាល វិនិច្ឆ័យថា គ្រុនឈាមតាមពិតមិនមែនសុទ្ធតែគ្រុនឈាមទាំងអស់ទេ គឺមានច្រឡំគ្រុនឈីក ព្រោះថា គ្រុនឈីកមួយចំនួនមានសញ្ញាប្រហែលគ្រុនឈាមប្រភេទស្រាល។
របាយការណ៍ដដែលសរសេរថា ការពិនិត្យឈាមដែលរើសដោយចៃដន្យយកមកវិភាគនៅវិទ្យាស្ថានប៉ាស្ទ័រ ចំនួន ៥០នាក់ នៅខេត្តបន្ទាយមានជ័យ និងឧត្តរមានជ័យ ឃើញថា ៤២% វិជ្ជមានវីរុសគ្រុនឈាម ៤៦% វិជ្ជមានវីរុសគ្រុនឈីក ២% វិជ្ជមានវីរុសគ្រុនឈាមផងគ្រុនឈីកផង និង ១២% អវិជ្ជមានវីរុសគ្រុនឈាម ឬ អវិជ្ជមានវីរុសគ្រុនឈីក៕
